Mauga o Kumora

O mea na tutupu i le Mauga o Kumora sa faavae i le faatuina o Le Ekalesia a Iesu Keriso o le Au Paia o Aso e Gata Ai. I le faatonuina ai e le agelu o Moronae, na maua ai e Iosefa Samita papatusi auro na teuina i le mauga i le aso 22 o Setema, 1823. Ona feiloai lea o Iosefa i le agelu iina i le aso lava lea e tasi mo le isi tolu tausaga seia oo ina faatagaina o ia e aumai papatusi i le aso 22 o Setema, 1827. Mai na papatusi, na faaliliuina ai e Iosefa Samita le Tusi a Mamona e ala i le meaalofa ma le mana o le Atua. O le nofoaga e aofia ai auala savalieseese, le Maafaamanatu o le Agelu o Moronae, ma se nofoaga autu mo tagata asiasi.

E ui lava ua lauiloa o le Mauga o Kumora, ae e le’i faaaogaina lenei igoa i se taimi ina ua mavae mea taua na tutupu i le 1823–1827. I le afa mulimuli o le seneturi lona sefuluiva, o le toatele o tagata i aai o Wayne ma Ontario na ta‘ua o le “Gold Bible Hill” ma le “Mormon Hill.” Ae peitai, o le toatele o uluai tagata o le Ekalesia, e aofia ai nisi o uo mamae ma tagata o le aiga o Iosefa Samita, na ta‘ua le mauga o “Kumora” i taimi eseese i le soifuaga o Iosefa Samita. E foliga mai ona o Moronae, le tusitala mulimuli o le Tusi a Mamona ma le agelu na feiloai ma Iosefa Samita, na tusia o le a ia “natia le talafaamaumau i le eleele” pe a uma ona ia faaopoopoina ni nai ana lava upu (tagai i le Mamona 8:4, 14). Talu ai o lenei fuaitau e mulimuli i le tala a Moronae e uiga i le taua tele mulimuli i le va o sa Nifaē ma sa Lamanā, lea na tupu i se mauga e ta‘ua o Kumora, o lea na manatu ai le toatele na tanumia e Moronae papatusi i le mauga lava lea e tasi (tagai i le Mamona 8:2-4) ma o iina na maua mulimuli ane ai e Iosefa le talafaamaumau. O se tasi o tusi mulimuli ane a Iosefa Samita e faatatau foi i le “tala fiafia mai Kumora” ma le asiasiga a “Moronae, o se agelu mai le lagi” (Mataupu Faavae ma Feagaiga 128:20). E ui o le Ekalesia “e le o i ai se tulaga i nofoaga patino faafaafanua o mea na tutupu i le Tusi a Mamona i Amerika anamua,” ae o faamaumauga na tausia e Iosefa Samita ma tagata na soifua ai, ua faamanino mai ai o lenei mauga o le nofoaga lea na feiloai ai Iosefa Samita ma Moronae ma lea na maua ai e Iosefa papatusi o loo i ai le Tusi a Mamona (tagai i le Gospel Topics: Book of Mormon Geography).