Fesili ma Tali
Pe o O’u TuuIna Lo’u Faatuatua i Taunuuga po o Iesu Keriso?
Sa ou manatu o le tatalo e faatatau i le mauaina o le mea sa ou manao ai.
O le tuputupu ae, ou te lei mafaufau lava pe na faapefea ona ou tatalo. Sa ou manatu o le tatalo o le a aumaia ai ia te au i taimi uma le mea sa ou manao ai.
Ina ua leai sa’u meataalo, sa ou tatalo ia maua.
Ina ua mamai tagata sa ou iloaina, sa ou tatalo mo i latou ina ia manuia.
Ma ina ua ou manatu ua oo i le taimi ou te faaipoipo ai, sa ou tatalo ina ia faaali mai lo’u toalua.
Ana le oo lava i se taimi talu ai nei na ou tu ai e mafaufau e uiga i le eseesega i le va o le faatuatua i taunuuga ma le faatuatua ia Iesu Keriso. Ae ina ua ou iloaina e masani ona ou tuuina lo’u faatuatua i o’u taunuuga manaomia, sa ou iloaina e tatau ona ou suia. Sa ou liliu atu i le Talai la’u Talalelei, lea e faamatalaina ai le faatuatua ia Iesu Keriso: "O le faatuatua o se mataupu faavae o le mana. A o e faatinoina le faatuatua ia Iesu Keriso, o le a faamanuiaina oe i Lona mana e fetaui ma lou tulaga. O le a mafai ona e oo i vavega e tusa ai ma le finagalo o le Alii."
O lea la, pe a tatou faailoa atu lo tatou faatuatua ia Iesu Keriso, o le a Ia tuuina mai ia i tatou le mana e fetaiai ai ma mea o loo tutupu i o tatou olaga. Ae e mafai faapefea ona ou le faatuatua i ni taunuuga patino pe a ou manao patino i ai?
Ina ia suia lo’u auala i le tatalo, sa amata ona ou faia ni mea se tolu na fesoasoani ia te au e tuu ai lo’u faatuatua ma lo’u loto i le nofoaga sa’o.
1. Faamalosia o lo’u Faatuatua ia Iesu Keriso
O le faatuatua ia Iesu Keriso e le na o ia lava e i ai. E manaomia ai a tatou taumafaiga e atiina ae ma tuputupu ae. A o ou tatalo e faamalosia lo’u faatuatua ia te Ia, sa ou maua ni auala e valaaulia atili ai Keriso i lo’u olaga patino. O lenei mea na taitai atu ai i se sootaga malosi atu ma Ia ma tatalo e sili atu ona anoa. Sa tuputupu ae lo’u faatuatua ia te Ia, e tusa lava po o a o’u aafiaga.
2. Auai Soo i le Malumalu
Ua ou lagonaina le tele o uunaiga e faaipoipo. Ina ua ou toe foi mai i le fale mai la’u misiona ma sa ou le fiafia i le le tele o tafaoga faamasani na laina i luga, sa luiina au e se uo ou te alu i le malumalu e faatasi i le vaiaso. E ui ou te lei mauaina lava se tasi sa ou manao e faaipoipo i ai, ae sa ou maua se isi mea: mana ma le malosi ina ia lototele atili ai ma faamoemoe i a’u tafaoga faamasani.
E pei ona aoao Peresitene Russell M. Nelson : "I le maota o le Alii, tatou te taulai atu ai ia Iesu Keriso. Tatou te aoao ai e uiga ia te Ia. Tatou te osifeagaiga ai e mulimuli ia te Ia. Tatou te iloa ai o Ia. A tatou tausia a tatou feagaiga o le malumalu, tatou te maua se avanoa tele atu e faaaoga ai le mana faamalosiau o le Alii. O le auai i le malumalu na fesoasoani ia te au e taitai atu ai lo’u faatuatua ia Keriso ma Lona mana, ae le o lo’u faamoemoe o le faaipoipo.
3. Tatalo ia Malamalama ma Faalagolago i le Taimi a le Tama Faalelagi
Ou te manatu o se mea masani le tauivi ma le malamalama i le taimi a le Tama Faalelagi mo o tatou manaoga amiotonu. O se tasi o mea na fesoasoani ia te au e malamalama ai i faamanuiaga ua Ia teuina mo au o le suesueina lea o lo’u faamanuiaga faapeteriaka.
E ui e lei aumaia ai ia te au tali uma sa ou moomoo i ai, ae na ou maua ai le mafanafana i le malamalama o au o le afafine pele o le Tama Faalelagi ma o le a Ia taialaina au i faamanuiaga ofoofogia. O le a Ia taialaina foi oe. A o faaauau pea ona ou tatalo ia malamalama i Lona uiga ma Ana folafolaga ia te au, ua faatumulia au i le filemu lea e na o Iesu Keriso lava e sau mai ai—filemu mai ia te Ia, ae le mai taunuuga sa ou moomoo i ai.
Pe sese ea le faamoemoe mo ni mea patino e tutupu i lo’u olaga? Leai. Ae o le i ai o le faatuatua i na o na taunuuga o le a le tupu ai pe aumaia ai ia te au le filemu. Nai lo lena, o le faateleina o lo’u faatuatua ia Iesu Keriso ua aoaoina ai a’u e faalagolago ia te Ia ma le Tama Faalelagi.
E pei ona aoao mai Elder Shayne M. Bowen o le Fitugafulu, "E ui e le o tulaga uma e iu e pei ona tatou faamoemoe ma tatalo ai, ae o le a oo mai pea vavega a le Atua e tusa ai ma Lona finagalo, Lana taimi, ma Lana fuafuaga mo i tatou."
Ou te mautinoa a ou mulimuli ia Iesu Keriso, o le a avea au ma tagata e finagalo o Ia ou te avea ai.