Maafaamanatu o le Agelu o Moronae

Na toetoe lava o le taimi na faatauina mai ai e le Ekalesia le Mauga o Kumora i le 1928, sa amata ai e le vane faatagata o Torleif Knaphus ona vaai faalemafaufau i se maafaamanatu tele o le a tulai o se molimau i mea na tutupu iina i le silia ma le 100 na muamua atu. O le taunuuga o le galuega o faatufugaga o loo tulai e silia i le 30 futu (10 m) le umi. O se faatusa o le agelu o Moronae o loo tilotilo atu i le lalolagi ao ia faasino a’e i le lagi i lona lima taumatau ma uu le faamaumauga anamua ua tusitusia i papatusi auro i lona lima agavale. O loo tu o ia i le tumutumu o se pou maualuga faatasi ma ave o le malamalama na vaneina i ona foliga. I le faavae i itu e tolu o loo faaalia ai i le apamemea mea na tutupu na fesootai ma papatusi auro. I le itu i matu o loo i ai upu apoapoai a Moronae ina ia faitau le Tusi a Mamona ma fesili atu i le Atua pe moni upu o loo i ai.

Sa faaalu e Knaphus le siila ma le lima tausaga e mamanu ai le maafaamanatu ma vaaia lona fauina. Sa ia molimau atu i aiga ma uo vavalalata e faapea, sa o se aafiaga faaleagaga moni lava. Sa ia lagona le faatasi ai o agelu ia te ia a o galue ai i le vaneina o le agelu o Moronae. E le pei o isi faaaliaga o lenei avefeau faalelagi, sa manao Knaphus e faaalia se taitai fitafita malosi ma ni foliga mamalu ma faapaiaina. Sa ia filifilia Elwin Clark, o se alii fola piliki i le Aai o Sate Leki, e fai ma ana tagata faataitai mo ogalima ma le tino. O le tamā o Elwin o Don Carlos sa avea ma tagata faataitai mo foliga o le agelu. Sa talitonu nei alii uma, o le faatusa na taunuu i ai sa o se taunuuga o le fesoasoaniga faalelagi.

Sa faapaia e Peresitene Heber J. Grant le maafaamanatu i le aso 21 o Iulai, 1935.

O Mea e Faamoemoe i ai

O auala savali e tolu e tatai mai le Nofoaga Autu mo Tagata Asiasi i le Mauga o Kumora i le Maafaamanatu o le Agelu o Moronae i le tumutumu o le Mauga o Kumora. O loo i ai ni faasitepu faataamilo i le maafaamanatu. O malo e i ai ni faafitauli tau i le feoaiga e mafai ona talosaga e ave atu i luga o le mauga i se pasi.