Newel K. Whitney Store

Niadtong 1826, si Newel K. Whitney mipalit og yuta didto sa Kirtland, Ohio, aron magtukod og tindahan sa atbang sa iyang panimalay. Giatiman ni Newel ang tindahan uban sa iyang higala ug kauban sa negosyo, si Sidney Gilbert. Ang duha ka negosyante nagbaligya og lainlaing mga baligya, kadaghanan niini labing seguro gihatod ngadto sa Kirtland pinaagi sa Lake Erie. Ang Newel K. Witney Store mao usab ang buhatan sa unang post office sa lungsod. Human sa pag-abot sa mga Santos niadtong 1831, ang tindahan nahimong usa ka dapit sa panagtigom ug pagpadayag.

Pagka Pebrero 4, 1831, si Propeta Joseph Smith ug ang iyang mabdos nga asawa, si Emma, miabot sa Kirtland didto sa Newl K. Whitney Store. Mainiton silang gidawat sa mga Whitney ug, duha ka tuig human niadto, ang usa ka porsyion sa Newel K. Whitney Store nahimong usa ka panimalay sa Propeta ug sa iyang pamilya. Ang ibabaw nga andana sa tindahan nahimong usa ka dapit sa pagpadayag ug mao ang punoang buhatan sa Simbahan didto sa Templo sa Kirtland sa mubong panahon. Gikompleto ni Joseph Smith ang iyang dinasig nga paghubad sa Biblia samtang nagpuyo didto sa tindahan niadtong Hulyo 1833. Ang Tulunghaan sa Propeta gipahigayon sa usa ka lawak sa ikaduha nga andana. Dinhi niini nga kahimtang, mi-orden si Joseph Smith og duha ka tawo aron moserbisyo isip mga magtatambag ngadto kaniya diha sa Unang Kapangulohan ug daghan niadtong anaa didto nakakita og langitnong panan-awon sa Manluluwas. Uban sa mahinungdanong mga pagpadayag nga nadawat ni Joseph didto sa Newel K. Whitney Store mao ang Pulong sa Kaalam (Doktrina ug mga Pakigsaad 89) human si Joseph Smith nangutana sa Ginoo mahitungod sa mga lalaki nga nanabako atol sa mga miting.

Ang gipahiuli nga Newel K. Whitney Store kabahin na karon sa Makasaysayanong Kirtland nga paglibot.

Magbasa pa og dugang mahitungod sa Newel K. Whitney Store sa kapitulo 15 sa Mga Santos, volume 1.

360° nga Pag-aninaw sa Tibuok Palibot

Unsay Malaoman

Ang Newel K. Whitney Store kabahin sa giniyahan nga paglibot sa Makasaysayanong Kirtland nga ihatag sa mga misyonaryo. Ang paglibot magsugod sa Sentro sa mga Bisita sa Makasaysayanong Kirtland ug maglakip sa Newel K. Whitney Store ug sa panimalay sa mga Whitney; mahimong maglakip usab kini sa Balay Abotanan sa mga Johnson, ang ashery [himoanan og abo] sa mga Whitney, ug ang bansohan kon ihangyo.