Mai le AM Faalevaiaso
O Auala e 6 e Auauna Atu Ai e Pei o le Faaola i Lenei Vaitau o Aso Malolo
I le faatinoina o vavega, sa taulai atu Iesu i tagata taitoatasi.
I le vaitau o le Kerisimasi, e masani ona tatou lagonaina se manao faaopoopo—atonu foi o se matafaioi—e auauna atu i isi ma faia e pei ona faia e le Faaola. Lea e mafai ona lofituina! Sa faatinoina e le Alii nisi o vavega ofoofogia i le taimi o Lana galuega i le olaga nei! E mafai faapefea e a tatou galuega lotomaualalo o le auauna atu ona faatusatusa i mea sa Ia faia?
E le manaomia ona taufaafefe lenei mea. E ese mai vavega manino e pei o le faaliliuina o le vai i le uaina, sa faatino foi e lo tatou Faataitaiga ni vavega e le iloagofie e pei o le pa’i atu i loto o tagata ma faaleleia o latou olaga.
O le tele o mea sa Ia faia e lelei i lo tatou malosi e faataitai ai a o tatou mulimuli ia te Ia. O nisi nei o mataupu faavae autu e manatua a o e vaavaai mo ni auala e auauna atu ai i lenei vaitau o aso malolo.
Faalogo.
Sa silafia e Iesu e lei usitai le fafine Samaria i le vaieli i le tulafono o le legavia (tagai Ioane 4:6–29). Sa ia iloa sa tausalaina le fafine na molia i le mulilua (tagai Ioane 8:3–11).
Ae sa lei mafaufau le Faaola i na mea. Faatasi ai ma le agaalofa, sa Ia fesoasoani ia i latou ia malamalama e mafai ona latou suia o latou olaga. Sa Ia tuuina atu ia i latou le faamoemoe mo se lumanai manuia. O le taunuuga? Sa maua uma e nei tamaitai ni molimau e uiga i le Faaola (tagai Ioane 4:29; Faaliliuga a Iosefa Samita, Ioane 8:11 [i le Ioane 8:11, vaefaamatalaga i]).
E pei o le Faaola, e mafai ona tatou faalogo e aunoa ma le tausalaina o isi. E mafai ona tatou ofoina atu le faamoemoe ma uunaia isi ia iloa le olioli o le mulimuli ia te Ia.
Faaali atu le agaalofa. Tagi pe afai e tatau ona e faia.
Ina ua silasila atu Iesu i uo ma aiga a Lasalo o fetagisi i lona maliu, sa Ia silafia o le a Ia faatuina mai le tagata mai le oti. Semanu e mafai ona ia ta’u atu i tagata, "E le manaomia ona tagi. O le a lelei mea uma!"
Ae Na te lei faia. O le a le mea na Ia faia? Sa tagi o Ia faatasi ma i latou (tagai Ioane 11:35).
O e pele ia i tatou atonu e i ai ni faafitauli e le aafia patino ai i tatou. Atonu e i ai ni o latou popolega tatou te le faasoaina atu po o ni atugaluga ua uma ona tatou foiaina. Atonu latou te tauivi ma mataupu faavae o le talalelei ia e faigofie ona oo mai ia i tatou. Tatou te faaalia le agaalofa (o le upu Latina o lona uiga o le "puapuagatia faatasi") e ala i le faatasi atu i isi i o latou lagona—e le o le lofituina i mafaufauga le lelei ma i latou ae o le manatu mamafa i o latou luitau ma fesoasoani ia i latou e galulue e ala atu ia i latou.
Ia faaaofia ai tagata uma.
Sa masani ona faitioina Iesu i le faaaofia ai, mo le fegalegaleai ma tagata e lei "tatau" ona Ia faia (tagai Mataio 9:10–12). Ae le aofia ai tagata? E le o se mea lena na Ia faia. Sa popole o Ia mo tagata uma, e aofia ai i latou sa i tua o le sosaiete.
E pei o le Faaola, e mafai ona e saili ia nofouta po o ai e manaomia ona lagonaina atili le alofa o le Atua.
Manatua pe a e fuafuaina au pati ma gaoioiga mo aso malolo. OAVI: O Ai o le a Valaaulia e Iesu?
Faaaoga au punaoa. Mafaufau i fafo atu.
Ina ua fia aai le lima afe o tagata ma leai ni meaai sa latalata ane, sa lei fetalai mai le Alii, “Ou te faamalie atu, e leai foi sa’u meaai. E leai se mea e mafai ona ou faia e fesoasoani ai ia te outou.” Nai lo lena, sa Ia fetalai atu i Ona soo e ao mai mea na maua, sa Ia tatalo, ma sa Ia saunia se vavega.
O vavega e maua mai i au tatalo atonu e le tutusa, lelei, faavavega e pei o lena. Ae atonu e te ofo i manatu e musumusu atu le Agaga ia te oe pe a e tau atu i le Tama Faalelagi: “Ou te fia fesoasoani i lenei tulaga, ae ou te manatu e le o ia te au punaoa. Pe ou te sese i lena mea? O le a se mea e mafai ona ou faia?”
Ia faamalosiau ma ia mafaufau lelei.
E faafia ona fetalai Iesu i mea e pei o le “Aua e te fefe” (Mataio 17:7; Mareko 5:36), “Aua e te matau” (Mataio 10:28; Luka 8:50; 12:7), ma le “Ia outou lototetele” (Mataio 14:27; Ioane 16:33)?
Pe ua e matauina ea o tatou perofeta o aso e gata ai e faapena foi? (Vave, mafaufau ia Peresitene Nelson. E te vaai faalemafaufau ia te ia o ataata, a ea?) O le faanoanoa e faigofie ona maua e soo se tasi e manao i ai. E le mana’omia ona avea oe ma puna o lena mea.
Auauna e tusa lava pe (aemaise pe a) o loʻo e tauivi foi.
E foliga mai o se mea e le fetaui, ae o se auala sili e taulimaina ai pe a e lagona le lotovaivai o le auauna atu i isi. Aua le avea ou lava faafitauli ma ’alofaga mo le manatu faapito. O le soifuaga atoa ma le misiona a le Faaola o se faataitaiga o lenei mea. E ui ina “inosia ma tuulafoaiina e tagata, o le tagata faanoanoa, ua masani foi ma le tiga” (Isaia 53:3), ae ui i lea, o Iesu sa “femaliuai ma agalelei” (Galuega 10:38).
A o i ai o Ia i luga o le satauro—o se taimi e faigofie ai ona malamalama i le manatu faapito—na Ia ole atu i Lona Tama e faamagalo atu i alii na tuuaia (tagai Luka 23:34) ma faamautinoa le tausia lelei o Lona tina (tagai Ioane 19:26–27).
E toe tasi se isi mea na faia e le Faaola. Sa Ia tatalo e le aunoa. Afai e te ole atu ma le faamaoni i le Tama Faalelagi mo se taitaiga i le auauna atu i isi—po o le a le tala e fai atu, o le a le mea e fai, pe faapefea ona fesoasoani atu—o le a taialaina oe e le Agaga Paia. E na o le pau lena o le uiga o le “auauna e pei o le Faaola” o le: mauaina o le Agaga. Sei o tatou faasalalau atu sina olioli i lenei Kerisimasi!