Pe a Avea Feagaiga ma Ou Tapasa

I le 2020, sa valaauina ai i ma’ua ma Johnny e auauna atu i le Misiona a Mekisiko Villahermosa. Ona o’o mai lea o le KOVITI-19. Na tuuina atu e le Au Peresitene Sili i faifeautalai le filifiliga e tumau i la latou ulua’i faasologa o taimi ma atonu foi e toe tofia—pe tolopo la latou misiona faatasi ma se avanoa e auauna atu ai i o latou uluai tofiga.

Ina ua mavae le tele o tatalo, sa ou filifili e tolopo ma faaauau le aoga i le Iunivesite o Polika Iaga–Hawaii mo lena taimi.

O le faatalitali na aumaia ai faamanuiaga ou te le’i faamoemoeina. Ina ua iu ina ou oo atu i Mekisiko i le 18 masina mulimuli ane, sa faatoa siitia atu lava Johnny iina mai le Misiona a Las Vegas i Sisifo. Sa iu ina ma i ai i le itu lava lea e tasi mo le silia ma le fa masina ma avea ai ma ni uo lelei.

Ina ua alu Johnny i le fale, sa ma fesootai pea ma tusitusi le tasi i le isi i vaiaso taitasi. I se tasi Aso Gafua, sa ou fesili atu ai ia te ia, “O a nisi o au sini ma miti mo lou olaga?”

Sa ia toe tusi mai, “O se tasi o a’u sini o le faamauina lea i le malumalu ma fai se aiga e ola ae i le talalelei.”

O le faitauina o lena mea, sa ou maua ai se taimi o le manino—sa ou manao e faaipoipo ia te ia! Sa manino ana faamuamua. O le mea moni, afai e fesili mai se tasi ia te a’u i lena lava fesili e tasi, atonu o le a ou fai atu se tala e pei o le “malaga taamilo i le lalolagi” po o le “tamoe i se malafoni maoa’e.” E ui o ni sini aoga nei, ae sa fesoasoani Johnny ia te a’u e vaai po o le a le mea e sili ona tāua.

E ui lava i le vevesi o le faama’i pipisi, toetofia o le misiona, ma le maliu ai o se tasi e pele, sa faaauau pea ona agai i luma Johnny. O ana feagaiga sa lē na o ni pusa e tatogi—o feagaiga sa o se vaega e fusia faatasi ai i le mana, filemu, ma le malosi o le Faaola.

I le taimi o le faama’i, na fesili mai Peresitene Nelson: “O e loto e faamuamua le Atua i lou olaga? O e loto e avea le Atua ma faatosinaga sili ona tāua i lou olaga? Pe o le a e faatagaina Ana afioga, Ana poloaiga, ma Ana feagaiga e faatosinaina mea e te faia i aso taitasi?”

Na mautinoa lava le faatagaina e Johnny o feagaiga a le Tama Faalelagi e uunaia ana faaiuga. Sa tatalo o ia mo le mafanafana i taimi na te lagonaina ai le tuuatoatasi. Sa ia ai ma inu ma le loto i ai i le faamanatuga, ma faaaoga o se taimi e toe faatonutonu ai. Sa ia suesue i tusitusiga paia ma auauna atu i isi auā o auala na sa ia tausia ai ana feagaiga ma lagona ai le latalata atu i le Faaola. Sa alu soo o ia i le malumalu i le tele na te mafaia.

Ina ua maliu se tasi o ona tei i le taimi o lana misiona, sa taofimau Johnny i ana feagaiga o le malumalu e ala i le faalagolago i folafolaga a le Atua. O na folafolaga na faamanatu atu ai ia te ia e faavavau aiga ma o lenei olaga e le o le mutaaga lea.

Ina ua mae’a la’u misiona, sa amata ona ma tafafao faamasani ma Johnny. Mulimuli ane, sa faamauina i maua i le Malumalu o Meza Arizona.

I le tootuli ai i le isi itu o le fatafaitaulaga mai ia te ia, sa le mafai ona o’u taofia lo’u mafaufau pe na faapefea e a ma filifiliga—aemaise lava le tausia o a ma feagaiga—na aumaia ai i ma’ua iinei.

Sa mafai lava e Johnny ona savali ese mai le talalelei. O lona talaaga na tuuina atu ai ia te ia le tele o mafuaaga. Peitai e le’i fiu o ia. Ma o lenei la, ona o lena mea, ua fausia ai lo matou aiga i luga o se faavae o le faatuatua ia Iesu Keriso, o se faavae na faata’atia e Johnny ae ou te le’i feiloai atu ia te ia.

Sa masani ona ou mafaufau o feagaiga ua na o ni folafolaga tatou te faia i le Atua. Ae e ala i le faataitaiga a Johnny, ua ou vaai ai o le ala lea tatou te fesootai ai pea i le Atua ma maua Lona mana e faavavau.

Na aoao mai Elder Dale G. Renlund o le Korama a Aposetolo e Toasefululua: “O le osia ma le tausia o feagaiga o le malumalu, tatou te aoao atili ai e uiga i faamoemoega o le Alii ma maua se atoaga o le Agaga Paia. Tatou te maua le taitaiga mo ō tatou olaga. Tatou te matutua ai i lo tatou avea ai ma soo. … I le faaiuga, e suia o tatou taunuuga ona o le ala o feagaiga e tau atu i le faaeaga ma le ola e faavavau.”

O le tala i le olaga o Johnny ua faamaonia ai e le manaomia ona e sau mai se aiga po o se talaaga “atoatoa” e savalia ai le ala o feagaiga.

E pei ona faasoa mai e Larry R. Laycock i se tusiga i le AM Faalevaiaso: “O nisi o i tatou e o mai mai talaaga ma aafiaga o le olaga e le manaomia, ae o ō tatou tulaga o le olaga e le faamatalaina ai i tatou pe fuafuaina ai o tatou taunuuga. O lo tatou Tama oi le Lagi silisiliese lea e mafai ma o le a siitia i tatou i Ana faamasinoga faalelagi i lugā pe afai o le a na ona tatou o mai lava i Lona Alo, o Iesu Keriso, e ala i le usiusitai ma tausia a tatou feagaiga.”

E te le tau taumafai ia iloaina mea uma lava. Ae e tatau ona e filifilia Iesu Keriso—pea lava pea. I aso ta’i tasi.

Afai e faigata mea i le taimi nei, fesili ifo ia te oe lava: “Faamata e faape’ī foliga pe afai ou te faatagaina a’u feagaiga e taialaina lo’u olaga?”

O le tuu atu i au feagaiga e taiala ai lou olaga e le faapea e tatau ona e atoatoa—o lona uiga e te taumafai pea. E mafai ona foliga mai o le filifili e tatalo pe a e lagona le lofituina, alu i le lotu pe a faigofie atu ona nofo i le fale, po o le faitauina o au tusitusiga paia, e tusa lava pe na o ni nai fuaiupu i le aso. O le faamagalo atu i se tasi tusa pe a faigata, i ai iina mo se uo, pe fai atu leai i se mea e le ogatusa ma ou tulaga faatauaina. O nei filifiliga laiti, faifai pea o le auala lea tatou te ola ai i a tatou feagaiga i lea aso ma lea aso ma le auala tatou te latalata atu ai ia Iesu Keriso.

Pe a e faatagaina au feagaiga e taialaina lou olaga, ua folafola mai e le Alii ia te oe le malosi, filemu, ma le taitaiga. O le a le atoatoa le olaga, ae o lau sootaga faalefeagaiga ma le Tama Faalelagi o le a taitai atu ai pea oe i se mea e sili atu ona lelei.