Folasaga i Nofoaga Faasolopito i Niu Ioka ma Penisilevania
O nofoga e taua faasolopito i Le Ekalesia a Iesu Keriso o le Au Paia o Aso e Gata Ai o loo maua i Niu Ioka ma Penisilivenia.
“Na ou vaaia ai se malamalama faaniutu i luga a’e tonu lava o lo’u ulu, ua sili atu le pupula i le la, ua alu ifo malie lava se’ia oo mai i o’u luga … Ina ua oo mai le malamalama i o’u luga, sa ou vaaia ni Tagata e toalua, o lo la’ua pupula ma le mamalu e lē mafaamatalaina, o tutu a’e i o’u luga i le ea. Sa fetalai mai le tasi o i la’ua ia te aʼu, ma fofoga mai ia te aʼu i loʼu igoa ma fetalai mai, aʼo tusi ane i le tasi—O Loʼu Atalii Pele lenei. Faalogo ia te Ia!”
– Iosefa Samita
I se aso o le tautotogo i le 1820, sa alu atu ai Iosefa Samita e 14-tausaga e tatalo i se togavao e lata ane i lona aiga i Palamaira, Niu Ioka. I le tali i lana tatalo, na faaali mai ai le Atua le Tama ma Lona Alo o Iesu Keriso ia Iosefa Samita ma fetalai atu ia te ia. O lenei tali na suia ai le olaga o Iosefa ma faatulaga ai o ia i se ala e toefuatai mai le talalelei a Iesu Keriso.
Faaaliga faatusiata o le Uluai Faaaliga.
O le tolu tausaga mulimuli ane, na faaali mai ai se agelu ia Iosefa i le potu pito i luga o le fale ogalaau a lo latou aiga. Sa faailoa mai e le agelu o ia lava o Moronae, o se perofeta-tusitala faasolopito o lē na ta’u atu ia Iosefa e uiga i se faamaumauga anamua lea na i ai le atoatoaga o le talalelei a Iesu Keriso. Na faaali atu e Moronae ia Iosefa le nofoaga, ae seiloga e mavae le fa tausaga faatoa saunia lea o Iosefa e maua.
Potu i le fogafale i luga i le Fale a o Talavou Iosefa.
I lena vaitaimi, na me’i atu ai Iosefa i Penisilevania e faaalu se taimi e faigaluega ai mo se tamalii na igoa ia Josiah Stowell. A o i ai iina, sa feiloai ai o ia ma faaipoipo ia Ema Hale Samita . Ina ua uma ona faaipoipo, sa faatagaina Iosefa e maua mai faamaumauga mai le agelu o Moronae. Sa malaga atu o ia i le Mauga o Kumora e aumai ma amata ai le galuega o le faaliliuga. Sa faalogo se faiaoga na igoa ia Oliva Kaotui e uiga i le galuega faatino ma malaga atu ai e feiloai ia Iosefa Samita ma le faamoemoe e avea ma tusiupu a Iosefa. Sa talitonu o ia i le galuega sa faia e Iosefa, ma sa avea Oliva ma se tusiupu mo Iosefa a o ia faaliliuina le Tusi a Mamona . Sa faaauau e le toalua lea ona faaliliu i le fale o Iosefa ma Ema i Haramoni, Penisilevania. O le vaitaimi foi lea na faaali mai ai ni isi avefeau faalelagi ma toefuatai mai le perisitua, o le mana ma le pule a le Atua, i le lalolagi. Ona papatisoina lea e Iosefa ma Oliva le tasi ma le isi i le Vaitafe o Susquehanna .
O le Fale o Iosefa ma Ema Samita i le Nofoaga o le Toefuataiga o le Perisitua.
A o salalau atu le tala e uiga i lenei ‘tusi paia auro’ sa amata ona fetaiai Iosefa ma sauaga o lea na faatuai ai le galuega o le faaliliuga. Sa tonu ia Iosefa ma Oliva e siitia atu le galuega o le faaliliuga i Feiete, Niu Ioka i le Faatoaga a Uitimera . Sa talitonu le aiga o Uitimera sa toefutaiina e Iosefa le talalelei a Iesu Keriso ma ofoina atu ai la latou fesoasoani. I le Faatoaga a Uitimera, sa mafai ai e Iosefa ma Oliva ona faamae’a le faaliliuga o le Tusi a Mamona.
Tagata faatino o loo faaalia le faaliliuga o le Tusi a Mamona.
Ona sailia lea e Iosefa se tasi e lolomia le tusi. Sa maua se tagata lomitusi naunau e igoa ia Egbert B. Grandin i Palmyra, NY. Sa malie Grandin e faatulaga, lolomi ma faapipii ni kopi e 5,000 o le Tusi a Mamona. Faatasi ai ma le lagolago i tulaga o mea tautupe mai le mokesiina e Matini Harisi o lana faatoaga , na avea ai le Tusi a Mamona ma se mea moni ma sa muai faalauiloaina mo le faatau atu i le faleoloa a Grandin .
Tagata faatino o loo faaalia le lolomiga o le Tusi a Mamona.
A o salalau atu le Tusi a Mamona, e toatele tagata sa fia iloaina aoaoga o le talalelei toefuataiina. I le aso 6 o Aperila, 1830, e tusa ma le limasefulu tagata na faapotopoto i le fale ogalaau o le au Uitimera, ma sa faavaeina aloaia ai le Ekalesia toefuataiina a Iesu Keriso.
O se fale ogalaau na toefauina i le Faatoaga a Uitimera.
I le asō, o nofoaga sa tutupu ai nei mea faasolopito ua faasaosaoina. E talia tagata asiasi e oo atu i nei nofoaga ma aoao ai i le tino po o le initoneti e uiga i mea na tutupu iina O nofoaga faasolopito i Niu Ioka ma Penisilevania o loo faamatala ai se tala o le faatuatua, finafinau, ma le faamoemoe. O nei nofoaga e mafai ona musuia ai tagata e aoao atili e uiga i Le Ekalesia a Iesu Keriso o le Au Paia o Aso e Gata Ai ma faamalosia lo latou faatuatua ia Iesu Keriso.