Awtoridad ug Gahom sa Pagkapari

Ang paspas nga pagtubo sa Simbahan niadtong mga 1830 nagpakita og grabe ka lisod nga mga hagit sa pagdumala sa Simbahan. Samtang daghang bag-ong mga kinabig ang mipasakop sa Simbahan sa sulod ug sa tibuok Kirtland, ang mga miyembro nga gikan sa New York misugod usab sa pagpundok sa Ohio. Kini nga paglihok ug pagpalapad nagmugna sa panginahanglan alang sa Simbahan sa paghatag og dugang nga balay ug mga oportunidad sa pagpanarbaho.

Samtang nahitabo kini nga pagtubo ug paglihok, ang mga misyonaryo gipadala aron sa pagsangyaw sa ebanghelyo. Kini nga mga misyonaryo ug ang mga pamilya nga ilang gibiyaan sa panimalay nanginahanglan og suporta samtang miadto sila sa kalibotan aron magsangyaw.

Uban niining misyonaryo nga mga paningkamot miabot ang panginahanglan sa pagsugod og mantala sa mga materyal sa Simbahan sama sa Basahon ni Mormon ug mga pagpadayag ni Joseph Smith nga maangkon sa mga misyonaryo ug mga miyembro. Kining tanan nga kausaban nakahimo og usa ka mahinungdanon nga panginahanglan alang sa dugang nga estruktura sa pagpangulo.

Kadaghanan sa labing nailhan nga mga aspeto sa Simbahan karon nagsugod sa mga pagpadayag ug mga kausaban sa organisasyon nga nahitabo samtang ang Simbahan anaa nahimutang sa Ohio. Kini naglakip sa mga bishopric, sa Unang Kapangulohan, mga organisasyon sa stake, mga kapangulohan sa korum sa pagkapari, ug mga General Authority alang sa Simbahan.

Kining mga kausaban sa estruktura sa pagkapari gipatakdo sa mga pagpalambo sa doktrina nga nadawat ug nakatabang sa pag-andam sa mga Santos sa pagdawat sa pagtuga sa gahom nga gisaad dihang ang pagtugod sa balay sa Ginoo nahuman.

Diha-diha dayon human miabot si Joseph Smith sa Ohio, ang Ginoo mipadayag sa una sa daghang bag-o nga mga katungdanan ug mga korum sa pagkapari nga gidisenyo aron matubag ang mga hagit nga nasinati sa Simbahan.

Sa usa ka pagpadayag nga nadawat sa adlaw sa pag-abot ni Joseph, ang Ginoo misugo nga si Edward Partridge, usa ka malamposon nga negosyante gikan sa duol nga Painesville kinsa bag-ohay lang nga nabunyagan, nga “iorden nga obispo sa simbahan” ug mitawag kang Partridge sa “pagbiya sa iyang pagpamaligya ug igahin ang iyang tanang panahon sa mga buluhaton sa simbahan” (Doktrina ug mga Pakigsaad 41:9).

Ang dugang nga mga pagpadayag nga nadawat sa misunod nga mga bulan mipatin-aw ug mipalapad sa katungdanan sa bishop pinaagi sa pagdugang og mga magtatambag ug naglatid og piho nga mga responsibilidad sa katungdanan.¹

Samtang ang Simbahan nagpadayon sa paglambo, ang panginahanglan sa dugang nga pagdumala nagpadayon. Pagka Hunyo 1831, daghan sa kalalakin-an ang na-orden ngadto sa “halangdon nga pagkapari,” usa ka bag-o nga gipadayag nga katungdanan diha sa Melchizedek nga Pagkapari nga karon sagad natong gipasabot nga “mga high priest.”³

Nadtong Nobiyembre 1831, usa ka pagapadayag nga misugo ni Joseph Smith sa pag-establisar sa “pangulo sa labaw nga pagkapari,” kinsa “aron mahimo nga usa ka manalagna, usa ka tigpadayag, … ug propeta, nga makaangkon sa tanang gasa sa Dios nga iyang ihatag sa pangulo sa simbahan” (Doktrina ug mga Pakigsaad 107:65–67, 92).

Niadtong Enero 25, 1832, si Joseph Smith gitudlo nga presidente sa labaw nga pagkapari ug gidawat pinaagi sa hiniusang pagboto niadtong mitambong sa komperensiya didto sa Amherst, Ohio.⁴ Unom ka semana ang milabay, niadtong Marso 8, si Joseph Smith mitawag ni Sidney Rigdon ug Jesse Gause isip mga magtatambag aron moabag kaniya sa bag-ong namugna nga Unang Kapangulohan sa Simbahan.

Niadtong Abril 26, 1832, usa ka pagpadayag mipahinungod sa Kirtland isip usa ka “stake sa Zion.” Niadtong Pebrero 1834, ang kapangulohan sa stake sa Kirtland namugna, uban sa halangdong konseho. Sa ulahing bahin nianang tuiga, usa ka stake usab ang giorganisar sa Missouri, ug ang duha ka stake gipangulohan sa usa ka kapangulohan, bishop, ug usa ka halangdong konseho.⁴

Ang mga high priest ug mga korum sa mga elder naorganisar usab sa matag stake. Sugod sa Enero 1836, dihang si Don Carlos Smith gitawag isip presidente sa korum sa mga high priest ug si Alvah Beman isip presidente sa korum sa mga elder, kining duha ka korum misugod sa pagmiting kanunay.

Sa usa ka pagpadayag nga nadawat niadtong Hunyo 1829, ang Ginoo mitawag nila ni Oliver Cowdery ug David Whitmer sa pagpangita “sa Napulog Duha” nga mahimong “akong mga disipulo” ug “magtinguha sa pagdala sa akong ngalan uban sa hingpit nga katuyoan sa kasingkasing” (Doktrina ug mga Pakigsaad 18:27). Kini mao ang labing unang timailhan nga ang espesyal nga korum sa 12 ka disipulo, sama sa karaang Apostoles ni Kristo, nga mahimong kabahin sa gipahiuli nga Simbahan. Ang pagpangita niining 12 ka kalalakin-an mikabat og dul-an sa unom ka tuig.

Usa ka tuig human giorganisar ang halangdong konseho sa Kirtland, niadtong Pebrero 14, 1835, ang Korum sa Napulog Duha ka Apostoles pormal nga giorganisar ug ang mga sakop niini giorden. Atol sa usa ka miting sa hapit na mahuman nga balay sa Ginoo, ang Tulo ka Saksi sa Basahon ni Mormon—Oliver Cowdery, David Whitmer, ug Martin Harris—gitawag sa “pag-ampo sa matag usa, ug unya mopadayon sa pagpili og napulog duha ka kalalakin-an gikan sa simbahan isip Apostoles nga moadto sa tanan nga mga nasod, mga kaliwatan, mga pinulongan, ug mga katawhan.”⁵

Human sa pag-ampo ug pagpanalangin sa Unang Kapangulohan, ang kalalakin-an mipili nila ni Lyman Johnson, Brigham Young, Heber C. Kimball, Orson Hyde, David W. Patten, Luke Johnson, William E. McLellin, John F. Boynton, Orson Pratt, William Smith, Thomas B. Marsh, ug Parley P. Pratt nga moserbisyo sa unang Korum sa Napulog Duha ka Apostoles.

Sa misunod nga pipila ka semana, ang matag Napulog Duha gi-orden sa ilang calling. Sulod sa pipila ka bulan, si Joseph Smith kanunayng nakigkita sa Napulog Duha aron bansayon sila sa ilang mga katungdanan isip ang “tigbiyahe nga halangdong konseho” sa Simbahan, nga dunay awtoridad sa “pag-abli sa ganghaan sa gingharian sa langit ngadto sa tanang kanasoran.”⁶

Wala madugay human ang Napulog Duha gitawag, ang Seventy, usa ka dugang nga katungdanan sa Melchizedek nga Pagkapari, gipaila, ug ang mga korum giorganisar nga dunay piho nga responsibilidad sa pag-abag sa Napulog Duha pinaagi sa “pagpul-ong sa ubasan sa kataposang higayon”⁷ ug sa pagserbisyo isip “talagsaong mga saksi ngadto sa mga Hentil ug sa tibuok kalibotan” (Doktrina ug mga Pakigsaad 107:25).