I le 1831, na amata ai ona masii atu le Au Paia o Aso e Gata Ai i Misuri. I le isi valu tausaga na sosoo ai, sa latou mulimuli i faaaliga faalelagi e faavae ai se nuu o tagata talitonu na mamanuina i le aai anamua o Enoka. A o latou galulue, sa latou feagai ma sauaga mai o latou tuaoi. O sauaga mai fafo ma le fevaevaeai mai totonu o le Ekalesia na faamalosia ai tagata e o ese mai lea itumalo i lea itumalo ma toe amata ai. Mulimuli ane, sa faatonuina e le kovana le Au Paia uma e tuua Misuri. Ona o lenei tutulieseina, e laiti lava fale, faatoaga, ma pisinisi na latou faavaeina o loo tutu pea i aso nei. Ae o le faagasologa faamamaina o le talitonu e ui lava i mea faafeagai na oo mai ai le faatuatua loloto ia Iesu Keriso ma na faaosofia ai faaaliga faaopoopo e uiga i le faatuina o Siona i o tatou aso.

E amata atu i le seneturi e luasefulu, ua fatuina ai e le Ekalesia ni faaaliga ma maafaamanatu i Initipene, Sisifo Mamao, Atamu-onai-Amani, Richmond, ma Liperate. O isi ua faipaaga ma le Ekalesia e fatufatu ni maafaamanatu ma faailoga tuugamau i isi nofoaga. Faatasi ai, o nei nofoaga faasolopito ua tuuina mai ai faamaoniga o le faatuatua, lototele, ma le ositaulaga na faaalia e uluai Au Paia o Aso e Gata Ai i le ola ai i le talalelei a Iesu Keriso. O tagata asiasi mai i nei nofoaga paia e mafai ona aoao atili i tala o le faatuatua, faapalepale, ma le faamoemoe lea e tumau le totonugalemu i le talafaasolopito o le Ekalesia a Iesu Keriso o le Au Paia o Aso e Gata Ai.