Kaveinga ʻo e Māhina Ní: ʻAmanaki Lelei ki he Kahaʻú

Siʻi kau laukonga,

Ko ha tokotaha mohu fakakaukau au. ʻI heʻeku kei siʻí, naʻá ku faʻa tokoto pē ʻi he mohengá ʻi he poʻulí mo fakakaukau ki hono lahi ʻo ʻitānití. Hili iá naʻá ku iku leva ʻo tangi ʻi he loki ʻeku ongomātuʻá koeʻuhí naʻá ku fuʻu ilifia ʻi he meʻa ʻe ala hoko ʻi he kahaʻú.

Kuo ‘ikai ke u toe fai ʻa e tōʻonga ko iá (ʻi he taimi lahi), ka ʻoku ou kei tailiili pē ʻi he fakakaukau atu ki he kahaʻú.

ʻI he kamata ke u toe maʻu ʻa e ongo ko iá, ʻoku ou fakamanatu pē kiate au ʻoku moʻui ʻa Sīsū Kalaisi—ko e tupuʻanga ʻo e ʻamanaki lelei kotoa pē. Pea koeʻuhí ʻokú Ne moʻui, te tau lava ʻo maʻu ʻa e ʻamanaki leleí ʻiate Ia ʻe lelei ʻa e meʻa kotoa pē, ʻi he taimí ni pea mo e kahaʻú.

Naʻe lea ʻa Palesiteni M. Lāsolo Pālati (1928–2023) fekauʻaki mo e ʻamanaki lelei ʻia Kalaisí, ʻo pehē: “ʻOku mahuʻinga ʻa e faʻahinga ʻamanaki lelei peheé ki hono ikunaʻi ʻo e filí, tanumaki ha mālohi mo e ivi fakalaumālié, pea mo hono ʻiloʻi ʻoku ʻofaʻi kitautolu ʻe heʻetau Tamai Taʻengatá.”

Ko ha niʻihi ʻeni ʻo e ngaahi talanoa ʻo e māhina ní fekauʻaki mo e ʻamanaki leleí:

• Ko e founga ʻe lava ke hoko ai ʻa e ako fekauʻaki mo e ngaahi aʻusia ʻa e Fakamoʻuí ʻi Hono ngaahi ʻaho fakaʻosí ʻo tataki kitautolu kiate Ia ʻi he taimi Toetuʻu ko ʻení

• Ko e ʻuhinga ʻo e hoko ko ha tokotaha ʻoku lava ʻo fili pē maʻana ʻi he tuí

• Ko e founga naʻe maʻu ai ʻe ha tokotaha lahi kei talavou ʻeti faiva ʻa ia ʻokú ne fakatātaaʻi ʻa Sīsū Kalaisi ʻi he ngaahi vitiō ʻa e Siasí ki he Toetuʻú ʻa e ʻamanaki leleí hili ʻene foua ʻa e faingataʻá ʻi heʻene kei siʻí

• Ko e meʻa naʻe ʻiloʻi ʻe ha tokotaha lahi kei talavou hili ʻa e vete ʻene ongomātuʻá fekauʻaki mo e ʻaho mahuʻinga taha ʻi he hisitōliá

• Ko e ngaahi tefitoʻi moʻoni ʻe tolu ʻo e ongoongoleleí ke ke maʻu ai ʻa e ʻamanaki leleí ʻi he taimi ʻoku hangē ʻoku siva ʻa e ʻamanakí ʻi he māmaní

ʻOku ʻi ai foki mo ha ngaahi talanoa ko ha konga ʻo ʻemau ngaahi talanoa hokohokó:

• Ngaahi Taukei ʻo e Moʻuí: Ko e siʻisiʻi ʻa e meʻakaí ko ha faingataʻa moʻoni ia—ako fekauʻaki mo e ngaahi maʻuʻanga tokoni ʻoku ala maʻú.

• Tautautefito maʻá e Kau Mali Foʻoú: ʻOku uesia nai ʻe he loto-hīkisia hoʻo nofo-malí?

• Fakataha Lotu ʻoku Fakakaú: ʻOku akonaki ʻa ʻEletā Dieter F. Uchtdorf ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo e founga ke tali fiefia ai ʻa e Mīsaiá ki heʻetau moʻuí.

ʻOku ou fakatauange ʻokú ke ʻiloʻi ʻoku mau ʻofa atu mei he YA Fakauiké. ʻOku mau fakatauange te ke lava ʻo ʻilo ha ngaahi ʻuhinga ke ʻamanaki lelei ai ʻia Kalaisi ʻi he faʻahitaʻu Toetuʻu ko ʻení.

Koeʻuhí kuó Ne toe tuʻu. Pea ʻoku ou maʻu heni ha fakatuʻamelie lahi ki he kahaʻú.

ʻI he ʻofa mo e ʻamanaki lelei ʻia Kalaisi,

Aspen Yip, ʻĒtita Akoako ʻo e YA Fakauiké