Faatuina o le Nofoaga Totonugalemu o Siona

I nisi o uluai faaaliga ia Iosefa Samita na faamaumauina, sa aoao mai ai e le Alii le Au Paia o Aso e Gata Ai e “saili e aumai i luma ma faatu le faamoemoe o Siona” (Mataupu Faavae ma Feagaiga 12:6). O Siona o le igoa o le aai o le perofeta o Enoka. Ua faamalamalama mai e le Feagaiga Tuai e faapea “sa feoa’i foi o Enoka ma le Atua” ma “na avea o ia e le Atua” ma lona aai atoa e faatasi ma Ia i le lagi (Kenese 5:24). I se faaaliga ua avea nei ma se vaega o le Tusi a Mose, sa aoao mai ai atili e le Alii Iosefa Samita e uiga ia Enoka ma lona aai. “Ma sa taʼua e le Alii lona nuu o Siona, ona sa tasi o latou loto ma tasi le mafaufau, ma sa mau i le amiotonu; ma sa leai se mativa i totonu o i latou” (Mose 7:18). I le avea ai ma soo o Iesu Keriso ia faaaogaina mataupu faavae mai le aai anamua o Siona a Enoka, latou te fesoasoani e saunia le lalolagi mo le toe foi mai o le Faaola.¹

O nei faaaliga na uunaia ai Iosefa ma isi uluai tagata o le Ekalesia e fesili atu i le Alii pe faapefea ona faatuina se aai e faataitai i le aai o Enoka. O le tali atu i a latou fesili, na tuuina mai ai e le Alii ni faatonuga patino po o fea ma le auala e fausia ai Siona. Sa Ia faamalamalama mai foi ia taunuuga o le le usitaia o Ana afioga.

O se tasi o faatonuga muamua o le faasoa atu lea o le talalelei i tagatanuu moni o loo nonofo i le itu i sisifo o le Vaitafe o Misuri. O lenei eria o se vaega o le teritori a le Iunaite Setete ae e lei avea lava ma se vaega o se setete. Sa taliaina e Oliva Kaotui ma isi faifeautalai e toafa le tofiga. O lenei misiona o le uluai taumafaiga faatulagaina lea a le Ekalesia e faasoa atu le talalelei i tagata o a latou gagana ma talitonuga faaleaganuu e ese mai faifeautalai.

Ia Iulai 1831, na asiasi atu ai Iosefa Samita ma isi tagata o le Ekalesia i faifeautalai i Misuri. O le aai aupito lata ane o Initipene, i le Itumalo o Siakisone. A o i ai iina, sa faailoa mai ai e le Alii le nofoaga o le nofoaga tutotonu o Siona o Initipene (Mataupu Feagaiga ma Feagaiga 57:2). Na poloaiina e le Aliii ona tagata e faapotopoto atu iina. Sa ia valaauina Epikopo Eteuati Paterika e faatau mai fanua i sisifo o le falefaamasino. O le laueleele sa mo le fausiaina o malumalu e 24—o fale faapaiaina na faapaiaina i le faia o le galuega a le Ekalesia a Iesu Keriso i Siona.

O le muamua o nei malumalu e 24 sa atofaina o le maota o le Alii. Na maua e Iosefa Samita se faaaliga faaopoopo e tofia ai le nofoaga o lenei malumalu. I le aso 3 o Aokuso, 1831, na faataatia ai e Iosefa le maa muamua o le malumalu fou. Mulimuli ane, sa saunia ai e le Perofeta se fuafuaga o se fanua mo le aai. Sa ia faamalamalama atu foi o Siona sa sili atu nai lo na o se nofoaga tutotonu. “Pe a fua ma vaevae lenei fanua e tusa ma le fuafuaga ma faatumulia i fale o aiga, o togalaau, o fale tetele, ma fale e nonofo ai tagata,” na ia tusia i autafa o le pepa o faamatalaga, ona “fua ma vaevae lea se isi fanua i le ala lava e tasi, ma ia faatumulia ai le lalolagi i nei aso e gata ai…aua o le Aai lenei o Siona” ( Joseph Smith Papers).

I Misuri, sa aoaoina ai foi e le Au Paia le ala e tausia ai e le tasi le isi ma mo le lalolagi lava ia e ala i le tatalo, anapogi, ma le tausia o le Sapati. Na aoao mai le Alii o lenei mea o le a tuufaatasia ma saunia ai i latou mo faamanuiaga i le lumanai, e aofia ai le filemu ma le ola e faavavau (Mataupu Faavae ma Feagaiga 59:23).

E toatele na faalogo i lenei fautuaga ma saili ia loto mama a o latou auauna atu ia i latou o siomia i latou. Ae a o faasolo ina toatele tagata o le Ekalesia na faamautu i le eria, sa faatupulaia feeseeseaiga ma tuaoi. Sa fefefe tagata muamua na nofoia ia eleele i le Au Paia o Aso e Gata Ai ona sa latou manatu o le a le pine ae faiaina i latou i taimi o palota. Sa latou lagonaina o le tapuaiga na ofoina atu i ona tagata se vaaiga ese o le faatemokarasi, ma sa latou popole faapitoa lava o le a suia e le Au Paia ia tulafono o loo i ai i le puipuia o pologa i le setete.

I le faaiuga o le 1833, na fetaui ai vaega o le Au Paia faaauupegaina ma o latou tuaoi i se tulaga matautia. O nei osofaiga na faamalosia ai le Au Paia e lafoai o latou fanua ma meatotino patino i le Itumalo o Siakisone. E ui o nei faatinoga sa faasolitulafono ma e le tauamiotonuina, ae sa faamalamalama mai foi e le Alii sa Ia “tuu le puapuaga ia oo mai i luga [o le Au Paia]. . . . ona o a latou soligatulafono,” e aofia ai “misa, ma finauga, ma losilosivalega ma fetauaiga, ma tuinanauga ma manaoga matape’ape’a,” lea na “faaeleeleaina ai o latou tofi” i Siona (Mataupu Faavae ma Feagaiga 101:2, 6). O a latou amioga sa matua maualalo lava i le tulaga faatonuina o le avea ma e “loto mama.”

A o faaauau pea sauaga a le au faatupu faalavelave ma sa tauivi le Au Paia e faaauau pea, sa faamautinoa atu e le Alii ia i latou o a latou taumafaiga e faatu Siona, e tusa lava po o le a le le atoatoa, sa le’i lē aoga. “Siona,” na Ia tautino atu ai, “o le a lē aveesea i fafo mai lona nofoaga, e ui ina faataapeapeina ana fanau” (Mataupu Faavae ma Feagaiga 101:17).

I le le mafai ai ona fausia le nofoaga tutotonu o Siona i Initipene, sa taulai atu ai Iosefa i le faatuina o siteki o Siona ma le fausiaina o malumalu i isi nofoaga. Sa ia amata i Katelani, Ohaio, ona salalau atu lea i Itumalo o Caldwell ma Daviess i Misuri.

O le galuega o le faatuina o Siona o loo faaauau pea i aso nei i le faitau selau o malumalu ma le faitau afe o siteki i le salafa o le lalolagi. Po o fea lava o faapotopoto ai Au Paia o Aso e Gata Ai i lalo o le taitaiga a perofeta soifua e osia ma tausia feagaiga paia, latou te saunia i latou lava ma le lalolagi mo le Afio Mai Faalua o Iesu Keriso, le Tupu o Siona.