“Faatoilaloina o Lo’u Fefe e Tapuai i le Malumalu,” Liahona, Fep. 2026.
Mai le AM Faalevaiaso
Faatoilaloina o Lo’u Fefe e Tapuai i le Malumalu
O le fefe e le manaomia ai ona taofia oe mai le mauaina o faamanuiaga o le malumalu.
Ata na saunia e Elia Sampo
Talu ai nei, sa ou ta’u atu ai i lo’u peresitene o le siteki e faapea, e ui lava sa i ai sa’u pepa faataga aoga o le malumalu, ae o loo taofia pea a’u e se fefe le mautonu mai le savali atu i faitotoa o lena nofoaga paia.
I le avea ai ma se tasi o le Aufono o le Va i Fafo a Haiti, sa ou fesoasoani foi i mea na tutupu e tau atu i le faapaiaga o le Malumalu o Port-au-Prince Haiti. O lea ina ua fesili mai lo’u peresitene o le siteki pe aisea ou te le fia auai ai i le malumalu, sa ou faamautinoa atu ia te ia e le o le leai o se faatuatua ae o se popolega i le atoatoa e le mafai ona ou faatoilaloina. Sa ou faamalamalama atu foi e ui ina sa ou ola ae i se aiga e faatotonugalemu i le talalelei ma sa ou sailia pea le avea ma soo moni, ae o lenei fefe na taofia ai a’u mai le faia o le isi laasaga.
Sa taofia ai a’u i se tulaga mamao, e ui lava i lo’u manao faamaoni e ulu atu. Sa faalogologo ma uunaia au e lo’u peresitene o le siteki e tatalo ma ole atu i le Atua e aveese le fefe lea na taofia ai lo’u tuputupu ae faaleagaga. A o ou tatalo ma tomanatu i a’u sini mo le tausaga fou, sa ou iloa ai ua oo i le taimi e tuu ai le taofiofia o a’u lava mai faamanuiaga folafolaina a le Atua ona o lo’u fefe ma masalosaloga. Sa ou naunau e auai i le malumalu ma faia sauniga.
O lea sa ou faatuina ai se sini e auai i faamauga ma ta’u atu i lo’u peresitene o le siteki e uiga i a’u fuafuaga.
Faatasi ai ma le agalelei tele, sa ia tali mai ai i upu o loo tumau pea ia te a’u: “Talosia ia faamalamalamaina e le Malamalama o Keriso ou laasaga a o e savalia le ala o feagaiga ma faatoilalo lou fefe.” O nei upu, na faatumulia i le agamalu ma le faatuatua, na ou maua ai le malosi ma le mautinoa e vaai atu ai i lenei asiasiga i le malumalu e le o se luitau ae o se laasaga taua i la’u malaga faaleagaga.
Galulue i le Faatuatua
Sa tatavale lo’u fatu a o ou sauni e o faatasi ma lo’u tina i le malumalu. Sa o se aso na vaneina i lo’u mafaufau o se tasi o aafiaga faaleagaga sili ona taua i lo’u olaga. Sa popole pea se vaega o a’u, ae sa i ai se vaega malosi atu sa tulimatai atu i mea o le a ou lagonaina.
I ni nai minute ae ou te lei ulufale atu i le malumalu, sa faamalamalamaina ai lo’u taeao i se telefoni sa lei mafaufauina. Sa ou mauaina le faamautinoaga o se faatagaga o femalagaaiga sa ou tatalo ai ua iu lava ina faamaonia. Ana le faamaoniaina, semanu ou te misia se taimi faatulagaina taua faafomai i fafo atu o le atunuu.
O lenei talafou o se faamautinoaga faalelagi na faafofogaina e le Alii a’u tatalo. Sa faatumulia lo’u loto i le fiafia tele. Sa ou osooso i le olioli, ma le iloaina e tali mai le Atua i taimi uma ia i tatou, e tusa lava pe foliga mai e filemu o Ia.
I le faamalosia ai ona o lenei mea, sa iu ai ina ou savali atu i faitotoa o le malumalu, lea sa faafeiloaia ai a’u e le peresitene o le malumalu ma lona faletua. Sa la’ua iloa le taua o lenei taimi mo a’u ma sa la iloa le fefe lea na taofia muamua ai a’u. O le la faafeiloaiga ma le faamalosiauga matagofie na aveesea ai tulaga mulimuli o lo’u popole. Sa ou lagonaina moni lava se filemu e le mafaamatalaina.
A o ou auai i faamauga, o upu uma na fiafia i ai lo’u agaga, ma aumaia ai le manino ma le olioli ma faamanatu mai ai ia te a’u sa ou i ai i se nofoaga paia. Ina ua maea le sauniga, sa faafeao atu a’u e le peresitene o le malumalu i le faitotoa e ulufafo ese ai. O lenei faatinoga, sa matuai faigofie lava ae magafagafa, na faamalosia ai le lagona faafeiloai i le maota o le Alii.
Manatunatu i le Taitaiga Faalelagi
Sa ou malamalama sa finagalo le Alii ia mautinoa ou te lei masalosalo i Lona finagalo mo a’u, ma sa oo mai i lo’u mafaufau upu a Peresitene Russell M. Nelson: “Aua nei galo ia i tatou le mea o loo faia e le Alii mo i tatou i le taimi nei. O loo Ia faia Ona malumalu ia mauagofie atili. O loo Ia faatelevaveina le saoasaoa o loo tatou fausiaina ai malumalu. O loo Ia faateleina lo tatou gafatia e fesoasoani ai e faapotopoto Isaraelu. O loo Ia faafaigofieina foi mo i tatou taitoatasi ona faamamāina faaleagaga. Ou te folafola atu o le faateleina o taimi e i ai i totonu o le malumalu o le a manuia ai lou olaga i auala e lē mafai e se isi lava mea ona faia.”
Ua ou iloaina o le malumalu o se sulufaiga moni lava, o se malutaga lea e mafai ona tatou maua ai tali manino ma faamanuiaga e le iu. O lena aafiaga sa suia ai lo’u olaga. Sa fesoasoani mai le Tama Faalelagi ia te a’u e faatoilalo se fefe lea ua leva ona taofia ai a’u, ma sa Ia faamanatu mai foi ia te a’u le taitaiga alofa mutimutivale ua Ia ofoina mai ia i latou o e faalagolago ia te Ia.
Ua tumu lo’u loto i le lotofaafetai, ma ua ou iloa nei o le malumalu o se nofoaga o le a ou toe foi i ai pea lava pea, e sailia le malamalama, taitaiga, ma le filemu.
E alaala le tusitala i Port-au-Prince, Haiti.