Faatomuaga i Nofoaga Faasolopito o Misuri

Mai le 1831 e oo i le 1838, sa avea ai Ohaio matuisasae i le Iunaite Setete ma laumua o Le Ekalesia a Iesu Keriso o le Au Paia o Aso e Gata Ai. I le taimi lava lea e tasi, na mulimuli ai tagata o le Ekalesia i le poloaiga a le Alii ma faapotopoto e fausia le laueleele o Siona i le toeitiiti 800 maila le mamao i Misuri. O mea na tutupu na taitai atu ai i le pue faapagotaina o Iosefa Samita ma isi taitai o le Ekalesia na faamalosia ai le Au Paia o Aso e Gata Ai e tuua o latou fale i Misuri. Ae, e oo lava i nei faigata uma, o upumoni na faaalia mai e le Atua iinei o loo faaauau pea ona faamanuiaina ai olaga o tagata o le Ekalesia i aso nei.

Ia Oketopa 1830, na taitaia ai e Oliva Kaotui ma Pale P. Palate se vaega toalaiti o faifeautalai mai le Fale o Uitimera i Feiete, Niu Ioka. O la latou misiona sa mo le nofoaga o Initia Amerika

Leaving Church Domain

You are about to leave our site. The new site has its own terms of use and privacy policy that differ from ChurchofJesusChrist.org

Faagasolo Faaleaoga

i le Teritori o Kansas, i le isi itu o le Vaitafe o Misuri mai le Itumalo o Siakisone, Misuri. Sa malaga faifeautalai i le silia ma le 1,000 maila ma taunuu atu i le lauelele e galulue ai ia Ianuari 1831. Sa taofia e taitai o le malo ia faifeautalai mai le talaiga i le itu i sisifo o le vaitafe, o lea na toe foi atu ai faifeautalai i Initipene e faatalitali ai nisi faatonuga.

Na oo mai Iosefa Samita i Initipene i le taumafanafana o le 1831. A o i ai iina, sa poloaiina o ia e le Alii e amata ona fausia se aai fou lea e mafai ona faapotopoto ai Lona nuu ma le mea o le a tu ai Lona malumalu. O le fuafuaga faaalia mo le aai o Siona, e latalata i Initipene, Misuri, sa avea o se mamanu paia lea na taialaina ai taumafaiga o le fausiaina o aai i le lumanai i Au Paia o Aso e Gata Ai.

E faitau afe Au Paia o Aso e Gata Ai na tuua o latou fale i Niu Ioka ma Ohaio ma malaga atu i taavale solofanua ma vaavaitafe i le aai fou o Siona i le Itumalo o Siakisone, Misuri. O le gasolosolo tele mai o tagata na faateleina ai le le toamalie ma le ita o o latou tuaoi i Initipene. O nei tagata fou sa le pei o i latou i le tele o itu, ma sa popole tagata tuai o le a le pine ae latou faia ni suiga faapolokiki ma faaletamaoaiga.

Na oo mai le tetele o feeseeseaiga ia Iulai 1833. Sa potopoto se au faatupu faalavelave i le lotoa o le taulaga i Initipene ma poloaiina ia tuua e le Au Paia o Aso e Gata Ai le Itumalo o Siakisone i le tautotogo na sosoo ai. I lea taimi, sa valitaina ma faafulumanu e le au faatupu faalavelave ia Epikopo Eteuati Paterika ma Charles Allen o se togafiti taufaafefe.

I le le fefefe ai, sa saili ai e taitai o le Ekalesia le toe totogi mai e ala i le faafaigaluegaina o loia e iloilo o latou tulaga. Ina ua iloa e o latou tuaoi lenei mea, sa latou toe faatulagaina se au faatupu faalavelave ma faamalosia tagata o le Ekalesia e sosola ese mai o latou fale i le Itumalo o Siakisone. E oo atu ia Novema 1833, ua sulufai uma i le isi itu o le Vaitafe o Misuri i le Itumalo o Clay.

Ina ua iloa e Iosefa Samita sauaga na tutupu i le Itumalo o Siakisone, sa ia saili atu i le taitaiga a le Alii. Sa ia fesootai atu foi i le kovana o le setete o Misuri, o Daniel Dunklin. O le tali mai a le kovana na tuuina atu ai le lagolago i le Au Paia. O lea, na faatulagaina ai e Iosefa ma isi taitai o le Ekalesia i Ohaio se savali pe tusa ma le lua selau alii faaauupegaina. O le a latou auai faatasi ma le vaegaau tumau a le kovana e faamalosia le tulafono ma faataga aiga e toe foi atu i o latou fale. Sa o ese atu le vaega i le tautotogo o le 1834, ma ta’ua i latou lava o le Tolauapiga a Isaraelu, po o le Tolauapiga a Siona.

A o latalata atu le tolauapiga i le Vaitafe o Fishing i le Itumalo o Clay, sa faateleina le popole o le kovana o Misuri e uiga i lo latou taunuu atu. Sa fefe o ia nei le lagolagoina e alii o le Itumalo o Siakisone lana pule, ma o le a i ai se taua tele. Sa faapea ona ia auina atu le tala o le a le maua e le Tolauapiga a Siona se lagolago aloaia, ma avea ai o se solitulafono le savali. Sa toe sailia e Iosefa Samita le taitaiga a le Alii, ma sa ia maua se poloaiga e faataape le vaega.

Mo le toeitiiti lua tausaga, sa nonofo ai le Au Paia o Aso e Gata Ai i Misuri o ni tagata sulufai. Sa latou sailia ni galuega i le mea latou te mafaia ma faamoemoe i taumafaiga e faasa’o tulaga le tonu faaletulafono. Mulimuli ane, na pasia e le fono faitulafono a le Setete se faaiuga e fatu se nofoaga mo le Au Paia o Aso e Gata Ai e faamautu ai. Na faapolopolo e le Itumalo fou o Caldwell le fanua e nofoia e le Au Paia o Aso e Gata Ai.

Na amata i le 1836, ona faapotopoto atu le Au Paia i le Itumalo o Caldwell. Sa latou faatuina se aai fou na mamanuina i le aai o Siona, e igoa ia Sisifo Mamao. Na siitia atu e Iosefa Samita lona aiga i Sisifo Mamao i le Tautotogo o le 1838. I le nofo ai o le Perofeta iina, na avea ai le aai ma se nofoaga o faaaliga. Ia Iulai, na suatia ai e le Ekalesia le eleele mo se malumalu i le totonugalemu o le aai. E oo atu i le taimi lena, ua faatupulaia le faitau aofai o le Itumalo o Caldwell i le faitau afe. Na maua e Iosefa se faaaliga na valaaulia ai le toatele o le Au Paia e siitia atu mai Ohaio i Misuri.

I lena taumafanafana, na toe foi mai ai Heber C. Kimball ma Orson Hyde, o ni uso se toalua o le Korama a Aposetolo e Toasefululua, mai Peretania Tele ma aumaia se tala fou o le manuia faafaifeautalai iina. Na poloaiina e le Alii le Toasefululua e toe foi atu i Motu o Peretania ma fesoasoani i tagata faatoa liliu mai e faapotopoto atu i Siona i Amerika.

I le mafaufau ai i le taunuu mai o le toatele o tagata fou liliu mai, sa vaavaai atu ai taitai o le Ekalesia mo nisi nofoaga e nofoia. Ia Iulai, sa latou faavaeina ai se aai ma faatulaga se isi siteki i le Mauga o Spring i le Itumalo o Daviess, lea na toe faaigoaina e le Alii ia Atamu-onai-Amani. O le taimi lea, na tauleleia ai le Au Paia e e umia fanua e latalata i Dewitt, i le Itumalo o Carroll. Na ofoina atu e e umia fanua ia fanua i lo latou taulaga i Au Paia o Aso e Gata Ai o e sa manaomia se mea e o i ai mai le Itumalo o Daviess. E toatele aiga na taliaina ma le naunautai le ofo.

O le tuputupu ae o le Ekalesia i le eria sa le fiafia ai nisi o le lotoifale ma e e umia fanua. O le fefefe ma le faailoga tagata sa i ai mai le tele o tausaga na muamua atu na toe alia’e mai a o taunuu mai le toatele o Au Paia o Aso e Gata Ai. Na iu lava ina tupu le tauaimisa i le Itumalo o Daviess i le aso 8 o Aokuso, 1838. O iina, na faapotopoto ai tagata o itu uma e lua i Gallatin mo le palota i le lotoifale. E leai se tasi na manua matuia, ae o lipoti ua faatele na faaosoina ai lagona o le ita ma le fefe i le itulagi atoa.

Sa faaauau pea feteenaiga faaauupegaina i le isi sefulu vaiaso na sosoo ai. O nisi o vaega na i ai le faatagaga mai le kovana e galulue o se vaega o le vaegaau a le setete, ae o le toatele o alii faaauupegaina ua faaaoga le pule i fafo atu o le li’o o le pule faaletulafono e faasala ai pe faamalosia ai le faamasinoga . I le ogatotonu o Oketopa, na faamalosia ai e fili le Au Paia i Dewitt mai o latou fale. Na faatagaina e Iosefa Samita tagata o le Ekalesia e faatulaga se tali atu faaleosofa’i ma taofia fana ma sapalai mai tuaoi tetee i le Itumalo o Daviess. O nei faatinoga na faateteleina ai le feteenaiga. I le tali atu i ai, na pu’eina ai e ni volenitia mai se vaega a le Itumalo o Ray o le vaegaau a le setete ni sikauti se toalua a le Au Paia o Aso e Gata Ai. I le taua na tulai mai i le Vaitafe o Crooked i le aso 25 o Oketopa, e toatolu Au Paia o Aso e Gata Ai ma se toatasi o le vaegaau a le Itumalo o Ray na maliliu. O le mea aupito sili ona matautia na tupu i le taua na oo mai i le aso 30 o Oketopa, 1838. E silia ma le 200 alii faaauupegaina na osofaia le au paia i le Hawn’s Mill, ma fasiotia ai le 17 ma faamanualia ai isi e 14.

A o taunuu atu lipoti o le taua i le kovana, sa ia faatonuina le vaegaau e faapotopoto atu i Sisifo Mamao. Sa ia tautino mai o Mamona uma “ua tatau ona taulima o ni fili ma e tatau ona fasiotia pe tutuliese mai le setete.” Sa siomia e se autau toatele ia Sisifo Mamao, ma le manatu o le a tele se tetee mai. Peitai, sa filemu le aai i le aso 1 Novema, 1838, e aunoa ma se tau. O Iosefa Samita ma le toatele o isi taitai o le Ekalesia na pueina ma tulai i le faamasinoga i se itumalo tuaoi. O le taimi lea, na faaleagaina ai ma gaoia e le vaegaau a le setete le aai, faatauemu ma sauaina tagatanuu, faomea, ma iu ai ina faaumatia le tele o meatotino.

Ina ua mavae le tolu vaiaso o taualumaga faaletulafono i Richmond, na auina atu ai Iosefa Samita ma isi alii e toalima i le falepuipui o Liperate. O iina, sa latou faatalitali ai mo le faamasinoga mo le isi lima masina na sosoo ai. O le taimi lea, e faitau afe Au Paia o Aso e Gata Ai sa toe avea foi ma tagata sulufai. O le Au Paia, na faamalosia e lafoai o latou fale ma fanua, ma o ese atu mai Misuri mo nofoaga tuaoi o Aioua ma Ilinoi. I le feagai ai ma se lumanai le mautonu, sa toe tatalo ai Iosefa Samita mo le taitaiga ma maua ai le taitaiga a le Alii.

O nofoaga faasolopito i Misuri ua faamatalaina mai ai le tele o tausaga o sauaga ma fesouaiga. Ae, o loo faaalia ai foi le ala na faaauau ai e le Alii ona taitai Lona nuu e ala i faaaliga i Lana perofeta. O nei nofoaga ma tala o loo faaauau pea ona musuia ai tagata. Latou te fautuaina i latou e faamalolosia o latou lava faatuatua ia Iesu Keriso ma osia ma tausia feagaiga ma le Atua. Latou te uunaia foi isi e faasoa atu le talalelei a Iesu Keriso ma fausia Siona i nuu o loo latou nonofo ai.