O Iesu Keriso O Lou Faaola

Ina ua auina mai i tatou e le Atua iinei i le lalolagi e aoao ma tuputupu a’e, sa Ia silafia o le a tatou faia ni mea sese. O lea na Ia auina mai ai ia i tatou se Faaola, o Iesu Keriso, e saunia se ala mo i tatou e salamo ai ma faaolaina ai mai le oti faaletino.

Tatou te talitonu i le paia o Iesu Keriso o le Alo moni o le Atua ma o se sui lauiloa o le aigaAtua faatasi ai ma le Atua le Tama ma le Agaga Paia. Na afio mai Iesu i le lalolagi ina ia oo i tofotofoga o se olaga faaletino, aoao atu ma molimau atu i le Atua, faia vavega tetele, ma faamaea Lana taulaga togiola, lea o le a mafai ai ona faamamaina i tatou mai le agasala ma ia toetutu.

Sa Ia faia nei mea uma mo i tatou—mo oe.

O le faataitaiga a Iesu o le alofa mama lea. Sa Ia faaali mai ia i tatou le auala e alolofa ai i le Atua e ala i le taumafai e faia Lona finagalo e sili atu i lo isi mea uma. Sa Ia faamaloloina ma le agaalofa ē mama’i ma lē atoatoa, fafaga i e fiaaai, faatutu mai e na oti, tausia e matitiva, tausia e matitiva, talileleia tagata na faate’aeseina faagafesootai, ma auauna atu ia i latou uma o e saili atu ma le faamaoni ia te Ia.

E mafai ona e faatuatua e faalautele atu e le Faaola lena lava alofa ma le agaalofa ia te oe.

I le avea ai ma Kerisiano, tatou te taumafai ia faapei o Iesu ma ia atagia atu Lona alofa.

O Iesu o se faiaoga sili. I le 12 o ona tausaga, sa saofafai ai o Ia ma faiaoga faaaloalogia faalelotu i le malumalu i Ierusalema, ma “ua matua ofo uma lava e na faalogo ia te Ia i Lona poto ma Ana upu e tali” (Luka 2:47).

Mulimuli ane, e faitau afe tagata na lolofi atu e faalogologo i Ana lauga—o lauga o loo musuia ai pea tagata i le lalolagi atoa e ola i ni olaga sili atu i aso nei. O loo faaalia i le Tusi Paia sa faaalu foi e Iesu se taimi e talanoa atu ai i tagata taitoatasi i lesona sa manaomia ona latou faalogo i ai. Ua faaopoopo mai e leTusi a Mamona i lo tatou malamalama e uiga i le Faaola ma Ana aoaoga.

E mafai ona e maua le filemu ma le fiafia sili atu e ala i lou ola ai o oe lava i aoaoga a Iesu. O la outou aulotu i le lotoifale O Le Ekalesia a Iesu Keriso o le Au Paia o Aso e Gata Ai o se nofoaga sili lea e aoao atili ai e uiga i Ana aoaoga ma le auala latou te faatatau ai ia te oe.

E ui ina sa soifua Iesu i se soifuaga atoatoa, e toatele na lagona le faamata’uina i Lana faatosinaga pe sa feita foi a o Ia faailoa atu lo latou pepelo. Sa latou taupulepule e fasiotia Iesu.

O le po a o lumanai ai Lona faasatauroga, sa tuumuli atu ai Iesu i le Faatoaga o Ketesemane e tatalo ai. O iina na Ia mafatia ai i tiga o fanau uma a le Atua, e aofia ai ma ou tiga. Ona faalataina ai lea o ia, pue faapagotaina, sasaina, tauemuina, ma tautau i luga o se satauro e oti ai. O mea uma na oo i ai Iesu Keriso i Lona soifuaga atoa ma le taulaga togiola na mafai ai e Ia ona malamalama atoatoa ia i tatou taitoatasi i tulaga uma.

Ona o le taulaga a Iesu mo oe, ua mafai ai ona e salamo ma faamagaloina atoatoa. E le gata i lea, o vaega uma o le faaituau na e onosaia o le a faasa’oina i se aso e ala ia Iesu Keriso.

E mafai ona tatou faatoilaloina e le gata i le oti faaleagaga o le agasala ae faapea foi le oti faaletino e ala ia Iesu. Ona sa Toetu mai o Ia mai e ua oti i le aso lona tolu ina ua mavae Lona Faasatauroga, o lea e mafai ai foi e oe ona toetu i se aso ma mafuta faatasi ma le Atua ma ē pele ia te oe i se tino atoatoa, e saoloto mai ma’i ma tiga.

E malamalama Iesu ia te oe. Ua Ia lagonaina le mamafatū o ou tofotofoga sili ona faigata uma ma ua puapuagatia mo au agasala. Ua Ia valaaulia oe e mulimuli atu ia te Ia ma maua le filemu.