Mai le AM Faalevaiaso
O Auala e 4 e Faamanatu ai Keriso i le Tausaga Atoa
I le Kerisimasi, tatou te faamanatuina le soifua mai o Keriso. E mafai faapefea ona tatou faamanatuina lona soifuaga atoa?
Pe le o se mea manaia le faamanatuina o le Kerisimasi i le tausaga atoa?
O meaai manaia, o teuteuga matagofie, o tu masani malie, ma le mea e sili ona taua, o le avanoa e taulai atu ai ia Iesu Keriso.
O le tala fiafia: E le faapea ona e sau ma alu le Kerisimasi e le faapea e le mafai ai ona e faamanatuina pea le Faaola. E mafai ona faamamaluina galuega ma aoaoga a Keriso i le tausaga atoa! O auala nei e fa e taulai atu ai i le manatuaina pea o Ia, i tua atu o le vaitau o le Kerisimasi.
1. Saili ia Iloa o Ia
O le soifua mai o Iesu Keriso o se faaaliga paia o le alofa o le Atua mo Lana fanau, ma e pei o leoleo mamoe i Peteleema, e tatau ona tatou faamamaluina moni lava lena po paia.
Ae o le tasi vaega o tagata i le tala o le Kerisimasi—le Au Makoi—e lei taunuu i le po na soifua mai ai Keriso. Sa latou mauaina o Ia mulimuli ane. Atonu e tele ni masina po o ni tausaga foʻi na alu ai la latou malaga! Ae na latou naunautaʻi e tapuaʻi i lo latou Tupu, e tusa lava po o le ā le umi. E mafai foi ona tatou sailia le Faaola i tua atu o le taimi o le Kerisimasi.
Na aoao mai Peresitene Russell M. Nelson, "O le tele o lou aoao e uiga i le Faaola, o le faigofie foi lena ona faalagolago i Lona alofa mutimutivale, Lona alofa e le uma.” E mafai ona e saili e aoao atili e uiga ia Iesu Keriso e ala i le tatalo ia lagonaina Lona alofa, suesue i Lona soifuaga i tusitusiga paia, ma osia feagaiga ma Ia.
2. Maua le Malosi Faaleagaga e ala i le Anapogi
A o lei amataina Lana galuega, sa anapogi Iesu mo aso e 40 i le vao. O le taimi lea na saunia ai o Ia e tetee atu i faaosoosoga uma na tuu atu i Ona luma ma aoao atu “i le mana o le Agaga” (Luka 4:14) i Kalilaia.
E te le tau anapogi mo le 40 aso soso’o e mulimuli ai i Lana faataitaiga, ae e moni lava le mataupu faavae: O le lafoai o manaoga ma mausa faalelalolagi e maua ai le avanoa sili atu mo le Faaola ma le Agaga i lou olaga.
Na faamalamalama mai e Peresitene Henry B. Eyring, Fesoasoani Lua i le Au Peresitene Sili, o le anapogi e aumaia ai ia i tatou le “mana e maua ai musumusuga ma le malosi sili atu e tetee atu ai i faaosoosoga.” O le tausia o le poloaiga ia anapogi soo o le a fesoasoani e te taulai atu ai ia Iesu Keriso ma faatagaina o Ia e faamanuia oe ma tagata e te anapogi ai.
3. Saunia mo Lona Toe Afio Mai
Sa auauna atu Iesu i Ona soo mo le 40 aso ina ua mavae Lona Toetu, ona afio a’e lea i le lagi, ma se folafolaga o le a Ia toe afio mai (tagai Galuega 1:2–11).
Talu ai nei, na faamamafaina ai e perofeta ma aposetolo le manaomia ona saunia mo lena toe foi mai. Mo se faataitaiga, na aoao mai Peresitene Nelson e faapea “o le faateleina o le taimi i le malumalu o le a fesoasoani ia i tatou e saunia ai mo le Afio Mai Faalua” ma uunaia tagata uma e tapua‘i i le malumalu i taimi uma e mafai ai. E mafai ona e tulimatai atu i le Afio Mai Faalua o Keriso ma le olioli ma le faatuatua e ala i le siitia faaleagaga i le lagi, e aofia ai le tapuai i le malumalu.
4. Aoao e Faalogo ia te Ia
E lei leva ona mavae le Afio A’e, ae maua e Aposetolo a Iesu le meaalofa o le Agaga Paia a o faapotopoto mo se taumafataga (tagai Galuega 2). O lenei meaalofa na mafai ai ona latou maua le taitaiga a Keriso e ui ina sa le o toe i ai o Ia i le lalolagi faatasi ma i latou.
E ala i le pule o le perisitua toefuataiina a le Atua, e mafai ai ona tatou maua le meaalofa o le Agaga Paia—ma le siufofoga o le Faaola! Sa uunaia e Peresitene Nelson tagata uma “ia faia soo se mea e manaomia e faateleina ai lou malosi faaleagaga e maua ai faaaliga patino.”
A o e sailia Iesu i lenei vaitau faapitoa ma taulai atu ia te Ia i le tausaga atoa, o le a faatumulia lou olaga i le taitaiga, faamoemoe, ma le malosi ua Ia folafola mai. Ua lava lea mafuaaga e faamanatu ai-e le na o lenei vaitau ae o taimi uma.