Mai le AM Faalevaiaso
O Le Auala na Fesoasoani ai le Malumalu ia te A’u ia Lagonaina le Talialelei Ina ua Ou Siitia i le Isi Itu o le Atunuu
O upumoni o le malumalu na faamafanafanaina ai au i se taimi o suiga faifai pea.
O le taimi lava na ou auai ai i Le Ekalesia a Iesu Keriso o le Au Paia o Aso e Gata Ai i le 19 o o’u tausaga, sa ou siitia atu ai i le isi itu o le atunuu mai Niu Ioka i Idaho. Sa faateia a’u i le aganuu fou, ma sa ou le mautonu i tulaga faatonuina i la’u tapuaiga fou ma lo’u setete fou. Sa ou lagona le pei e faaopeopea, ua faloina i le tele o itu eseese.
E oo lava ina uma ona ou faaipoipo, ae sa ou tauivi pea ma le tuuatoatasi. Ae na suia lena mea ina ua amata ona ou auauna atu i le malumalu.
Ou te lei faamoemoeina na aafiaga o le malumalu e fesoasoani ia te au e faatoilalo ai lo’u tuuatoatasi po o le faateia i se aganuu fou, ae o auala nei e tolu na latou faia ai lena mea:
1. Manatuaina o le Faaola
O le auauna atu i le malumalu na fesoasoani ou te iloa ai le tele o taumafaiga e manaomia e avea ai le malumalu o se faamuamua. O lenei mea na mafai ai ona ou fesootai atu i tagata o le Ekalesia i lo’u aiga fou ma malamalama ai pe aisea ma pe na faapefea ona latou ola i le talalelei.
Sa amata ona ou iloa o le toatele o tagata e o i le malumalu ia manatua ai folafolaga a le Faaola ma avea atili e faapei o Ia.
O nisi taimi e faigofie ai ona taulai atu i mea o loo faia e isi tagata uma ma afifiina ai i le pisi o le olaga. O le mafuaaga lena sa faigata ai ona ou malamalama i auala eseese a tagata uma i le faia o mea i le taimi muamua na ou siitia atu ai. Ae ua fetalai mai Iesu Keriso o le a Ia tuuina mai ia i tatou le malologa pe afai tatou te faalagolago ia te Ia (tagai Mataio 11:28–30). O lea ina ua lofituina au, sa ou iloaina na pau lava le mea sa manaomia ona ou faia, o le liliu atu lea o lo’u loto ia te Ia.
Ma o le i ai i le malumalu na fesoasoani tele ia te aʻu e fai soo ai lena mea! Na aoao mai Peresitene Russell M. Nelson (1924–2025): "O Iesu Keriso o le mafuaaga lea tatou te fausia ai malumalu. O [malumalu] taitasi o Ona maota paia ia." Pe a tatou taulai atu ia Keriso, e mafai ona tatou aoao ia sili atu ona agaalofa ia i tatou lava ma tagata o siomia i tatou.
2. Fesootai ma Lo’u Aiga
E taua tele le aiga ia te a’u. Ina ua ou auai i le Ekalesia, sa ou iloaina o le aiga sa ma’ua amataina ma lo’u toalua e mafai ona faavavau pe afai ma te faamamaluina a ma’ua feagaiga o le malumalu, peitai o o’u matua ma nai o’u tei sa le o ni tagata o le ekalesia. O i latou—aemaise lava lo’u tama—sa tauivi ia malamalama i o’u lagona ma la’u tapuaiga, ma sa tele ni a latou fesili sa le mafai ona ou taliina i taimi uma.
Ina ua ou lagonaina le tuuatoatasi ma le lofituina e uiga i lo’u aiga, sa ou faia se sauniga o le faaeega paia i le faaSipaniolo, o la’u gagana moni lea. Sa ou mafaufau i lo’u tama. Ma sa ou lagonaina se uunaiga malosi mai le Agaga o le a maua e lo’u tama le avanoa i se aso e aoao ai e uiga i, ma talia lo’u faatuatuaga.
Ua folafola mai foi e lo’u faamanuiaga faapeteriaka o le a ou lagona le latalata atili atu i o’u tuaa i le malumalu. O lea sa ou faia ai le tele o galuega o talafaasolopito o aiga. Sa fai e lo’u toalua se galuega sui mo lo’u tamamatua mai Ekuatoa, lea na faataunuuina ai lena folafolaga i se auala sili ona ootia mo a’u. Sa maliu lo’u tamamatua ina ua fa o’u tausaga, ma o le auauna atu ia te ia—ma isi tuaa—i le malumalu na faamanatu mai ai ia te au e le o tuua na o a’u.
Na molimau mai Elder Gerrit W. Gong o le Korama a Aposetolo e Toasefululua: "O le fesootai ma o tatou tuaa e mafai ona suia ai o tatou olaga i ni auala faateia. Mai o latou tofotofoga ma mea na ausia, tatou te maua ai le faatuatua ma le malosi. Mai lo latou alolofa ma osigataulaga, ua tatou aoao ai e faamagalo atu ma agai i luma. O le a maufetuunai a tatou fanau. Tatou te maua le puipuiga ma le mana. O sootaga ma tuaa e faateleina ai le vavalalata o le aiga, lotofaafetai, vavega. O na sootaga e mafai ona aumaia ai le fesoasoani mai le isi itu o le veli."
3. O Le Iloaina e Silafia A’u e le Atua
Pe a ou tapuai i le malumalu, ou te lagona i taimi uma se faamautinoaga e silafia a’u e le Atua, e tusa lava po o fea ou te i ai. Ou te lagona i taimi uma se lagona o le filemu ma le masani ai iina, e pei o le toe foi mai i le aiga. Sa matuai aoga lenei mea i se taimi o le suiga. O le manatuaina po o ai moni lava a’u ma le auala Na te tausia ai Ana folafolaga na fesoasoani ou te maua ai se tulaga mautu.
Ou te iloa o i tatou taitoatasi atonu o loo i ai i ala eseese o le olaga, ae i le avea ai ma fanau a le Atua, ua tatou agai uma atu faatasi i luma i luga o le ala o feagaiga e agai atu ia te Ia.
Afai e te feagai ma se suiga tele i lou olaga, atonu e faigata i le taimi muamua, ae faalagolago i le Tama Faalelagi e fesoasoani ia te oe e fetuunai. Auai soo i le malumalu pe a mafai, ma afai e leai, mafaufau loloto ma taulai atu i le mana o au feagaiga. Ola o se soo o Keriso.
Po o le a lava le mea e tupu, ia iloa o loo Ia taialaina oe ma o loo faamalosiau mai ou tuaa ia te oe.