Maota o Flournoy

O le Maota o Flourney e laititi, o se fale piliki mumu na fausia i le 1826 e Jones H. Flourney. O se tasi o fale sili ona tuai i Initipene ma o se tasi o fale piliki muamua na fausiaina i lena eria. I le 1831, na faatauina mai ai e Epikopo Eteuati Paterika se vaega o le fanua o Flourney e faafesagai mai le fale mo le fausiaina o se malumalu. O se faaaliga i le 1831 na faatonuina ai Iosefa Samita ma isi taitai o le Ekalesia e malaga mai Katelani, Ohio, i Initipene, Misuri, e saili fanua mo o latou tofi (Mataupu Faavae ma Feagaiga 52: 3-5). A o i ai i Initipene, na maua ai e Iosefa se isi faaaliga e faailoa atu ai le “nofoaga tutotonu” o Siona (Mataupu Faavae ma Feagaiga 57: 1–3). Na faamatala atu e le Alii le tulaga “ua faapaiaina mo le faapotopotoga o le au paia,” ma le “nuu o le folafolaga.” O le a avea o se nofoaga mo le Au Paia o Aso e Gata Ai e fausia ai fale ma malumalu ma saunia ai mo le toe foi mai o le Faaola i le lalolagi.

O le mulimuli ai i le poloaiga a le Alii, na amata ai loa e Epikopo Paterika ona faatau mai fanua mo le faapotopotoina o le Au Paia. O lea na aofia ai le 63 eka o fanua mai ia Jones H. Flournoy ia Tesema 1831. O se vaega o lenei fanua na atofaina mo le fausiaina o se malumalu. Na faaauau pea na nonofo le aiga o Paterika i lenei fanua seia oo i le taumalulu o le 1833.

Mea e Faamoemoeina

O le fale muamua lava o Flourney o se vaega o le Heritage Plaza e anaina e le Community of Christ. E tu le fale e fa poloka i sisifo o lona uluai nofoaga. I le vaitaimi o le 1980, na iloa ai e tagata o le lotoifale o le a suitulaga ai se paka o taavale i le nofoaga. Na latou galulue e siitia atu le fale i lona tulaga puipuia o loo i ai nei, i le 1989. E talia tagata asiasi e vaavaai i fafo o le fale ma pue ata ai. E na o taimi faatulagaina e mafai ai ona maimoa taamilo i totonu o le fale. Ina ia aoao atili e uiga i le Heritage Plaza ma faatulaga se maimoaga taamilo i le Maota o Flourney, siaki le uepisaite a le Community of Christ iinei.