Toe Mauaina o le Auai i le Malumalu

A o latalata mai le konafesi aoao, sa ou faalogologo ma le popole i failauga, ma le faamoemoe o le a ou lagonaina sina faailoaga o loo alofa pea le Atua ia te a’u e ui lava i a’u mea sese. O le taimi lena na saunoa ai Peresitene Dieter F. Uchtdorf, a’o avea ma Fesoasoani Lua i le Au Peresitene Sili: “E le afaina po o le a le tele o le faaleagaina atoa o o tatou olaga. E le afaina pe mumu ‘ula’ula a tatou agasala, pe matuitui foi le oona, pe tuuatoatasi, tuulafoaiina, po o le nutimomoia e ono oo i ai o tatou loto. … E leai se olaga e matua nutimomoia e le mafai ona le toefuataiina.”

Sa manino lo’u lagonaina na fetalai mai le Atua ia te a’u. Sa ou mafaufau mo ni masina pe faapefea ona toe foi mai ia Keriso, ma o lena savali o le konafesi o Lana valaau lea mo a’u e faia ni suiga e toe ulufale atu ai i Lona maota.

Sa ma feiloai ma lo’u epikopo e talanoa i le toe ulu atu i le malumalu. Sa ia fesoasoani mai ia te a’u ia malamalama i le matafaioi a Iesu Keriso e mafai ona faia i lo’u olaga ma le ala e mafai ai e le taliaina o Lana Togiola ona fesoasoani ia te a’u e tuu atu la’u avega o le tiga ma le agasala ia te Ia. Sa amata ona ou tatalo mo le malamalama, malosi, ma le onosai ia te a’u lava ia. E ala i le faatuatuaina atili o le Atua ma faia sina lelei teisi atu i aso taitasi, sa faasolosolo malie ai lava ona ou toe fesootai ma le malamalama o le Faaola.

O le galulue faatasi ma lo’u epikopo ma le aoao atili e uiga i lo’u Faaola na faalolotoina ai la’u molimau i lo’u faasinomaga o se afafine o le Tama Faalelagi. Ua ou malamalama o le a le fai mai lava lo’u Togiola alofa ia ou vavaeeseina a’u lava mai ia te Ia, ae o le a taumafai Satani e faia ia ou lagona e le tatau ona auai i le malumalu. Faatasi ai ma lenei malamalamaaga, sa iu ina ou lagona le saunia e toe ulu atu i le maota o le Atua.

Faatasi ai ma se pepa faataga fou na gaugau ma uu i lo’u lima, sa ou laa atu ai i le malumalu mo le uluai taimi i le tele o tausaga, sa faafuasei ona ou popole e uiga i lo’u tulaga i le maota o le Atua. O lo’u latalata atili atu i faitotoa o le atili oo mai ai foi lena o le le mautonu ia te a’u. Pe o le a ou foliga faavalevalea ona o le le iloa po o fea e alu i ai po o le a le mea e fai? Pe ua ou matua tele ea e alu i le malumalu mo papatisoga?

Sa ataata le tamaloa i le kesi i luma a o ou ulu atu, ma faaulufale atu a’u i le malumalu. O lena taeao na toe faafouina ai lo’u agaga a o faamautinoa mai e tagata faigaluega o le malumalu ia te a’u lo’u tulaga i le maota o le Atua.

A o ou tuua le malumalu, sa talotalo mai se tasi o le aufaigaluega ia te a’u a o ou savali atu i le auala savali e aluese mai le potu papatiso. Faatasi ai ma se leo musumusu ma le fiafia, na ia faapea mai, “Faafetai mo lou sau i le malumalu i le asō—sa matou manaomia oe iinei!” Sa ou folafola atu ia te ia o le a ou toe foi mai i le vaiaso na sosoo ai a o ou tulimatai atu i le toe lagonaina o le mafanafana o le malumalu.

Ona o o tatou faasinomaga paia o ni afafine ma ni atalii o ni matua faalelagi, ua mafai ai e i tatou taitoatasi ona maua le auai i le malumalu. E leai se mea e mafai ona taofia tumau ai i tatou mai le aapa atu ma le alofa o le Atua pe afai tatou te mananao ia i ai i Lona afioaga. E finagalo o Ia ia tatou i ai iina, ma a o tatou faia ni laa laiti ia avea atili ai e faapei o lo tatou Faaola i aso taitasi, e mafai ona tatou faaogatusa o tatou olaga ma Lona soifuaga ma tumau pea le agavaa mo le malumalu. Ou te iloa ona o le Togiola a Iesu Keriso, ua mafai ai ona tatou ulu atu i le maota paia o le Atua ma maua faamanuiaga o loo faatalitali mai mo i tatou i totonu.

Ma e pei ona ou oo i ai, o na faamanuiaga e matuai aoga ai taumafaiga uma.