Fanua o le Malumalu o Initipene

I le usitai ai i le faaaliga (Mataupu Faavae ma Feagaiga 57:1--3), e toavalu toeaiina na potopoto i le aso 3 o Aokuso, 1831, ma sa faapaia ai e Sini Rikitone le laueleele e tu ai le aai o Siona. Ona faataatia lea e Iosefa Samita se maa i le tulimanu i matusasae o le malumalu ua fuafuaina i le suafa o le Alii. Mulimuli ane, sa “fofogaina e Sini Rikitone lea vaega o le eleele ua faapaiaina atoa i le Alii e faavavau.” O le nofoaga muamua lea na faapaia e le Ekalesia mo se malumalu. Mo le Au Paia o Aso e Gata Ai ma le toatele o isi ua talitonu i le galuega faaperofeta a Iosefa Samita, e faatumauina lava le taua o le malumalu.

O le vaega o le fanua mo le malumalu o se vaega tele atu e 63 eka. na faatau le fanua i le aso 19 o Tesema, 1831. Na faalauteleina le nuu o Initipene agai i sisifo ma ua aofia ai nei le 63 eka atoa, ae o le Au Paia o Aso e Gata Ai na sosola ese mai le Itumalo o Siakisone a o lei mafai ona latou fausia se malumalu.

O le fanua mo lenei uluai malumalu ua fuaina pe tusa ma le 300 futu i le 200 (pe tusa ma le 90 mita i le 60 mita). O mamanu o le Malumalu o Initipene e talitutusa ma le Malumalu o Katelani. O fuafuaga o loo faamatala ai se fale e 87 futu le umi ae 61-futu le lautele (pe tusa o le 28-mita le umi ma le 19-mita le lautele) ma le igoa vane “E Paia i le Alii” i le pito i luma. Na tautino e le Alii o “se nofoaga o le faafetai mo le au paia uma, ma mo se nofoaga o le aoaoga mo i latou uma o e ua valaaulia i le galuega o le auaunaga” (Mataupu Faavae ma Feagaiga 97:13).

O le fanua o le malumalu e i le isi itu o le auala mai le Malumalu o le Community of Christ ma e i talane o le Nofoaga Tutotonu mo Tagata Asiasi i Initipene i luga o se tasi o vaega aupito maualuga i le eria. E tu i le va o lotu eseese e tolu, ua tumau pea le fanua o le malumalu o se nofoaga paia.

Mea e Faamoemoeina

O le fanua i le taimi nei ua anaina e le Ekalesia a Keriso, lea sa ta’ua o le (Fanua o le Malumalu) a le Ekalesia a Keriso. O lo latou falelotu e sosoo ma le fanua, o loo faavagavaga pea mo se malumalu. E talia tagata asiasi e vaili laufanua e ufitia i le mutia i fafo o le fale ma pue ata ai. O loo i ai pakaga ma fale’ese i le Nofoaga Tututonu mo Tagata Asiasi i Initipene.