O Se Talafaasolopito Puupuu o Le Ekalesia a Iesu Keriso o le Au Paia o Aso e Gata Ai

O Tagata o Le Ekalesia a Iesu Keriso o le Au Paia o Aso e Gata Ai o ni molimau ua faaauau ai le talafaasolopito paia. Matou te talitonu o le talafaasolopito atoa, ua faamanuiaina ai e le Atua ia tagata i musumusuga ina ia i ai upumoni paia i talatuu e tele faalelotu ma faalefilosofia. Matou te faaaloalogia tala paia a isi vaega. O le faapogai o lo matou faatuatuaga e āu i tua i taimi na tusia ai le Tusi Paia. Matou te vaavaai atu ia Iesu Keriso o lo matou Faaola ma le taulaiga tutotonu o le talafaasolopito o le tagata. Matou te talitonu foi e valaauina e le Atua ia perofeta, ofoina mai le taitaiga, faatino vavega, ma valaaulia tagata e auai i Lana galuega i le taimi nei.

O lo matou talafaasolopito i ona po nei e amata i le amataga o le vaitaimi o le 1800, ina ua ole atu se tama faifaatoaga sa faigaluega leipa i aso taitasi, e igoa ia Iosefa Samita i le Atua mo se taitaiga ma sa valaauina ai o se perofeta. Faapei o uluai soo o Iesu Keriso, sa faaigoaina e Iosefa ma isi tagata talitonu i latou lava o le Au Paia. Ua tauaveina e le Au Paia o Aso e Gata Ai lenei faasinomaga o soo o Iesu Keriso, ma ua faamanuiaina e ala i faaaliga i ona po nei.

Na soifua mai Iosefa Samita i i le 1805. A o laitiiti o ia, o faafitauli tau i le siosiomaga sa o ese ai lona aiga ma le toatele o isi faifaatoaga tauivi mai o latou aiga i matusasae o le Iunaite Setete. Sa masii atu le Au Samita i Palamaira, Niu Ioka, o se nofoaga sa tele ina faia ai e faifeau ni fonotaga taumatimati faaleagaga ma fai ai tauvaga mo ni tagata liliu. I le avea ai o se alii talavou, sa mafaufau loloto ai Iosefa i le lalolagi na siomia ai o ia, ma e uiga i fesili faaleagaga, ae peitai o feupua’iga i le va o ekalesia eseese na tuua ai o ia ma le le mautonu. Sa lei mautinoa e ia pe o le a le mea e fai seia oo ina ia maua se taitaiga faigofie i le Tusi Paia: “Afai ua leai se poto i so outou, i na ole atu ia i le Atua.” (Iakopo 1:5)

I le 1820, i le faatinoina ai o lena faatonuga, na alu ai Iosefa i le togavao e lata ane i lona fale e tatalo ai mo ni tali. A o tatalo o ia, na faaali ane le Atua le Tama ma Iesu Keriso ia te ia. Sa Laua ta’u atu ia te ia e aua nei auai i se ekalesia o loo i ai, ae sa folafola atu o loo i ai sa Laua galuega mo ia lea o le a toe aumaia ai le mana o le uluai ekalesia a Keriso.

Tolu tausaga mulimuli ane, na amata ai le galuega. Na faaali atu se agelu e igoa ia Moronae ia Iosefa Samita, ma ta’u atu e uiga i se talafaamaumau na leiloa o loo i ai le talafaasolopito paia o se malo o Amerika anamua. O lenei talafaamaumau, o le Tusi a Mamona, o se tasi molimau ia Iesu Keriso. I le 1827, na tuuina atu ai e le avefeau agelu ia Iosefa papatusi apa ua vaneina. Na faaliliuina e Iosefa [ia papatusi] e ala i le mana o le Atua. Na tusitusi i lalo e Ema Hale Samita, Oliva Kaotui, Matini Harisi, Tavita Uitimera, ma isi ia upu a o faaliliu e Iosefa. Na latou molimauina e faapea, o le faaliliuga o se mea faavavega na tupu, e le pei o se isi lava faagasologa tusitusi masani.

A o galulue ai i le faaliliuga, sa tatalo ai foi Iosefa ma Oliva Kaotui e uiga i le natura o le ekalesia anamua a Iesu Keriso. Na asiasi atu isi agelu ia i la’ua e toefuatai mai le pule o le perisitua na leiloa. I le aso 6 o Aperila, 1830, sa latou faaaogaina lenei pule e faatulaga ai Le Ekalesia a Iesu Keriso o le Au Paia o Aso e Gata Ai. Na faatuina se lala fou o le faaKerisiano.

Sa vave ona faatupulaia le Ekalesia. I tagata talitonu, sa tele mea na tutupu nai lo le faavaeina o se isi ekalesia: sa ‘apo mai [e le Atua] ia Isaraelu faatapeapeina , ma faataunuuina feagaiga ua loa ona fai. Sa tele ina tuua e tagata liliu anamua o latou fale ma fausia aai, malumalu ma se ala e ola ai faatasi. O le tele o le Au Paia na faatinoina matafaioi faalelotu, tausia faaletino ma faaleagaga mo i latou sa siomiaina i latou. Sa fauina e le Au Paia lo latou uluai malumalu i Katelani, Ohaio. Mo i latou, sa o se nofoaga e faamamaluina ai Iesu Keriso ma maua ai le malosi faaleagaga. Sa latou amata fauina foi se aai na ta’ua o Siona i Misuri, i le tuaoi i sisifo i lena taimi o le Iunaite Setete. Sa talia e le Au Paia i suiga. Sa latou talia manatu fou. Sa latou talileleia tagata fou. I le popofou o le 1840, a o taunuu le toatele o tagata liliu mai mai Peretania, na avea le nuu o le Au Paia i Navu, Ilinoi, ma se tasi o nuu aupito tele i le itulagi.

Na folasia atu e Iosefa Samita le tele o aoaoga fou ia na maua e ala mai faaaliga mai le Atua. Na ia aoao atu faapea, o tagata soifua e i ai se natura paia ma gafatia. Na ia aoao atu faapea, o soo o Iesu e mafai ona saunia mo Lona toe foi mai e ala i le atinaeina o se saosaiete faamaoni ma le amiotonu i le Lalolagi. Na ia tuuina atu le taitaiga patino, e pei o le taiala e aloese mai tapaa ma le ‘avamalosi. Na ia aoao atu faapea o le lagi e faatatau i sootaga. Na ia faamatalaina le ala e mafai ai ona tumau sootaga faaleaiga i talaatu o le oti.

Faapei o uluai tagata talitonu i isi lotu, sa feagai foi le Au Paia ma sauaga. Sa tatoso e tagata faatupu faalavelave le Au Paia mai o latou fale ma sasa i latou, osofa’ia faleoloa o le Au Paia, ma fao faamalosi o latou fanua. I le 1838, na tuu atu ai se poloaiga

Leaving Church Domain

You are about to leave our site. The new site has its own terms of use and privacy policy that differ from ChurchofJesusChrist.org

Faagasolo Faaleaoga

e le kovana o Misuri, e fasiotia i latou pe tutuliese uma. Sa sosola le Au Paia ma toe atiae i Ilinoi. I le 1844, sa fasiotia ai e se au faatupu faalavelave iina ia Iosefa Samita ma lona uso o Ailama.

Na tuua le Au Paia e sauaga ma se tautinoga malosi i le saolotoga faalelotu. Na faamautu se tulafono o le aai o Navu le saolotoga mo tagata uma ma talileleia vaega e pei o Musalemi ma Katoliko o e na feagai ma le faailogalanu i Amerika i le 1840. Na saofaga foi sauaga i le aganuu maumaututu a le Au Paia. I le mavae ai o to’atugā taitasi, sa latou fesoasoani i le tasi ma le isi e toe amata. O lenei aganuu na faataitaiina i le 1846, ina ua faatulaga e le sui o Iosefa Samita, o Polika Iaga, se femalaga’iga tele e sosola ese ai mai sauaga faifai pea. Sa sopoia e le Au Paia le konetineta ma faamautu i le itulagi matutu i sisifo o Mauga Papa.

I luga o le ala, sa latou faatutu ai nofoaga e mapu ai i le ala e mulimuli atu ai isi. Sa tuuto Polika Iaga e fesoasoani i malaga a le au matitiva. Sa ia vaaia o le faaaofia ai o e matitiva o se tiute faaleagaga. E faapei o le malaga umi faaletusi paia, na avea lenei malaga a paionia o se aafiaga iloga e manatua pea e le Au Paia o Aso e Gata Ai.

Na asiasi le uluai Au Paia o Aso e Gata Ai i konetineta uma na nofoia. Na vaai tagata liliu mai ia i latou lava o se nuu o le feagaiga. Na fesoasoani faalapotopotoga a le Ekalesia i le toatele e malaga mai i Iutā. O iina, na faatulaga ai e taitai o le Ekalesia tapuaiga ma faafailele le olaga faalenuu. Na iloa e le Au Paia le aoga faaleagaga i taumafaiga e pei o faiga faatasi o alavai e fui ai faatoaga ma le tamaoaiga. Sa latou tusia ni viiga fou ma amata agaifanua fou. Sa latou faavaeina faatasi se aganuu fou soofaatasi faalelotu.

Sa mafai ona saofagā tagata uma. O faalapotopotoga a le Ekalesia e pei o le Aualofa mo tamaitai, o le Faalapotopotoga o le Faaleleia Moni mo tagata talavou, o le Peraimeri mo tamaiti, ma le Aoga Sa mo tagata uma, sa fesoasoani e tuufaatasia ma faaleleia atili le Au Paia. I malumalu, o le uluai Au Paia sa faatinoina sauniga faalelotu e mafai ona tuufaatasia ai aiga mo le faavavau. O nisi agaifanua faapaionia sa faatapulaa e oo mai i lena taimi. Mai le vaitau o le 1840 i le 1880, sa uuna’ia ai e taitai tele o faaipoipoga po o autaunonofo, lea na faasagatau i faiga masani a Amerika ma Europa. O augatupulaga e lua o faaipoipoga autaunonofo ma le olaga faaleaiga na faamalosia ai le lagona o le Au Paia i se faasinomaga iloga. I le vaitaimi o le tuaoi, sa fatuina foi e aiga autaunonofo se sootaga malosi o faiā sa fesootai ai nuu paionia.

E talitonu le Au Paia o Aso e Gata Ai o loo faaauau pea faaaliga. E faavavau le Atua, ae e sui taimi. O a tatou tapenaga ia maua se malamalamaaga e agai i luma. E galue le Atua i ana fanau i lea laasaga ma lea laasaga. I lalo o faatonuga faaperofeta, na talia ai e le Au Paia suiga tetele i le faaiuga o le 1800 ma i le 1900.

I le 1890, na maua ai e Uilifoti Uitilafi se faaaliga na mafua ai le faamutaina o le faiga o faaipoipoga autaunonofo i totonu o le Ekalesia. Na Ia faaalia foi le ala e mafai ai e le Au Paia ona fesoasoani e faafesootai faatasi le aiga o tagata e ala i le faalautele o faamauga i le malumalu mo augatupulaga ua mavae. Sa faavaeina e le Ekalesia se sosaiete o gafa lea na lauiloa i le lalolagi atoa i lana matata. Sa galulue isi perofeta e faamalolosia le tautinoga a le Au Paia i le tulafono faatusi paia o le sefuluai ma le Upu o le Poto e fautuaina ai e tetee i le tapaa, ava malosi, kofe, ma le lauti. I le 1918, i le faaiuga o le Taua Muamua a le Lalolagi ma le taimi o se faama’i oti, sa tusi faamaumauina ai e Iosefa F. Samita se faaaliga mautinoa e uiga i le lalolagi o agaga. Na ia vaaia tagata o aoao atu ma aoaoina e uiga i le talalelei i le mavae ai o le oti, ma fesoasoani le tasi i le isi ia alualu i luma faaleagaga.

I le popofou o le 1900, sa talia ai e le Au Paia o Aso e Gata Ai auala fou e tapuai ai, fegalegaleai, ma faatulaga. O faapotopotoga na ta’ua o uarota ma paranesi sa avea ma totonugalemu o le olaga i le Ekalesia. Faatasi ai ma lena suiga, na mafai ai e le Au Paia o Aso e Gata Ai ona lauolaola i nofoaga sa toaitiiti ai. Na tele atu tagata liliu mai na nonofo i o latou lava atunuu. Na tele atu tagata o le Ekalesia na o ese mai Iutā. Na avea tagata o le ekalesia i Kalefonia, Mekisiko, Siamani, Atenitina, Pasila, ma isi nofoaga ma paionia o se faatuatuaga ua faateleina i le lalolagi atoa.

Nai lo le vaavaai mo faifeau totogi, sa talia e tagata o le ekalesia tofiga na ta’ua o valaauga. Faatasi ai ma lea faiga o tiutetauave fesuisuia’i, e tofu lava le tagata ma se matafaioi. Sa sili ona faigofie le soosootau’au o tagata fou. E le gata i maota tapuai, sa amata e le Au Paia ona fausia malumalu i le salafa o le lalolagi. I maota tapua’i sa latou tauaofia ai e tapua’i, a’oa’o ma auauna atu. I totonu o malumalu, sa mafai ona latou la’a ese mai faalavefau o le lalolagi, toe faamautinoa la latou tautinoga i le Atua e ala i feagaiga paia, ma fesoota’i aiga i augatupulaga.

O malumalu e faamanatu ai i le Au Paia e mafai ona faavavau sootaga e ala ia Iesu Keriso.

O le atina’e mai se faatuatuaga sa faaogatotonu i Iutā i se faatuatuaga i le lalolagi atoa e moomia ai suiga faifaipea. I le fiasefulu tausaga i le mavae ai o le Taua Lona Lua a le Lalolagi, sa faalauteleina le galuega faafaifeautalai. Sa galue foi le Ekalesia ia atili mautali atu i manaoga eseese i le lalolagi atoa. Sa faaaoga e taitai o le Ekalesia i le vaitau o le 1860 se faiga o le tapu o Au Paia Uli o Aso e Gata Ai mai le faauuina i le perisitua ma le tele o tapuaiga i malumalu. Sa olioli le Au Paia i le 1978 ina ua aveesea lena tapue ala mai i se faaaliga ia Peresitene Spencer W. Kimball. I le lalolagi atoa, sa galulue faatasi le Au Paia mai lanu, ituaiga, ma talaaga faaleatunuu eseese e auauna atu i fanau a le Atua.

E oo atu i le amataga o le seneturi 21, sa mautu le faavaeina o le Au Paia o Aso e Gata Ai ua avea o se faatuatuaga i le lalolagi atoa. I le mavae ai o le 1997, o le toatele o tagata o le ekalesia sa nonofo i fafo atu o le Iunaite Setete. I le 2004, na avea ai Mekisiko ma atunuu lona lua ua tasi le miliona le Au Paia. I le 2007, na avea ai Pasila ma le lona tolu. O le televave o le tuputupua’e i le Temokarasi Ripapelika o Congo ma isi malo o Aferika, na atili faalauteleina ai le atu Filipaina, ma Ausetalia le Ekalesia i talaatu o ona uluai nofoaga tutotonu i Amerika ma le Pasefika. O lena tuputupua’e na fua mai ai fua faaleagaga. A o fesootai le tasi ma le isi i le galuega faafaifeautalai, femalagaiga, ma vaega faasalalau e fesoasoani i le Au Paia, sa faatupulaia lo latou alolofa ma le faatuatua. Sa faaleleia atili lo latou vaai i le tasi ma le isi o fanau a le Atua.

O fea lava latou te nonofo ai, e galulue le Au Paia o Aso e Gata Ai ia avea ma tagata lelei o le ekalesia o o latou nuu. E latou te taumafai e ola mamalu ma feauaunaa’i. O le utuvai mai i lo tatou talafaasolopito e fesoasoani i le Au Paia o Aso e Gata e taulima ai faafitauli lavelave. O le mafaufau i la tatou lava faigamalaga, tatou te galulue e fesoasoani i le au sulufai ma e faimalaga mai. O le Au Paia o Aso e Gata Ai e tele ina tele atu lo latou aafiaga e tali atu pe a mavae faalavelave faalenatura. Faatasi ai ma le mana faaleagaga ma le vaaiga mai le tapuai i le malumalu, e faamalolosia e le Au Paia o Aso e Gata Ai aiga ma faafailele sootaga o le talitonuina ma le tausiga faamaoni. Tatou te galulue e faafetaia’i luitau faatupulaia o le tuuatoatasi ma le faaesea.

E tofotofoina e le taimi faatuatuaga uma. E ui lava o seneturi e lua talu mai le faatulagaga o le Ekalesia ua na o se vaega puupuu o le talafaasolopito o le tagata, ae ua faataunuuina ma ni suiga.
A o agai atu le Ekalesia i lona seneturi lona tolu, tatou te manatua luitau i se lalolagi o loo tauivi ai le toatele e vaai i le aao o le Atua i o latou olaga. I le Feagaiga Fou, na fesili ai Iesu, “Pe a afio mai le Atalii o le tagata, e iloga ea e maua e ia le faatuatua i le lalolagi?” (Luka 18:8) I le avea ai o se nuu, e tumau lo tatou naunautai e talileleia Iesu i le Lalolagi, po o le a lava le taimi e afio mai ai o Ia, ma le sagisagi fiafia. E tatou te ofoina atu lo tatou talafaasolopito e fai ma molimau ola ia Iesu Keriso i nei aso e gata ai.