Makahimo Ka sa Tanang mga Butang pinaagi ni Kristo

Una, tingali maalamon nga trabahoon ang atong relasyon ngadto sa atong Manluluwas si Jesukristo ug unahon kini. Kon mas mailhan nato Siya, mas makasabot kita sa atong tahas niini nga kinabuhi.

Sa dihang kamo magsugod sa pagtrabaho sa inyong relasyon ngadto ni Kristo, mabantayan ninyo nga ang makalig-on nga bahin moabot dayon ug magkalawom gayod.

Mas mailhan ninyo ang inyong kaugalingon diha sa proseso ug mahimong mas masaligon bahin sa inyong kaugalingon. Kamo mas masaligon sa inyong kaugalingon tungod sa inyong espesyal nga relasyon ngadto ni Kristo.

Isip resulta niini nga relasyon, gusto ka nga mobuhat og maayo ug mahimong mas maayo.

Susihon ang tanan nga kinahanglang taposon ug ang tanan nga gusto natong buhaton, kita kinahanglang magkat-on unsaon pagkategorya ang mga buluhaton isip maayo, mas maayo ug labing maayo.

Usa ka panghunahuna nga importante kanako naggikan kang Presidente Holland sa dihang siya mibisita sa usa ka miting sa Paris. Siya mitambag kanato nga, diha sa proseso sa pagprayoridad, makapangutana kita sa atong kaugalingon niini nga pangutana:

“Naselyo ba ako niini?”

Kita naselyo sa atong mga kapikas ug sa atong mga anak. Sila magpabilin kanato sa kahangtoran ug kinahanglan nga mao ang atong kanunay nga prayoridad.

Ang atong prayoridad kinahanglan nga ang usa nga kita naselyo, apan dili nato kinahanglang gamiton kini isip usa ka pasumangil ug mausikan ang makapalambo nga kasinatian nga makahimo natong mas maayo. Ang kinabuhi dili mahimong tanan trabaho, ug kini dili mahimong tanan dula; kinahanglan nga aduna kini piho nga pagbalanse.

Palihog seguroa ang inyong mga prayoridad ug hisgoti kini ngadto sa inyong Amahang Langitnon, sama sa gibuhat ni Nephi: “Ug ako si Nephi, mitungas kanunay ngadto sa bukid, ug nag-ampo ako kanunay sa Ginoo; mao nga ang Ginoo mipakita kanako og mahinungdanong mga butang,” (1 Nephi 18:3).

Kita gisaaran diha sa Basahon ni Mormon nga kon kita motuman sa mga sugo sa Dios, Siya mopanalangin ug mopauswag kanato (tan-awa sa Mosiah 2:22).

Si Presidente Nelson nag-ingon nga ang pagka-imoral mao ang usa ka labing dako nga mga paagi nga makawala sa pagpamatuod ug mas daling makakomplikar sa kinabuhi. Siya usab miingon nga daghan sa labing walay puas nga mga tentasyon sa kaaway naglakip sa mga pagsupak sa moral nga kaputli.

Si Presidente Nelson miingon usab, “Walay lain nga makabukas sa kalangitan sama sa kombinasyon sa nagtubo nga kaputli, hingpit nga kamasulundon, sinserong pagpangita, inadlaw nga pagbasa sa mga pulong ni Kristo diha sa Basahon ni Mormon, ug regular nga panahon nga ipasalig alang sa buhat sa templo ug family history.”

Ang matag-adlaw nga pagtuon sa mga kasulatan ug matag-adlaw nga pag-ampo mao ang mga paagi nga makakupot ngadto sa puthaw ug aron makadungog sa Iyang tingog. Ug dili nato kalimtan ang bahin sa adlaw-adlaw nga paghinulsol—inadlaw nga paningkamot nga mobuhat og maayo ug mahimong maayo.

Si Alma mihatag sa iyang anak og lawom nga pagtulun-an bahin sa personal nga pag-ampo: “Pakigtambag sa Ginoo sa tanan nimong buhaton, ug moagak siya kanimo alang sa kaayohan; oo, kon mohigda ka sa gabii higda ngadto sa Ginoo, aron siya mobantay kanimo sa imong pagkatulog; ug kon mobangon ka sa buntag himoa nga ang imong kasingkasing mapuno sa mga pasalamat ngadto sa Dios; ug kon ikaw mobuhat niini nga mga butang, ikaw pagabayawon sa kataposang adlaw” (Alma 37:37).

Isip mga miyembro sa Simbahan sa Ginoo, gipanalanginan kita og gasa sa Espiritu Santo.

Namahayag si Presidente Nelson, “Sa umaabot nga mga adlaw, dili na posible ang espirituhanong pagsugakod kon wala ang giya, direksyon, makahupay, ug kanunay nga impluwensya sa Espiritu Santo.”

Ako nagtuo nga miabot na ang adlaw sa dihang kita dili na makaila unsa ang tinuod o dili tinuod kon wala ang impluwensiya sa Espiritu Santo. Hunahunaa ang mahitungod sa mahimo sa artificial intelligence karong mga adlawa. Gawas sa tahas isip Maghuhupay, ang Espiritu Santo mao usab ang Tigbalaan.

Si Elder Christofferson mipasabot pa gayod niini. Siya mipasabot nga ang pagkabalaan mao ang proseso sa paglimpyo kanato sa Pag-ula ni Kristo, pag-ayo kanato, ug pagtabang kanato nga mahimong mas mahisama ni Kristo—apan kini pinaagi lamang sa Espiritu Santo nga kita makaakses sa balaang gahom ni Jesukristo. “Ang gasa sa Espiritu Santo … kini ang mensahero sa grasya diin ang dugo ni Kristo gigamit aron sa pagkuha sa atong mga sala ug sa pagbalaan kanato.”

Unsaon nato pagkasayod nga ang Pag-ula ni Jesukristo naglihok sa atong kinabuhi? Ang tubag yano: Kon inyong nabati ang impluwensiya sa Espiritu Santo karon, mahimo ninyong isipon kini nga ebidensiya nga ang Pag-ula naglihok sa inyong kinabuhi.

Atong madawat ang gasa sa pagtuga kon kita moadto sa balay sa Ginoo ug kon kita mohimo ug motuman sa mga pakigsaad og tumanon ang mga balaod sa pagkamasulundon, sakripisyo, ang balaod sa ebanghelyo, pagkaputli, ug pagpahinungod.

Ang pipila sa gasa nga atong madawat samtang tumanon nato kini nga mga pakigsaad naglangkob sa:

1. Mas dako nga kahibalo bahin sa mga katuyoan ug mga pagtulun-an sa Ginoo

2. Gahom sa pagbuhat sa tanan nga gusto sa Dios nga atong buhaton

3. Balaang direksiyon ug proteksiyon samtang kita nagserbisyo sa Ginoo, sa atong pamilya, ug sa uban

4. Dugang nga paglaom, kahupayan, ug kalinaw

5. Gisaad nga mga panalangin karon ug sa kahangtoran

Pagkamahimayaon niini nga mga panalangin. Pagkaanindot niini nga mga gasa nga atong nadawat gikan sa atong mahigugmaong Langitnong Amahan, kinsa gusto nga kita molampos sa kinabuhi ug mobalik sa Iyang presensiya.

Sa daghang okasyon, ako nakadawat sa pagpamatuod sa Pag-ula ni Jesukristo. Ug dili lang mahitungod sa paglimpyo apan kita usab makadawat sa gahom nga makapahimo nato nga makabuhat unsa ang dili nato mahanduraw nga mahimo.

Akong nabati kana nga gahom pag usab ngadto ngadto sa akong kinabuhi, ilabi na kon ako mogawas sa akong kaharuhay.

Palihog hibaloi nga kamo makabuhat sa tanang butang pinaagi ni Kristo, ug himoa kana nga kahibalo nga mopanalangin sa inyong kinabuhi sa kahangtoran.