Mai le AM Faalevaiaso
E Mafai Faapefea Ona Ou Agai i Luma i le Ala o Feagaiga Pe Afai Ou te Le’i Faaipoipo Lava?
Ina ua ou lagonaina le le mautonu i luga o le ala o feagaiga, sa ou soso latalata atu ia Keriso.
O a’u o se tagata e faia ni lisi [o mea e fai] ma faailoga faasa’o [pe a uma ona faia]. Ou te fiafia e fai ni pusa ma faailoga faasa’o [pe a uma ona fai o se mea].
E aoga tele a’u lisi o mea e fai ina ua manaomia ona ou tapena mo se tafaoga, tapena le fale, pe siaki a’u meaaoga e fai i le fale. Ae o le faia o se lisi o mea e fai o lo’u alualu i luma faaleagaga e oo mai ai le popole tele.
Ona e i ai lava le pusa e tasi e le mafai ona ou faailoga faasa’oina i le taimi nei: o le pusa "Ia faaipoipo i le malumalu".
Ona ou te nofofua, e faigofie ona lagona e pei o loo ou mau i le va o feagaiga o le faaeega paia ma le faamauga. O le fasifuaitau "ala o feagaiga" o loo ta’u mai ai e tatau ona tatou o i luga o le ala—ona agai pea lea i luma.
O le faamalosiau a Peresitene Russell M. Nelson (1924–2025) ina ia "faatumauina le malosiaga lelei faaleagaga" e faʻamanatu mai ai se ata faalemafaufau faapena o le agai i luma.
Ae ona o le faamauina i totonu o le malumalu o se faaiuga a tagata-e-toalua, o nisi taimi ou te lagona ai e pei ua ou so’aina se pa ua lokaina. Ou te popole o le a uma lou malosiaga faaleagaga a o ou faatali mo le faitotoa ia matala. Pe mafai ona ou agai pea i luma i luga o le ala o feagaiga pe a le mafai ona ou osia i le taimi nei la’u feagaiga e sosoo ai?
O le tali i o’u popolega na oo mai e ala i le malamalama atili i le ala o feagaiga.
Agai i Luga
Ina ua ou mafaufau i le ala o se lisi o mea e fai po o se laina sa’o o maa-e laa ai luga—papatisoga, faamauga, sauniga amata, faaeega paia, faamauga—sa lei pei sa i ai se isi mea e mafai ona ou faia i le va o sitepu [laasaga].
Ae na suia la’u vaaiga ina ua ese le faamatalaina e Elder Dale G. Renlund o le Korama a Aposetolo e Toasefululua o le ala: "O le auala sili e vaai faalemafaufau ai i lenei faagasologa o le vaai faalemafaufau lea i se auala umi e alu a’e ai i luga o se mauga. Afai e te vaai i lenei auala mai se nofoaga maualuga, pau le mea e te vaai i ai o se taamilosaga mafolafola. Ae peitai, afai e te vaai i le auala mai le itu, e te vaaia ai se taamilosaga e agai i luga."
I se isi faaupuga, o le ola ai i le talalelei e le faapea o le a alu faataamilomilo lava—pe na o le agai lava i luma. O lona uiga o le agai i luga, agai atu i le lagi. O laa uma i luma, tetele pe laiti, e te latalata atili atu ai i le Faaola.
Mulimuli ane, sa faamatalaina e Elder Renlund le alualu i luma faaleagaga o se faagasologa faifai pea ma le taua—o le ola ai pea lava pea i le talalelei a Keriso, faaleleia atili o i tatou lava ma faalatalata atili atu ai i le Faaola i taamilosaga taitasi.
Matau le upu na te lei faaaogaina: lisi o mea e fai. O le talalelei a Iesu Keriso e le o se mea e te faia i le taimi e tasi ona faailoga faasa’o lea [ua uma]. O le avea ma soo o se mea e te ola ai i aso uma.
Ma e tusa lava po o fea o e i ai i luga o le ala o feagaiga, e mafai lava ona e latalata atili atu ia Keriso. E leai ni papupuni i Lona alofa.
Latalata atili atu ia Keriso
A o ou faatalitali ma le faamoemoe mo se faaipoipoga i le malumalu, ou te maua le malosi i le tala i le tinamatua o Elder Renlund. Sa nofo o ia i Finelani a o lei taitai ona fausia se malumalu iina, o lea na te le’i maua ai ona faaeega paia pe faamauina i lona aiga i lona olaga atoa. Ae, sa "ola [o ia] e pei ua uma ona ia osia nei feagaiga," na tuuina atu ia te ia le malosi e onosaia ai mala patino i lona olaga.
E ui e le mafai ona ou osia le feagaiga o le faamauga i le taimi nei, ae e mafai ona ou ola e pei ua uma ona ou faia. E mafai ona ou galue i le atiina ae o uiga faaKeriso. E mafai ona ou alu i le malumalu i le tele e mafai ai ma faafou feagaiga na ou osia e ala i le tagofia o le faamanatuga i vaiaso taitasi. E mafai ona ou faia lo’u avea ma soo o se mea ua ou i ai, ae le na o se lisi o galuega ou te faia.
Ma le isi, o le feagaiga o le faamauga e tulaga ese lea e mafai ona e auai i faamauga sui ae e te lei faamauina mo oe lava. Ou te fiafia i le mafai ona ou vaai ma faalogo i le sauniga mo au lava ia ina ia ou iloa tonu le mea e manaomia e le feagaiga, ma ou te fiafia i le mafai ona ou lagona le olioli o aiga e faavavau a o ou tootuli i le fatafaitaulaga e fai ma sui o o’u tuaa. O nisi o o’u taimi sili ona mamana faaleagaga i totonu o le malumalu na tutupu i le taimi o sauniga o faamauga.
O nei mea uma ua fesoasoani ou te faafailele ai se sootaga vavalalata ma lo’u Faaola, o se faamanuiaga faapelepele lea pe ou te osia le feagaiga o le faamauga i lenei olaga pe leai. O le liliu atu ia te Ia o se malosiaga lelei faaleagaga, ma afai lava ou te agai atu pea ia te Ia po o le a lava le mea ou te mafaia, o le a Ia le taofia lava au mai Lona alofa.