Fale o Iosefa Samita a o Talavou

Sa nofo Iosefa Samita i lenei fale mo le lima tausaga a o talavou o ia. O le tele o uluai mea na tutupu i le Toefuataiga na tutupu iinei. I lenei fale, sa aoao ai Iosefa Samita e galue, faitau tusitusiga paia, ma tatalo mai faataitaiga a ona matua. O le taimi lea sa nofo ai iinei na muai mafaufau ai Iosefa Samita e uiga i le tulaga o lona agaga ma po o le fea ekalesia e tatau ona ia auai ai. O iinei, a o faitauina tusitusiga paia, sa filimaoti ai o ia e faia le tatalo lea na taitai atu ai i lana Uluai Faaaliga. O le fale foi lea na asiasi mai ai le agelu o Moronae ia Iosefa Samita i le potu i le fogafale i luga ma tuu atu ia te ia faatonuga i le mea e maua ai papatusi o loo i ai le Tusi a Mamona.

I le taumalulu o le 1818–19, na siitia atu ai le aiga o Samita i totonu o lenei tamai fale ogalaau i le faatausiusiuga o le latou faatoaga fou. E ui lava e le o toe i ai le uluai fale ogalaau, ae na iloa mai e suesuega i le eleele lona tulaga, ma le 2,000 o faatufugaga moni na faia i le taimi na nonofo ai le aiga o Samita iina. O le faaaogaina o metotia, anomea, ma meafaigaluega lava e tasi sa faaaogaina i le fausiaina o le uluai fale, ua tu ai nei se faaataataga moni o le fale ogalaau i le nofoaga muamua.

O le uso matua o Iosefa Samita, o Alevini, sa faapitoa lava lona fiafia i mea na aoaoina e Iosefa mai asiasiga a Moronae. A o le’i maliu Alevini, sa ia fai atu ia Iosefa, “Ou te manao ia avea oe ma se tama lelei, ma fai mea uma e te mafaia e maua ai le Faamaumauga. Ia faamaoni i le mauaina o faatonuga, ma le tausiga o poloaiga uma ua tuuina atu ia te oe” [i le Lucy Mack Smith, History of Joseph Smith, 87]. Na maliu Alevini i le aso 19 o Novema, 1823, i le na o le lua masina talu ona mavae le asiasiga muamua a Moronae ia Iosefa Samita. Na maua e Iosefa le talafaamaumau mai ia Moronae i le Mauga o Kumora i le 1827.

Faitau atili e uiga i mea na tutupu i le Fale o Iosefa Samita a o Talavou i le Au Paia, Voluma 1, Mataupu 3

O Mea e Faamoemoe i ai

O le Fale o Iosefa Samita a o Talavou (po o le Faleogalaau o le Aiga) o se vaega o le maimoaga taamilo taialaina e tuuina atu e faifeautalai o fale i le Faatoaga a le Aiga o Samita. E amata maimoaga i le Sacred Grove Welcome Center.

360° Faasologa