O Le Tusi a Mamona ma le Tusi Paia o Afioga a le Atua

Ua aoao mai i tatou e le Tusi a Mamona ma le Tusi Paia e uiga i le fuafuaga a le Atua ma molimau mai ia Iesu Keriso.
I le itulau lenei

O Le Tusi a Mamona O Le Afioga a le Atua

Na aoao mai Paulo i le Feagaiga Fou, “E mautu upu uma i le mau a le toalua po o le toatolu” (2 Korinito 13:1). O tagata O Le Ekalesia a Iesu Keriso o le Au Paia o Aso e Gata Ai e faatauaina le Tusi Paia o se tasi o na molimau ma o le Tusi a Mamona o se isi molimau ia Iesu Keriso.

E pei o le Tusi Paia, o le Tusi a Mamona o se faamaumauga musuia faalelagi na tuufaatasia e perofeta anamua. O loo tusia ai le afioga a le Atua i Ana fanau i le atu Amerika. E mafai ona e maua musumusuga manino, malamalamaaga, ma le taitaiga e ala i le faitauina faatasi o tusi uma e lua o tusitusiga paia.
O Se Vaaiga Aoao Puupuu e Uiga i le Tusi a Mamona

Sa i ai le Ekalesia a Keriso i le atu Amerika

O le Tusi a Mamona e amata i le tala i se perofeta e igoa ia Liae, o lē sa lapataia e le Atua pe tusa o le 600 TLM o le a faaumatia Ierusalema. O Liae ma lana avā, o Sarai, na taitaia e le Agaga o le Atua, na aumaia lo latou aiga i luga o le vasa, lea na iu ai ina tutupu a latou fanau e avea ma atunuu e lua, ua ta’ua o sa Nifaē ma sa Lamanā. O a latou tala o le faatuatua i le Atua ma sauniuniga mo le afio mai o Iesu Keriso ua tuuina mai ai ni faataitaiga musuia e mulimuli ai, ae o isi tala i le Tusi a Mamona o loo faamamafa mai ai le alofa mutimutivale o le Atua mo Ana fanau uma pe lapatai atu foi e faasaga i le agasala.

O le faatumutumuga o le mea na tupu i le Tusi a Mamona o le asiasiga a Iesu i Ona soo i le atu Amerika ina ua mavae Lona maliu ma le Toetu. O lenei asiasiga na faataunuuina ai Lana aoaoga i Ierusalema:
Ua ia te a’u foi isi mamoe, e lē o i lenei lotoa: e tatau ona ou taitaiina mai o i latou foi, e faalogo foi i latou i lo’u leo.
Ina ua uma ona aoao atu e Iesu Lana aoaoga faavae ma faatuina Lana Ekalesia i le atu Amerika, sa ola tagata iina i le filemu ma le amiotonu mo le tele o augatupulaga.

Mulimuli ane, na pauu atu tagata i taua ma le amioleaga ma sa faaumatia sa Nifaē. O se tasi o sa Nifaē na soifua mulimuli, o Mamona, na tuufaatasia a latou talafaamaumau i mea o le a lauiloa i ona po nei o le Tusi a Mamona: O Se Tasi Molimau ia Iesu Keriso.

O Se Faamaumauga Anamua ua Faaliliuina i o Tatou Aso

Na filifilia e le Atua ia Iosefa Samita o se perofeta e toefuatai mai Lana Ekalesia i o tatou aso ma saunia le ala mo Iosefa e sue ai talafaamaumau anamua na tuufaatasia e Mamona ma faaliliuina e ala i faaaliga faalelagi. Talu mai lena taimi, ua musuia e le Tusi a Mamona le faitau miliona o tagata i le salafa o le lalolagi ina ia suia mo le lelei sili atu ma avea atili ma soo tuuto o Iesu Keriso. E mafai foi ona musuia ai oe.
Series of images of people studying in groups, individually, in families sitting in Congo

O le Tusi Paia o le afioga lea a le Atua

O le Tusi Paia o se tusi paia o tusitusiga paia ua tuuina mai e le Atua ia i tatou—o Ana fanau—mo lo tatou manuia. O ona aoaoga e mafai ona tuuina atu ai ia te oe se puna o le malosi, musumusuga, ma le taitaiga.

I le Feagaiga Tuai, e mafai ona e:
  • Aoao atili ai e uiga i le Atua ma le faamoemoega o le olaga e ala i le faitau e uiga i le Foafoaga o le lalolagi ma le afio mai o se Faaola na faaalia i perofeta anamua e pei o Isaia.
  • Saili ni faataitaiga mamana o le faatuatua, e pei o le Masiofo o Eseta.
  • Aumaia le mafanafana mai solo matagofie o le Salamo ma Faataoto.
I le Feagaiga Fou, e mafai ona e:
  • Aoao atili ai e uiga i lou Faaola, o Iesu Keriso, a o e aoao e uiga i Lana galuega i le olaga nei. O le a e faitau ai e uiga i Lona soifuaga, vavega, ma faataitaiga atoatoa.
  • Saili le ala, e ala i aoaoga a Iesu, i se olaga e sili atu ona anoa ma toafilemu ma i le faaolataga e faavavau.
  • Aoao, o le mea e sili ona tāua, e uiga i le taulaga a Iesu mo oe ma Lona Toetu. Ona o Ia, e mafai ai ona e tuputupu a’e e ausia lou gafatia paia o se atalii/afafine o le Atua ma saunia e nonofo faatasi ma le Atua ma ē pele ia te oe e faavavau.
    Photograph of a person reading scripture. We can see the words “Philemon” from the new testament on the page.

O le Tusi a Mamona ma le Tusi Paia o loo molimau mai ia Keriso.

O loo molimau mai le Tusi a Mamona ma le Tusi Paia ia Iesu Keriso ma aoao atu e uiga i le fuafuaga a le Atua mo lo tatou fiafia. E le suia ai foi e le tasi le isi, ae nai lo lena, la’ua te faaatoatoaina e le tasi aoaoga a le tasi ma le isi, e pei o le auala o loo aumaia ai e tusi o le Feagaiga Fou o Mataio, Mareko, Luka, ma Ioane ni vaaiga eseese e fatu ai se ata e sili atu ona atoatoa o le aoaoga faavae po o le tala e tasi.


O le suesueina faatasi o le Tusi a Mamona ma le Tusi Paia, e mafai ai ona e maua se malamalama sili atu e uiga i le Atua ma lou sootaga ma Ia. Ina ia amata, e mafai ona e vaai i mea o loo ta’u mai e tusi uma e lua e uiga i nei mataupu:
‟Ua inosia ma tuulafoaiina o ia e tagata; o le tagata faanoanoa, ua masani foi ma le tiga; e peisea’i ua alo ese mata i a te ia; ua inosia o ia, ma ua tatou lē manatu lava o ia.

“E moni ua na tauave o tatou tiga, ma na tauave o tatou faanoanoa: a ua tatou manatu o ia ua taia, ua fasia e le Atua, ma ua faatigaina.

“A ua manuʼa o ia ona o a tatou solitulafono, ua momomo o ia ona o a tatou amio leaga; o le aoaiga e filemu ai i tatou sa i ona luga lea; o ona faalavalava foi ua malolo ai tatou” (Isaia 53:3–5 [Tusi Paia]).

‟Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma; ma o le a oo ia te ia nei mea, ina ia mafai ona faataunuuina o le upu e faapea, o le a ia ave i ona luga tiga ma maʼi o ona tagata.

“Ma o le a ia ave i ona luga le oti ina ia mafai ona ia tatalaina fusi o le oti ia ua noatia ai ona tagata ma o le a ia ave i ona luga o latou vaivaiga ina ia mafai ona faatumuina lona loto i le alofa mutimutivale e tusa ai ma la le tino ina ia mafai ona ia silafia e tusa ai ma la le tino le ala e fesoasoani ai i ona tagata e tusa ai ma o latou vaivaiga” (Alema 7:11–12 [Tusi a Mamona]).
“A ia outou muai saili le malo o le Atua ma lana amiotonu; ona faaopoopoina atu lea o ia mea uma ia te outou” (Mataio 6:33 [Tusi Paia]).

‟Auā faauta, o le olaga lenei o le taimi lea mo tagata e saunia ai e feiloai ma le Atua; ioe, faauta o le aso o le olaga lenei o le aso lea mo tagata e fai ai a latou galuega.

“Ma o lenei foi, e pei ona ou fai atu muamua ia te outou, talu ai ona ua uma ona outou maua o molimau e tele, o lea, ou te aioi atu ai ia te outou, ia aua ne’i o outou faatuai le aso o lo outou salamo seia oo i le iuga; aua ua mavae le aso lenei o le olaga, lea ua tuuina mai ia i tatou e saunia ai mo le faavavau, faauta, afai tatou te le faaleleia atili o tatou taimi a’o tatou i ai i lenei olaga, ona oo mai ai lea o le po o le pouliuli, e le mafai ona faia ai o se galuega” (Alema 34:32–33 [Tusi a Mamona]).
“Na fetalai atu Iesu ia te ia, o A’u nei o le toetu ma le ola: o lē faatuatua mai ia te a’u, e ui lava ina oti, a e ola lava ia:

“O tagata ola uma o e faatuatua mai ia te au, e le oti lava” (Ioane 11:25–26 [Tusi Paia]).

‟Ma ona o’o lea, o agaga o i latou o e ua amiotonu e talia i se nofoaga o le fiafia, lea ua ta’ua o le parataiso, o se nofoaga e malolo ai, o se nofoaga o le filemu o le a latou malolo ai mai i o latou faalavelave uma ma mai le popole uma, ma le faanoanoa.

‟O le agaga o le a toefuata’ia i le tino, ma le tino i le agaga; ioe, ma o le a toefuata’ia vae ma lima ma sooga uma i lona tino; ioe, e oo i se lauulu o le ulu o le a le toesea lava; ae o le a toefuata’ia mea uma i o latou tino e tatau ai ma atoatoa.

“Ma ona susulu atu ai lea o e amiotonu i le malo o le Atua” (Alema 40:12, 23, 25 [Tusi a Mamona]).
“Ona tali atu ai lea o le Tupu, e faapea atu ia te i latou, E moni, ou te fai atu ia te outou, Auā na faia e outou i le tasi o e aupito itiiti o o’u uso nei, o au lea na outou faia i ai” (Mataio 25:40 [Tusi Paia]).

“Ma faauta, ua ou ta’u atu nei mea ia te outou ina ia mafai ona outou aoaoina le poto; ina ia mafai ona outou aoaoina, pe a outou auauna atu i o outou uso-a-tagata, ua na’o lo outou auauna atu lava lea i lo outou Atua” (Mosaea 2:17 [Tusi a Mamona]).

Aumai le Tala Atoa

O le Tusi a Mamona ma le Tusi Paia atonu o ni tusi eseese, ae o se vaega o le tala lava e tasi. Ia maua se faatomuaga i le Tusi a Mamona ma suesue i tusi uma e lua o tusitusiga paia faatasi ma faifeautalai.