E Faapitoa mo Ulugalii Fou
O Auala e 3 e Mafai ai e le Auai i le Inisitituti ma Lou Toalua ona Faamalosia Lau Faaipoipoga
O le aveina o vasega inisitituti ma lo’u toalua na fesoasoani e siitia ai lo ma sootaga faaleagaga, fesootaiga, ma le tautinoga i le tasi ma le isi.
"Aisea e tatau ai ona ou auai i le inisitituti pe afai ua ou faaipoipo?"
O se fesili aoga. A o avea au ma se talavou nofofua matua i le kolisi, sa fesoasoani le inisitituti ia te au e faamalosia la’u molimau, fai ni uo, saili ni tagata e tafafao faamasani, ma fiafia i meaai mauafua! O le taumafanafana na amata ai ona ma tafafao faamasani ma lo’u toalua o Johnny, sa ma aveina faatasi ni vasega inisitituti.
Ae ma te lei iloaina i lena taimi le auala o le a fesoasoani ai na vasega e faataatia se faavae mo le ma faaipoipoga.
O lea la ua ma faaipoipo, ua suia a ma mafuaaga mo le auai i le inisitituti, ae o loo taua pea. E pei ona faamanatu mai e le faletua o Peresitene Russell M. Nelson, o Sister Wendy Nelson, "O le fatuina o se faaipoipoga malosi ma le fiafia e le faigofie! … Ae o le a aumaia ia te oe le olioli!"
O le i ai o se faaipoipoga e faatotonugalemu ia Keriso e manaomia ai le galue, ae o le olioli lea e sau mai le aoaoina ma le tuputupu ae faatasi i le talalelei e le mafuatiaina.
O le auai faatasi i le inisitituti o le ki lea i le fesoasoani i le manuia o le ma faaipoipoga. O auala nei e tolu e mafai ona faamalosia ai lau faaipoipoga:
1. Siitiaina o Au Fesootaiga
O fesootaiga e taua tele i le faaipoipoga, ma ua fesoasoani le inisitituti ia i ma’ua ia avea ma ni tagata fesootai lelei atu. Ma te fefaasoaai malamalamaaga, fai fesili, ma talanoaina lesona. O lenei mea e tatalaina ai le faitotoa i talanoaga anoa e uiga i a ma’ua molimau, sini, ma le lumanai—e faalolotoina ai lo tatou sootaga faalelagona i le taimi lava e tasi. O se sootaga malosi atu e mafai foi ona fesoasoani i isi vaega o le faaipoipoga, e pei o le puleaina o feteenaiga, agaalofa atili, ma le faaleleia o le faigapaaga atoa.
E pei ona faamalamalama mai e Elder Marvin J. Ashton (1915–1994) o le Korama a Aposetolo e Toasefululua, "Afai o le a tatou iloa le alofa moni ma le malamalama o le tasi i le isi, e tatau ona tatou iloa o fesootaiga e sili atu nai lo le faasoaina o upu. O le faasoaina atu ma le atamai o lagona, faalogona, ma atugaluga."
2. Fafagaina o Ou Sootaga Vavalalata Faaleagaga
O sootaga vavalalata faaleagaga e oo mai pe a tatou faia mea e pei o le tatalo, suesue i tusitusiga paia, aai ma feinu i le faamanatuga, pe auai faatasi ma o tatou taitoalua i le malumalu—i soo se taimi lava tatou te faia ai se mea e valaaulia ai le Agaga i o tatou olaga. Ma o le inisitituti o se tasi lea o nofoaga e mafai ona tatou faia ai lena mea!
O le suesueina faatasi o le talalelei e taitai atu ai i tatou e toe manatunatu i o tatou aafiaga ma le auala e faaaoga ai mataupu faavae tatou te aoaoina. E fesoasoani lenei mea ia i tatou e faatutu ai ni sini faaleagaga e galulue faatasi ai, e pei o le faalauteleina o o tatou valaauga ma le auai soo atu i le malumalu.
Ua aoao mai i tatou e le Mosaea 18:21 ina ia "fili faatasi o [tatou] loto i le lotogatasi ma le alofa o le tasi i le isi." O le inisitituti e mafai ona fesoasoani ia i tatou e tuufaatasia ai o tatou loto ma mafaufau ia Keriso.
Faaaoga mea ua e aoaoina i le inisitituti e talanoa atili ai i mataupu faaleagaga, saili ni auala e faalatalata atili atu ai i le Atua, ma valaaulia le Agaga Paia i lau faaipoipoga.
3. Faamalosia o Lau Tautinoga e Tausi Feagaiga
Ua fesoasoani le inisitituti ia i ma’ua ma Johnny e manatua ai a ma’ua feagaiga o le malumalu. O lesona e taulai atu i mataupu faavae e faavavau ma faamanatu mai ia i ma’ua tautinoga na ma faia i le tasi ma le isi ma i le Atua. O le manatunatu i a ma’ua feagaiga e fesoasoani ma te faia ai filifiliga e faamamalu ai na folafolaga. E pei ona sa aoao mai Peresitene Nelson (1924–2025), "O le nofoaga sili ona saogalemu ina ia i ai faaleagaga o le ola lea i totonu o au feagaiga o le malumalu!"
E faigofie ona faalavelaveina i le olaga o aso taitasi, ae o le inisitituti e mafai ona fesoasoani ia i ma’ua e tumau ai le taulai atu ia Iesu Keriso ma a ma’ua feagaiga o le malumalu.
Mafaufau pe mafai faapefea e le auai i le inisitituti ona fesoasoani ia te oe e faamamalu au feagaiga. Atonu e faataatia ese se taimi e talanoa ai pe faapefea ona faatatau lesona i lau faaipoipoga ma tautinoga ua e faia i le tasi ma le isi ma i le Atua. Mafaufau pe faapefea ona tausia na feagaiga i le olaga i aso uma, ma faaaoga le inisitituti e toe tautino ai i na folafolaga.
O Se Meafaigaluega Mamana mo Lau Faaipoipoga
O le inisitituti e mafai ona fesoasoani e te tuputupu ae ai faaleagaga, faalelagona, ma i lau tautinoga i le tasi ma le isi. Na saunoa mai Peresitene Nelson: "O le auai i le inisitituti o le a fesoasoani e te lagona atili ai le alofa tele o le Tama Faalelagi mo oe. … O le auai i le inisitituti o le a fesoasoani ia te oe e ola ai i le talalelei ma lagona atili ai le olioli—i le taimi nei."
O le faaavanoaina o le taimi mo le inisitituti ua faamalosia ai le ma faaipoipoga. Ou te iloa e mafai foi ona faia lea lava mea e tasi mo oe. Pe faatoa lua faaipoipo pe ua lua faatasi mo le tele o tausaga, e mafai ona avea o se meafaigaluega mamana mo le fausiaina o se sootaga e faatotonugalemu ia Keriso.