Templo sa Kirtland

Pagka-Disyembre 1832, ang Ginoo misugo sa mga Santos sa Kirtland, Ohio, sa pagtukod og “usa ka balay sa Dios” (Doktrina ug mga Pakigsaad 88:119). Himoon kadto nga “balay sa pag-ampo, usa ka balay sa pagpuasa, usa ka balay sa hugot nga pagtuo, usa ka balay sa pagtulun-an, usa ka balay sa himaya, usa ka balay sa kahusay, usa ka balay sa Dios.” Ang mga Santos sa Kirtland misakripisyo og panahon ug kwarta aron itukod ang balay sa Ginoo. Aduna silay pagtuo nga motabang ang Ginoo nila sa paghimo sa Iyang kabubut-on. Nakompleto ang templo sa ulahi nga bahin sa 1835 ug gipahinungod pagka Marso 27, 1836 (Doktrina ug mga Pakigsaad 109).

Ang pagtuo sa mga Santos gigantihan og pagbu-bo sa espirituwal nga mga pagpakita didto sa nakompleto nga Templo sa Kirtland. Atol sa pagpahinungod, ang ubang mga tawo nga mitambong mitaho nga nakakita og mga anghel. “Walay mortal nga pinulongan nga makahulagway sa langitnong mga pagpakita niadtong halandumong adlaw,” si Eliza R. Snow, kinsa didto sa templo alang sa pagpahinungod, sa kaulahian misulat. “Ang mga anghel mipakita sa uban, samtang usa ka matang sa balaanong mga nanambong namatngonan sa tanan nga miadto, ug ang matag kasingkasing napuno sa ‘dili masulti nga hingpit nga kalipay ug napuno sa himaya.’”¹ Ang uban nga didto sa gawas sa templo mitaho nga “nakadungog og dili kasagaran nga kabanha sa sulod, ug nagtan-aw sa usa ka suwaw nga kahayag sama sa usa ka dako nga gilis sa kalayo nga anaa [diha Templo].”²

Niadtong Abril 3, 1836, usa ka semana human sa pagpadayag, dul-an sa usa ka libo ka Santos sa Ulahing mga Adlaw ang nagtigom aron mosimba sa Ginoo didto sa Templo sa Kirtland. Human sa pagpangalagad sa sakramento, si Propeta Joseph Smith ug si Oliver Cowdery miadto sa mga pulpito sa Melchizedek nga Pagkapari ug gipaubos ang tabil o kurtina aron mahatagan sila og pribasiya. Human sila miyukbo diha sa “solemno ug hilom nga pag-ampo,” miabli ang usa ka panan-awon diin giduaw sila ni Jesukristo, kinsa mipahibalo nga Iyang gidawat ang balay nga ilang gitukod. Gibisitahan dayon si Joseph ug si Oliver sa tulo ka dugang nga mga alagad: sila si Moises, Elias, ug Elijah. Si Moises mihatag kanila ”sa mga yawe sa pagpundok sa Israel” (Doktrina ug mga Pakigsaad 110:11), si Elias mihatag kanila sa “katungod sa pagdala sa talagsaon nga mga panalangin sa pakigsaad kang Abraham,”³ ug si Elija mihatag nila sa gahom sa pagselyo “aron ipabalik ang mga kasingkasing sa mga amahan ngadto sa mga anak, ug ang mga anak ngadto sa mga amahan,” (Doktrina ug mga Pakigsaad 110:15).

Sa daghang dekada, ang Komunidad ni Kristo mipreserbar ug miatiman sa Templo sa Kirtland. Niadtong Marso 2024, ang pagkatinugyanan niining minahal nga timaan sa kasaysayan gibalhin ngadto sa Ang Simbahan ni Jesukristo sa mga Santos sa Ulahing mga Adlaw.

Magbasa pa og dugang mahitungod sa Templo sa Kirtland sa kapitulo 21 sa Mga Santos, volume 1.

---

1. Edward Tullidge, Women of Mormondom, 95.
2. History, 1838–1856, volume B-1 (1 September 1834–2 November 1838), addenda, 4; www.josephsmithpapers.org
3. Russell M. Nelson, “Ang Walay Kataposan nga Pakigsaad, Liahona, Okt. 2022, 9; https://folky.shop/study/liahona/2022/10/04-the-everlasting-covenant?lang=ceb

Unsay Malaoman

Ang giniyahan nga mga paglibot sa Templo sa Kirtland nagsugod sa Sentro sa mga Bisita sa Templo sa Kirtland ug milungtad sa gibanabana nga usa ka oras. Ang paglibot motugot sa mga bisita sa pagbisita sa tanang tulo ka andana sa templo aron makat-on og dugang mahitungod sa pagtukod ug paggamit niini niadtong mga 1830.