“Fesuia’i le Lofituina mo le Paia i Lenei Vaitau o le Kerisimasi,” Liahona, Tes. 2025
Mai le AM Faalevaiaso
Fesuia’i le Lofituina mo le Paia i Lenei Vaitau o le Kerisimasi
Ae faapefea pe afai tatou te faagata le taumafai e faaatoatoa le Kerisimasi ae nai lo lena, tatou te faatumuina i le paia?
Ata na tusia e Nicole Choi
Pe na e tagi ea i se laau Kerisimasi?
Ua tupu ia te a’u lena mea. Tuua’i lava i aafiaga o le faama’i o le maitaga, ae na maligi loimata ina ua ta’u mai e lo’u toalua ia te a’u e tatau ona toe faafoi atu le ma laau fou ona o ni faaletonu i moli.
Ina ua ia tauina mai lena tala, na pau lava le mea na mafai ona ou mafaufau i ai o le faitau selau o tagata i luga o ala o faasalalauga faaagafesootai o e sa vave ona i ai a latou laau, sa i ai lava i le ala sa’o a latou fuafuaga o le Kerisimasi.
O lenei tala atonu e foliga mai e faavalevalea ia te oe e pei foi o a’u ia. Ae e faafia ona tatou faamamafatuina le tulaga ia tausisa le tutusa ma isi tagata, e tusa lava pe le mafai ona tatou gafatia mea tautupe, faalelagona, pe faaletino?
E leitioa a lagona e le toatele o i tatou sina lagona o le vaivai tele (ma sau ai le musu).
Ae nai lo le faatumuina o la tatou vaitau o le Kerisimasi i le atuatuvale o le taulimaina o faamoemoega lē talafeagai, e mafai ona tatou faatumuina i le paia.
O le Po Paia
O le uluai Kerisimasi atonu na lagonaina le mamao mai le atoatoa.
I le vaega muamua, o le fanauina mai o Iesu Keriso i se fale o manu e mautinoa lava e le o se vaega o le fuafuaga a Maria.
Na te lei fanauina Iesu i lona nuu. Sa lei i ai foi o ia i se faletalimalo tumu. Nai lo lena, sa ia fanauina lana pepe i se fale o manu, e foliga mai o ni povi po o ni asini sa latalata ane.
Na saunoa Sister Bonnie H. Cordon, o le sa avea muamua ma Peresitene Aoao o Tamaitai Talavou: “O le faalogo atu i le valaaulia a le agelu ia ‘aua le fefe’ ae o lea ua saunia nei mo le fanau mai o Iesu, sa mafai ai e [Maria ma Iosefa] ona lafoai soo se faamoemoega mo le toafimalie e nonofo ai, ae sa faamautu i se fale filemu, ma maualalo. Ae o se mea atonu na pei o se nofoaga faalē’anoa o le a le tumau ai. O le a le pine ae faatumulia e le Alii lena gaogao ‘i’i i le pa’ia.”
Atonu na manatu Maria o lenei po sa mamao lava mai le tulaga atoatoa lelei—aemaise lava mo le fanau mai o se pepe tāua faapena. Ae tatou vaai faalemafaufau i le paia atonu na faatumulia ai le fale o manu ma lona loto a o ia faafeiloaia le Alo o le Atua.
Tatou tauloto pe na faapefea e Maria ona “fanau e ia lana tama ulumatua, ua ia aui ia te ia i le ie, ma faataoto ia te ia i le fale povi; auā latou te le ofi i le fale e tali ai malo” (Luka 2:7).
O vaega le atoatoa o lena po na faapaiaina e ala i le Pepe Paia.
Faatumuina i le Paia
O le a la le mea e fai e lenei mea i le lagonaina o le vaivai mai le taumafai e faatumauina le Kerisimasi lelei lea tatou te manatu e tatau ona tatou maua?
E pei o Iosefa ma Maria, e mafai foi ona tatou laa ese mai faamoemoega tatou te faia ma avega ia i tatou lava, ma faatagaina Keriso e faatumuina i tatou i Lona paia.
E le leaga le teuteuina o le Kerisimasi, le faafesuiai o meaalofa, po o le faia o ni pati o aso malolo. Ae a tatou uunaia i tatou lava e faafetaiaia faamoemoega ua mafaufauina mo se Kerisimasi atoatoa, ona tatou le iloa ai lea o le mea e sili ona taua.
Pe a e tuuina le fetu i luga o le laau, e te manatua le fetu fou na susulu i le soifua mai o Keriso? Pe a e tautau i luga manoa o moli, e te manatua le Malamalama o le Lalolagi? Pe a e afifiina meaalofa i se pepa iila, e te manatua o Iesu Keriso o le meaalofa silisili ua tuuina mai?
Na valaaulia i tatou e Elder Gerrit W. Gong o le Korama a Aposetolo e Toasefululua ina ia aumaia le paia atili i o tatou olaga—ma o le vaitau o le Kerisimasi o le taimi sili lea ona lelei e amata ai. Na ia aoao mai, “O le Paia i le Alii e ioe i le paia ma le migao, ioe i lo tatou avea ma tagata silisili aupito saoloto, sili ona fiafia, sili ona faamaoni, a o tatou mulimuli ia te Ia i le faatuatua.”
E ala i le faia o se avanoa mo le paia atili i lo’u vaitau o aso malolo, ua ou saoloto ai mai faigata o le vaitau. O se taunuuga, e mafai ona ou ofoina atu lo’u tagata sili ona lelei ia Keriso i lenei Kerisimasi ma mafaufau loloto moni i le paia ma le filemu Na te aumaia i lo’u olaga.
Atonu la ua oo i le taimi e iloilo ai lau lisi o mea e fai ma tuu le paia i le pito i luga.
E te le manaomia ni ofu faafetaui, mea teuteu veloveta, po o ni ula teuteu e gaosia e oe lava. E le afaina pe afai e te le o aumaia i le fale se tagata taua mo aso malolo, pe afai e te misia nisi o faafiafiaga ona o loo e suesue, pe e te le o fuafuaina foi lou olaga.
Ma e le afaina pe afai e le o i se tulaga lelei lau laau Kerisimasi.
Pau lava le mea e te manaomia o Ia.