Panimalay nila ni Newel ug Elizabeth Whitney

Si Newel K. Whitney ug ang iyang asawa nga si, Elizabeth Ann Whitney, dugay nang napuyo sa Kirtland, Ohio, ug nangita og mas mahinungdanong relihiyoso nga kamatuoran. Niadtong mga 1828, ang mga Whitney nakauban ni Sidney Rigdon ug sa iyang mga pagtulun-an. Bisan pa niana, nakadawat sila og pagpamatuod gikan sa Dios nga adunay ipadayag nga mas mahinungdanon nga kamatuoran, mao nga mapailobon sila nga naghulat. Sa ulahing bahin sa 1830, ang mga misyonaryo nga mga Santos sa Ulahing mga Adlaw nga sila si Oliver Cowdery, Parley P. Pratt, Ziba Peterson, ug Peter Whitmer Jr. miabot sa aminahang silangan sa Ohio. Atol sa sunod-sunod nga mga panagtigom sa Kirtland nga dapit, sila si Cowdery ug Pratt nagsangyaw ngadto sa mga sakop sa kongregasyon ni Sidney Rigdon sa Reformed Baptist. Human nabunyagan si Rigdon, pipila ka sakop sa iyang kongregasyon, lakip nila ni Newel ug Elizabeth Ann Whitney, gibunyagan usab.

Sa dihang miabot si Joseph Smith ug ang iyang asawa nga si Emma sa Kirtland niadtong Pebrero 4, 1831, si Newel Whitney midala nila “diretso ngadto sa [iyang] balay” (Whitney, Woman’s Exponent, Sept. 1, 1878, 51). Gikalipay sa mga Whitney ang pagpadayon sa Propeta ug sa iyang asawa sa ilang panimalay.

Si Joseph ug si Emma Smith migahin sa unang bulan sa ilang pagpuyo sa Ohio didto sa panimalay sa mga Whitney. Sa panahon nga ang mga Smith nagpuyo uban sa mga Whitney, ang Whitney nga panimalay nahimong dapit sa panagtigom ug pagpadayag alang sa mga Santos. Dinhi niini nga panimalay, daghang kinabig unang nakadungog sa gipahiuli nga ebanghelyo, bag-ong mga posisyon ug mga organisasyon gipadayag, ug ang Simbahan mas hingpit nga naestablisar. Sa adlaw nga miabot si Joseph ug si Emma sa Kirtland, nakadawat si Joseph og usa ka pagpadayag—nga karon nailhan nga Doktrina ug mga Pakigsaad 41—nga mipili ni Edward Partridge isip ang unang bishop sa Simbahan, usa ka posisyon nga si Newel K. Whitney matawag usab diha sa laing pagpadayag nga nadawat (tingali didto usab sa panimalay sa mga Whitney) niadtong Disyembre 1831 (tan-awa sa Doktrina ug mag Pakigsaad 72:1–8). Niining panahona, nakadawat si Joseph og upat ka pagpadayag, nga karon gimantala diha sa Doktrina ug mga Pakigsaad (mga seksiyon 41–44).

Samtang nagserbisyo isip bishop sa Kirtland, si Newel K. Whitney mipahigayon og tulo ka adlaw nga kumbira alang sa mga kabos, subay sa panig-ingnan sa Manluluwas ug sa balaod sa pagpahinungod (tan-awa sa Doktrina ug mga Pakigsaad 42:30–39). Si Emma Smith ug si Elizabeth Ann Whitney nagtinabangay sa pagserbisyo sa mga bisita.

Ang gipahiuli nga Panimalay nila ni Newel ug Elizabeth Whitney kay kabahin na karon sa Makasaysayanon nga Kirtland.

Magbasa pa og dugang mahitungod sa Panimalay nila ni Newel ug Elizabeth Whitney diha sa kapitulo 11 sa Mga Santos, volume 1.

360° nga Pag-aninaw sa Tibuok Palibot

Unsay Malaoman

Ang Panimalay nila ni Newel ug Elizabeth Whitney apil sa giniyahan nga paglibot nga gitanyag sa mga misyonaryo diha sa Makasaysayanon nga Kirtland.