Mai le AM Faalevaiaso
O se Mea na Aoaoina ai Au e se Faalavelave i le Kerisimasi, e Uiga i La’u Sootaga Faalefeagaiga
O meaalofa gaoia ma se tu masani fou faaleaiga na fesoasoani ou te iloa ai le taua o le faafaileleina o la’u sootaga faalefeagaiga ma le Tama Faalelagi.
Ata na tusia e Stephen Neilsen
Sa ou ola ae i Amerika Samoa o se fanau e toa 13. Sa matou nonofo uma i se tama’i fale e tolu potumoe i le nuu o Leone. O le Kerisimasi sa faapitoa lava mo lo matou aiga—o se taimi e toe manatunatu ai i le soifua mai ma le Togiola a Iesu Keriso ma se taimi e auauna atu ai ma foai atu.
I se tasi vaitau o le Kerisimasi, ina ua uma ona galulue malosi ma sefe, sa faatau mai e o’u matua mo i matou taitoatasi se meaalofa ma tuu i latou i lalo o le laau. Sa matou matua’i fiafia ai lava!
Ae a o lei taunuu mai le Kerisimasi, sa fafagu i matou e lo’u uso matua i se tasi taeao ma se tala faanoanoa: Ua gaoia meaalofa taitasi uma lava. Sa talepe ma oso mai totonu se tasi i le po ma ave uma meaalofa.
Mai lena aafiaga o le loto nutimomoia, sa fanau mai ai se tu masani fou. O Kerisimasi uma ina ua mavae lena, matou te momoe faataamilo i le laau Kerisimasi e puipui a matou meaalofa.
E pei o le tulaga malie ma le matautia e pei ona i ai lena manatuaga, na aoaoina ai a’u e sili atu nai lo le faaeteete e uiga i meaalofa o le Kerisimasi—na faamanatu mai ai ia te a’u le taua o le malupuipuia ma le faamuamua o la tatou sootaga faalefeagaiga ma le Tama Faalelagi.
O Se Faamanatu o la Tatou Sootaga Faalefeagaiga
E aoao soo mai lava Peresitene Russell M. Nelson e uiga i le taua o feagaiga. Na ia saunoa mai: “O le osia o se feagaiga ma le Atua e suia ai lo tatou sootaga ma Ia e faavavau. E faamanuiaina ai i tatou i se fuataga faaopoopo o le alofa ma le alofa mutimutivale. E aafia ai ituaiga tagata e i ai i tatou ma le auala o le a fesoasoani mai ai le Atua ia i tatou ia avea ma tagata e mafai ona avea ai i tatou.”
E pei lava ona puipuia e lo’u aiga a matou meaalofa, o la tatou sootaga faalefeagaiga ma le Tama Faalelagi o le sootaga aupito taua lea e mafai ona tatou maua. E tatau ona tatou faatauaina. Ae e faapefea ona tatou faia lena mea i se lalolagi e tumu i mea faalavefau? O ni nai manatu nei na fesoasoani ia te a’u:
1. Faavae (ma Faamautu) Au Mea Taua E Le Mafai ona Suia
A o avea ma se talavou matua o tau faatulaga le aoga, lakapi, ma tafaoga faamasani i le Iunivesite o Brigham Young, sa masani ona ou lagonaina le lofituina. O le taimi lena na ou iloa ai e tatau ona ou setiina ni “mea taua e le mafai ona suia” —o mea e faamuamua o le a ou tuuto atu i ai e tusa lava po o le a.
O le faaaluina o le taimi faatasi ma le Alii ma le taulai atu ia Iesu Keriso na avea ma se tasi o a’u mea taua e le mafai ona suia. O taeao uma lava e i ai so’u taimi faatulagaina ma le Alii lea ou te talai atu ai tusitusiga paia ma sāvali aupito lata mai o le konafesi aoao. O lenei faiga masani i aso taitasi ou te maua ai ni aafiaga laiti faaleagaga ma seti ai le agaga mo lo’u aso.
Na saunoa mai Peresitene Nelson, “O le taimi lenei mo i tatou e fai ai lo tatou avea ma soo o la tatou faamuamua aupito maualuga.” O le faamuamuaina o taimi ma le Alii e le aveesea ai luitau po o mea faalavefau o le olaga—ae e fesoasoani ia te a’u e taulimaina ai faatasi ma Lona malosi.
Na aoao mai foi Peresitene Nelson, “O lou mulimuli o oe lava ia i le Faaola o lona uiga e te mauaina Lona mana faamalosiau ma togiola.” Pe a e faavaeina au lava mea taua e le mafai ona suia ma faamuamua lau sootaga faalefeagaiga ma le Alii, o le a sili atu ona mafai ona taulimaina ou luitau ma o le a e maua ni aafiaga faamalosiau faaleagaga i aso uma.
O le a la ni vaega e avea ma au oe lava mea taua e le mafai ona suia? E mafai faapefea ona e mautinoa e faamuamua lau sootaga ma le Atua i aso uma, aso uma, aso uma?
2. Tuu I Ai I Totonu Galuega Faaleagaga.
O le faatulagaina o mea taua e le mafai ona suia ua na o se amataga; e manaomia foi ona tatou faia le galuega faaleagaga. O nisi taimi tatou te iloa ai le mea e fai—faitau tusitusiga paia, tatalo, auai i le lotu—ae leai se uunaiga. Sa faapena foi o’u lagona.
Na aoao mai Elder David A. Bednar o le Korama a Aposetolo e Toasefululua, “O le faatuatua ia Keriso e taitai atu ai i faatinoga amiotonu, lea e faateleina ai lo tatou gafatia faaleagaga ma le mana.”
Pe a oo ina ou le maua le uunaiga e faia le galuega faaleagaga, ou te tatalo mo le manao ma le malosi e faatino ai. Ma a ou faia, ou te matauina le va o a’u lava ma le Alii e tapunia. O la’u sootaga faalefeagaiga ma le Tama Faalelagi, e pei o soo se sootaga, e manaomia ai taumafaiga. E le o se lisi o mea e fai ae o se faagasologa ou te faafaileleina i lo’u olaga atoa.
3. Saili Avanoa e Auauna Atu Ai
A o ou faamalosia la’u sootaga faalefeagaiga ma le Tama Faalelagi ma Iesu Keriso, e masani ona taialaina a’u e le Agaga e auauna atu i isi. O lena taitaiga e faalolotoina atili ai la’u sootaga ma le Atua. E le faatali le Agaga mo le Kerisimasi—e mafai ona tatou auauna atu i aso uma i o tatou aiga, lotu, ma nuu.
I se lalolagi ua tumu i le faaesea ma le faamutaina o sootaga, o se tasi o auala sili ona lelei e lagona ai le fesootai atili o le vaavaai lea i fafo atu o i tatou lava ma auauna atu i isi. E pei ona molimau mai le Tupu o Peniamina, pe a tatou auauna atu i isi, ua tatou auauna atu i le Tama Faalelagi (tagai i le Mosaea 2:17).
Pe a tatou faasamasamanoa i a tatou sootaga faalefeagaiga, o le a tatou le maua lo tatou tomai e faia moni ai se eseesega i le lalolagi. E pei ona aoao mai Elder Bednar, “O faatinoga uma o auaunaga lē manatu faapito tatou te tuuina atu e fesoasoani tatou te faamasani atili ai i le Matai o loo tatou fai ma sui ma o faatinoga uma e faalatalata atili atu ai i tatou ia te Ia.” A o tatou saili atu ma le mataalia i auala e auauna atu ai, e le gata ina tatou faamanuiaina olaga o isi ae faapea foi ona faamalosia ai lo tatou lava sootaga ma le Tama Faalelagi, ma faamalosia ai la tatou tautinoga i a tatou feagaiga.
Tuu Atu i Au Feagaiga e Taialaina Lou Olaga
E pei lava ona tatou puipuia a tatou meaalofa, e manaomia ona tatou puipuia ma faamuamua la tatou sootaga faalefeagaiga.
O le toatele o i tatou e feagai ma faaiuga tetele—e uiga i le aoga, tafaoga faamasani, galuega, po o misiona. E faigofie ona lagona le le mautonu po o le le atoatoa. Pe a ou lagona faapena, ou te tuu atu i a’u feagaiga e taialaina a’u.
O le a se tala a au feagaiga o le papatisoga ma le malumalu i le mea e fai? O a faamanuiaga ua folafola mai e le Atua ia te oe?
Pe a e faamuamuaina lau sootaga faalefeagaiga, o le a amata ona faatulagaina isi mea uma. Na faasoa mai Peresitene Nelson, “O le olioli tatou te lagonaina e itiiti lava se mea e faatatau i tulaga o o tatou olaga ao mea uma o loo faatatau i le taulaiga o o tatou olaga.” Ma o le lagonaina o le alofa ma le olioli o le Faaola e mautinoa lava o le meaalofa sili lea o le Kerisimasi e mafai ona tatou maua.