Mai le AM Faalevaiaso
Ou Te Lei Osia Ni Feagaiga o le Malumalu, ae E Lei Taofia Ai Au mai le Ola ai
E alala le tusitala i Kisumu, Kenya.
Sa ou mamao ese mai le malumalu ae latalata ia Keriso.
O le taimi muamua lava na ou auai ai i le malumalu, sa ou lele atu ai mai Kenya i le Malumalu o Johannesburg Aferika i Saute ina ia faamauina i o’u matua. Ae sa ou laitiiti tele ma e leai ni o’u manatuaga manino o lo’u aafiaga i le malumalu.
E le o se mea e le masani ai lenei mea mo tagata O Le Ekalesia a Iesu Keriso o le Au Paia o Aso e Gata Ai i Kenya. Ua ou vaai i le faatupulaia o le avea ma tagata o la’u eria mai le tasi paranesi i le tolu, ae e ui lava i lenei tuputupu ae faagaeetia, e toatele tagata e le mafai ona o i le malumalu e osi feagaiga ai. O le malaga i fafo atu o le atunuu sa le mafai ona maua.
Ae e mafai lava ona tatou faalatalata atu pea i le Faaola e ala i le ola ai e peiseai ua uma ona tatou osia feagaiga i le malumalu.
Faasoaina Atu o Lana Talalelei
E pei lava ona e manaomia le faafaileleina ma le faasūsūina o se laau ina ia maua ai ona fua, e tatau foi ona e faafaileleina se molimau ina ia faatumauina ai se mafutaga vavalalata ma le Faaola. E ui ina sa le mafai ona ou auai i le malumalu ma osia feagaiga o le malumalu, ae sa ou filifili e fausia la’u molimau o le talalelei i isi auala.
Na aoao mai Peresitene Henry B. Eyring, Fesoasoani Muamua i le Au Peresitene Sili, "A e tausia au feagaiga o le malumalu ma manatua i latou, e te valaaulia le mafutaga a le Agaga Paia e faamalosia ma faamamaina oe."
O le ola ai e pei lava na ou osia na feagaiga na fesoasoani ou te saunia ai mo le aso e mafai ona ou ulu atu ai i le malumalu. Ma o le faasoaina atu o le talalelei o se tasi lea o auala sili e tumau ai le fesootai atu i le Faaola ma saunia ai mo o’u faaeega paia.
Ona e le toatele ni tagata o le Ekalesia i Kenya, sa tele ni avanoa na ou maua e faasoa atu ai le talalelei. Soo se taimi lava ou te fesiligia ai ni fesili e uiga i o’u talitonuga, e pei o le mafuaaga ou te le inuina ai le lauti po o le ava malosi, ou te lagona lava i taimi uma le taialaina e le Agaga Paia e tali mai i le auala sili e mafai ai.
O lea la, a o lei mafai ona ou faatinoina galuega faalemalumalu mo a’u lava po o i latou ua maliliu, sa ou faia le mea sili ou te mafaia e aumaia ai a’u lava ma isi ia latalata atili atu i se olaga tausi feagaiga.
Lagonaina o Lona Alofa i le Malumalu
Sa faapaiaina le Malumalu o Nairobi Kenya i le 2025. E ui ina sa ono itula le malaga ese i le malumalu, ae sa iu lava ina oo atu i ai.
A o ou i ai i le malumalu mo le fale tatala, sa ou maua ai se musumusuga malosi faaletagata lava ia. Sa ou mafaufau i taimi uma i le malumalu e paia, ae ou te lei malamalama lava i le tele seia oo mai i lena aso.
A o ou nofo filemu i le potu selesitila, sa ou talanoa atu i lo’u Tama Faalelagi i le tatalo ma lagonaina se faamautinoaga sa faafofoga mai o Ia.
Sa ou tomanatu i lo’u olaga—mea sa lelei ona ou faia ma mea e mafai ona ou faia ia sili atu ona lelei. Sa ou fia iloa pe mafai faapefea ona avea au ma se tagata sili atu ona lelei ma saunia e osia feagaiga. Sa ou lagonaina le Agaga faatasi ma a’u ma lagonaina le moni o lo’u faasinomaga paia. Ma sa ou iloa e ala i le Togiola a le Faaola, e mafai ai ona "opoina a’u i aao o Iesu" (Mamona 5:11).
A o lei faapaiaina le malumalu, ma a o lei faatinoina soo se sauniga, sa ou iloaina mo au lava ia o le malumalu o le maota moni lava o le Alii. O le alu i le malumalu i soo se tulaga—savalia o lotoa, auai i se fale tatala, faatinoina o sauniga sui, osia o feagaiga a oe lava ia, po o le faia o galuega o talafaasolopito o aiga—e mafai ona valaaulia ai le Agaga i lou olaga ma fesoasoani ia te oe e saunia e osia ma tausia feagaiga paia o le malumalu. Ma a o e sauni e osia ma tausia na feagaiga, o le a e fausia se sootaga vavalalata ma le Faaola.
Fesoasoani e Faanatinati Lana Galuega
E ui e lei mafai ona ou toe foi i le malumalu, ae o loo ou sauniuni e maua o’u lava faaeega paia ae ou te lei alu mo la’u misiona. Ou te tulimatai atu i le aso e mafai ai ona ou auai i le malumalu ma osia a’u lava feagaiga ma le Tama Faalelagi.
Ua uma ona ou matauina se suiga ofoofogia i lo’u nuu ona o le malumalu. E tolu pe fa aiga i la’u paranesi o loo sauniuni e o i le malumalu, ma o a matou vasega sauniuni mo le malumalu ua sili atu ona malolosi nai lo se isi lava taimi muamua. Na saunoa Peresitene Russell M. Nelson (1924–2025): “O e vaai atu ea i le mea o loo tupu i luma tonu o o tatou mata? Ou te tatalo o le a tatou le misia le mamalu o lenei taimi! E moni lava ua faanatinati e le Alii Lana galuega."
O le ola ai i se olaga e tausia feagaiga e aoga, e tusa lava po o fea o e i ai i luga o le ala o feagaiga. E mafai ona e faanatinatiina le galuega a le Alii i totonu ma fafo atu o le malumalu.
Afai e te lei osia ni feagaiga o le malumalu i le taimi nei, e mafai ona e saunia e faia i le taimi nei, e tusa lava pe foliga mai e le mafai ona ausia. A o e saofaga atu i le faanatinatiina o le galuega a le Faaola, e mafai ona e lagonaina ma faasoa atu Lona alofa i se auala maualuga atu ma paia atu.