Mei he YA Fakauiké
Naʻe Akoʻi Mai ʻe Heʻeku Faingataʻaʻia ʻi he Lea Faka-Sipeiní ʻa e Founga ke Falala Ai ki he ʻEikí
ʻE lava ke tokoni mai ʻa e Tamai Hēvaní ke tau hoko ʻo malava, loto-falala mo fiefia ʻi heʻetau fononga ʻi he moʻui fakamatelié.
ʻI he taʻu ʻe ua kuohilí, naʻá ku aʻu mai ai ki ʻapi mei hoku misioná. Naʻá ku ngāue ʻi ha misiona lea faka-Sipeini ʻo ʻikai haʻaku aʻusia kimuʻa ʻi he lea faka-Sipeiní makehe mei he lau ʻa e mataʻifiká pe fakalea mālō e leleí. ʻOku ou kei manatuʻi pē ʻa ʻeku fakahaaʻi ʻeku taʻefiemālie ki heʻeku palesiteni misioná ʻi heʻeku kei faingataʻaʻia ʻi he lea fakafonuá, ʻi he ngaahi fuofua māhina ʻo ʻeku ngāué.
Ko e hā ʻa e ʻuhinga naʻe ʻikai ke tāpuekina ʻaki ai au ʻe he Tamai Hēvaní ʻa e malava ke lea leleí koeʻuhí ke u lava ʻo tokoni lelei ange ki Heʻene fānaú? ʻOku pau pē ko e meʻa ia naʻá Ne finangalo ki aí.
Ko e meʻa naʻe ʻikai ke u fakatokangaʻi ʻi he taimi ko iá ko ʻeku misioná naʻe ʻikai fekauʻaki ia mo e hoko ko ha meʻangāue haohaoa ʻi ha ʻaho pē tahá. Naʻe fekauʻaki ia mo hono ako ʻa e ngaahi tefitoʻi moʻoni ʻe tolu te u fiemaʻú kae lava ke tokoni ki he Tamai Hēvaní ʻi he toenga ʻo ʻeku moʻuí.
Ko Hono Utu ʻa e Meʻa Naʻa Tau Tūtūʻí
ʻOku fakamatalaʻi ʻe he folofolá ha tefitoʻi moʻoni ʻoku tau ui ʻi he taimi ʻe niʻihi ko e fono ʻo e ututaʻú: “Ko ia ʻoku tūtuuʻi ʻe he tangatá, ko ia te ne utú foki” (Kalētia 6:7).
ʻOku hōifua ʻa e ʻOtuá ʻi he founga ʻoku tau hoko ai ʻo hangē ko Iá. Ko e moʻui fakafalala pē kiate kitá ʻoku fokotuʻu ia pea fakatupulaki māmālie, ʻo hangē ha tengaʻi ʻakau kuo pau ke tō, fuʻifuʻi, pea tauhi ʻi he faʻa kātaki kimuʻa pea toki fuá.
ʻI heʻeku fakakaukau atu ki aí, ʻoku ou ʻilo naʻe akoʻi mai ʻe he lea faka-Sipeiní ʻa e fakatomala fakaʻahó, fokotuʻu taumuʻá mo e vilitakí. ʻI he fakalau atu ʻa e taimí, naʻe tupulaki ʻeku malava ke fetuʻutakí ʻo ope atu ʻi he meʻa naʻá ku ʻuluaki fakakaukau ʻe malavá.
Ko e Tafoki ki he Niʻihi Kehé
Ko e taimi ʻe niʻihi ʻoku tau fakakaukau ʻoku ʻuhinga ʻa e moʻui fakafalala pē kiate kitá ki hono fai toko taha pē ha meʻa. Naʻe akoʻi mai ʻe hoku misioná ʻoku ʻikai moʻoni ia.
ʻI hoku misioná, naʻe tupulaki hoku ngaahi vā fetuʻutakí ʻi ha ngaahi founga fakaofo ʻi heʻeku fakaʻatā ʻa e niʻihi kehé ke nau tokoni maí. Ka naʻe ʻikai ha vā fetuʻutaki ʻe tupulaki ʻo lahi ange ʻi hoku vā mo ʻeku Tamai ʻi Hēvaní. Kuo faitāpuekina au ʻe he ako ko ia ke fakafalala kiate Iá ʻi ha ngaahi founga lahi.
ʻI ha Sāpate ʻe taha, naʻá ku akoʻi ha lēsoni ʻi he lea faka-Sipeiní. Naʻá ku hohaʻa ʻaupito naʻá ku fai ha meʻa fakamā pea naʻá ku taʻefiemālie ʻi he ʻikai ke hokohoko lelei ʻeku leá ʻo hangē ko ia naʻá ku fakaʻamuá. Pea ʻi he hokosia ʻa e taimi ke lea ai hoku hoá, naʻá ku ongoʻi ʻa e fakamanatu mai ʻe he Laumālié: “Lōkani, ko e lēsoni ko ʻení ʻoku ʻikai fekauʻaki ia mo koe; ʻoku fekauʻaki ia mo e ʻofá mo hono akoʻi ʻo e niʻihi kehé. Fakangaloki koe peá ke ngāue.”
ʻI he taimi naʻá ku fakatafoki ai ʻeku tokangá ki he niʻihi kehé, naʻe kamata leva ke hokohoko lelei mai ʻa e ngaahi foʻi leá. Naʻe ʻi ai ʻa e Laumālié, ʻo ʻikai koeʻuhí naʻe fakafokifā pē ʻeku hoko ko ha faiako leleí ka koeʻuhí naʻá ku liliu ʻeku tokangá meiate au ki he niʻihi naʻá ku ʻofa ai mo tokoniʻí.
Ko e Falala ki he Tauhi Ngoué
Kuó u faʻa ʻeke pē kiate au ʻi he taimi ʻe niʻihi, “Ka ʻo kapau ʻoku finangalo ʻa e ʻOtuá ke tau fakaʻaongaʻi ʻetau tauʻatāina ke filí ʻaki hono fokotuʻu ha ngaahi taumuʻa mo faʻu ha ngaahi palaní, ko e hā ʻa e ʻuhinga ʻoku faʻa hangē ai ʻoku maumauʻi ʻeku ngaahi palaní mo e taumuʻá?”
ʻI he ngaahi momeniti pehení, ʻoku ou saiʻia ke manatuʻi ha talanoa naʻe fai ʻe Palesiteni Hiu B. Palauni (1883–1975) fekauʻaki mo hono ʻauhani ha fuʻu fuamelie.
Naʻá ne fakakaukau ʻoku lea mai ʻa e vao ʻakaú ʻo pehē mai, “‘Naʻá ku tupu fakaʻofoʻofa pē …, pea ko ʻeni kuó ke tutuʻu ʻe koe au.’”
ʻOkú ke maheni nai mo e meʻá ni?
Ko e tali nounou ʻeni ʻa Palesiteni Palauni ki he vao ʻakaú: “ʻKo e tangata tauhi ngoue au ʻi hení, pea ʻoku ou ʻiloʻi ʻa e meʻa ʻoku ou loto ke ke aʻusiá. … ʻE ʻi ai ʻa e ʻaho, ʻi he taimi ʻokú ke mafasia ai ʻi he fuá, te ke toe fakakaukau ʻo pehē, “Fakamālō atu, Tauhi Ngoue, ʻi hono tā hifo aú, ʻi hoʻo ʻofa feʻunga ke fakamamahiʻi aú.”’”
Kuó u aʻusia ha ngaahi taimi pehē—ʻa e taimi naʻe ʻohovale pē kuo movete ʻa e ngaahi taumuʻa mo e palani naʻá ku pehē naʻe lelei mo māʻoniʻoní. ʻI he ngaahi taimi peheé, kuó u ako ke falala ko e ʻOtuá ko e tauhi ngoue Ia ʻo ʻeku moʻuí. ʻOkú Ne ʻafioʻi ʻa e meʻa te u malavá ʻo aʻu pē ki he taimi ʻoku ʻikai ke u lava aí. Ko ʻEne ngaahi “ʻauhaní” ko ha ngāue maʻu pē ia ʻo e ʻofa.
ʻOku ou fiemālie ʻi he ʻiloʻi ʻoku tataki au ʻe heʻeku Tamai ʻi Hēvaní ki ha meʻa ʻoku maʻongoʻonga ange ʻi he meʻa te u lava ʻo mafakakaukauá.
ʻOku ʻOmi ʻe he Moʻui Fakafalala Pē Kiate Kitá ʻa e Tupulaki
Naʻe akoʻi ʻe Līhai “ʻoku ʻi ai ʻa e faʻahinga ʻo e tangatá koeʻuhi ke nau maʻu ʻa e fiefiá” (2 Nīfai 2:25). Ko e hoko ko ia ʻo moʻui fakafalala pē kiate kitá ʻoku fiemaʻu ki ai ʻa e tui, ngāue mo e kātaki, pea ʻoku ʻaonga ʻaupito ia.
ʻI he taimi ʻoku tau fokotuʻu ai ha ngaahi taumuʻa, faʻu ha ngaahi palani, ngāue ʻi he “fili tauʻatāina [ʻatautolu] pē,” (Tokāteline mo e Ngaahi Fuakava 58:27), pea falala ki he ʻOtuá ʻo tuku ke Ne liliu ʻa e ngaahi palani ko iá ʻi he taimi ʻe fiemaʻu aí, ʻoku tau tupulaki leva ki he kakai ʻokú Ne fakataumuʻa ke tau aʻusiá.
ʻOku ou houngaʻia ʻaupito ʻi he ngaahi lēsoni naʻá ku ako lolotonga ʻeku ngāue fakafaifekaú, tautautefito ki hono ako ha lea fakafonua foʻoú. Lolotonga ʻeku kei tatali ki he ʻEikí ʻi ha ngaahi tapa kehekehe ʻo ʻeku moʻuí, ʻoku ou ʻilo te u lava ʻo falala kiate Ia.
Ko e fē pē feituʻu ʻokú ke ʻi ai ʻi hoʻo fononga ki he moʻui fakafalala pē kiate kitá, manatuʻi: ʻOku ʻikai ʻamanaki ʻa e ʻEikí ke ke fai toko taha ʻa e meʻa kotoa pē. Fakaafeʻi Ia ki he ngāué. Falala ki he kakai kuó Ne tuku atu ke mou feohí. Pea faʻa kātakiʻi pē koe.
ʻI he fakalau atu ʻa e taimí, te ke toe manatu ʻo ʻiloʻi ko e taimi ʻokú ke falala ai kiate Iá, kuo hanga ʻe he faingataʻaʻia, fakatoloi mo e liliu taʻeʻamanekina kotoa pē ʻo tokoniʻi koe ke ke hoko ʻo malava lahi ange, manavaʻofa mo fonu ʻi he fiefia.