O Le Auala na Aoao ai Au e La’u Misiona i le Olioli o le Kerisimasi

Sa ou auai i Le Ekalesia a Iesu Keriso o le Au Paia o Aso e Gata Ai i le fa tausaga ua mavae, ma e na o au lava le tagata o lo’u aiga. O o’u matua, o’u uso e, ma a’u sa le’i ola ae o ni Kerisiano, o lea a o avea le Kerisimasi ma se alofaga lelei mo i maua e malaga ai pe fiafia i se taumafataga manaia, sa lei taua tele ia i matou.

Ae sa saunia e le Tama Faalelagi se ala mo au e aoao ai Lana talalelei ma auai i Lana Ekalesia. I le avea ai ma se faifeautalai, o lo’u faamoemoega o le fesoasoani lea i isi ia o mai ia Keriso. O se avanoa tulaga ese mo au e malamalama ai i le uiga moni o le Kerisimasi.

E toatele naua isi tagata o e mafaufau i le Kerisimasi i le ala sa ou masani ai. Atonu latou te iloa o se aso malolo, ae latou te le iloa i taimi uma le uiga o i tua atu. Atonu latou te le iloa po o ai Iesu Keriso. Ae mo au, ua avea le taimi o le Kerisimasi ma se vaitau e faasoa atu ai i tagata uma le tala fiafia o loo i ai so tatou Faaola.

Na aoao mai Elder S. Mark Palmer o le Fitugafulu, "E sili atu le taua nai lo auro, pulu lipano, po o le pulu muro, o le molimau mama a’ia’i ia Iesu Keriso o lo tatou Faaola patino ma le Togiola o le totonugalemu lea o mea uma tatou te faamanatuina i le Kerisimasi."

Ou te matua faafetai lava ona i le avea ai ma se faifeautalai sa ou faaaluina lau Kerisimasi e le na o le faamanatuina o la’u molimau ia Iesu Keriso ae faasoaina atu o la’u molimau ma isi.

I le taimi o se misiona, e te le o taulai tele atu ia te oe lava ae o le auauna atu i isi. Ou te lagona e pei ua ou mafaufau atili i isi i le taimi nei. O le mafuaaga lena ua matua fiafia ai le Kerisimasi mo au.

Atonu e tuuatoatasi isi tagata, manaomia le fesoasoani, pe na o le lagonaina o le malulu faaleagaga i lenei taimi o le tausaga. Ae ona o Iesu Keriso, ua ou maua ai ni lagona mafanafana o le olioli ma le alofa i lo’u loto. O le avea ma se faifeautalai na tuuina mai ai ia te au ni avanoa e fesoasoani ai i isi ia lagona o’u lagona e uiga i lo’u Faaola.

I le Kerisimasi talu ai, sa ma asiasi atu ai ma la’u soa i le Masini Foai a le Ekalesia i Hong Kong. O le faalauiloaga o auaunaga i le Malamalama o le Lalolagi o se avanoa matagofie lea e tausia ai isi ma faasoa atu le olioli o le Faaola ia i latou.

Na saunoa Elder Gerrit W. Gong o le Korama a Aposetolo e Toasefululua i se tasi taimi, "O le Kerisimasi e faamanatu ai le auai i feagaiga, fesootaiga, ma le nuu ia Iesu Keriso ma le tasi ma le isi." Tatou te faamanatuina le Kerisimasi e fesoasoani ia i tatou ia manatua Iesu Keriso, o le e faafesootaia i tatou uma. Pe a tatou auauna atu i isi, tatou te latalata atili atu i le tasi ma le isi ma tatou te latalata atili atu ai ia te Ia.

E ui lava i le olioli uma o le taimi o le Kerisimasi ma le olioli lea e oo mai i le faasoaina atu o le talalelei, o aso malolo e mafai ona faigata a o auauna atu i se misiona. O le ma’i manatu i le aiga po o le fefe i le misia o le faaaluina o le taimi ma uo ma aiga o ni lagona moni ia.

Ae o loo poloaiina oe e le Alii e fai Lana galuega. Afai o loo e lagonaina le faanoanoa i le taimi o lau Kerisimasi faafaifeautalai, o la’u fautuaga o le mafaufau ia Iesu Keriso.

Na afio mai le Faaola i le lalolagi ma le lotomaualalo. Sa Ia tuua Lona aiga faalelagi ma afio mai i le lalolagi e fai le galuega a Lona Tama. Sa Ia ositaulagaina o Ia lava e togiola i tatou uma. Atonu e foliga mai e tuuatoatasi lena mea, ae sa faatasi le Tama Faalelagi ma Ia.

Ma e tutusa lava pe a e auauna atu i se misiona. E le o tuua na o oe. E ui lava atonu e te mamao ese mai lou aiga, ae o loo i ai pea lou Tama oi le Lagi ma lou Faaola iina faatasi ma oe. E ala mai ia i La’ua, o le a e maua ai le malosi e faatoilalo ai ou luitau.

A o ou auauna atu i la’u misiona, sa ou lagonaina le alofa tele. O la’u sootaga ma le Atua ma Iesu Keriso ua sili atu ona latalata i le taimi nei. Ou te iloa e matua mitamita lava i La’ua ia te a’u mo le faia o la La’ua galuega. O le galuega aupito silisili i le lalolagi.