Gikan sa YA Matag Semana
Bag-o lang Diay Kang Nauli Gikan sa Imong Misyon. Unsa nay Imong Buhaton Karon?
Usa ka sulat alang ngadto sa naglisod og maayo, bag-ong nauli nga misyonaryo.
Minahal nga higala,
Congratulations sa paghuman sa imong misyon! Mapasigarbohon kaayo ko nimo ug sa imong serbisyo ngadto sa Ginoo.
Karon nga nauli na ka, tingali naghunahuna ka, “Unsa nay buhaton karon?” Nagbag-o na ang mga butang—ang mga sakop sa imong pamilya mga edaran na, ang popular nga kultura milabay na, ug ang labing importante, ikaw usa na ka bag-ong tawo tungod sa imong misyon.
Pag-uli nako gikan sa akong misyon, gibati nako nga nabug-atan kaayo sa paghunahuna kon unsa ang sunod para nako. Apan human mauli sulod sa hapit lima na ka tuig, nakakat-on ko og pipila ka butang bahin sa pagpahiangay sa kinabuhi human sa misyon nga akong gilaoman nga makatabang kaninyo.
Likayi ang Pagbalik ngadto sa mga Karaang mga Kinaiya
Daghang angay nga usbon, apan mosugyot ko nga likayan nimao ang pagbalik ngadto sa mga daang kalibotanong mga kinaiya sama sa sobra nga paggamit sa media. Human sa pagpuasa sa social media, usahay akong gigantihan ang akong kaugalingon pinaagi sa sobra nga paglingawlingaw niini.
Tingali matintal ka sa pagbuhat sa sama niini ngadto sa ubang media human sa imong pagpauli. Masabtan ra kini, apan ang imong misyon nagtudlo nimo sa importansiya sa mainampingong paggamit sa imong oras ug sa pagbuhat sa mga butang nga makatabang nimo nga magpabiling duol sa Dios. Ayaw pasagdi nga mawala ang tanan tungod kay makagamit na usab ka sa imong phone.
Padayon sa makapalig-on sa espiritu nga mga kinaiya nga imong nahibaloan, sama sa pagtuon sa imong mga kasulatan ug kanunay nga pag-ampo. Ang imong oras sa pagtuon mahimong dili sama sa kaniadto didto sa imong misyon, apan mahimo gihapon kini nga gamhanan ug makahuloganon. Si Presidente Steven J. Lund, Kinatibuk-ang Presidente sa mga Kabatan-onan, miingon, “Makakaplag kita og espiritwal nga pagsalig ug kalinaw samtang atong gihimo ang mga balaang batasan ug husto nga mga rutina nga makasuporta ug makahatag kusog sa atong pagtuo.”
Padayon sa Pagserbisyo
Bag-o lang nimong nahuman ang usa ka mahalaron nga panahon sa pagserbisyo, ug posibleng lisod ang pagpangita og katuyoan sa dihang nauli ka sa balay. Si Presidente M. Russell Ballard (1928-2023) mipahinumdom nato: “Kon kamo ma-release na gikan sa inyong misyon, hinumdomi nga kamo wala ma-release sa pagkaaktibo diha sa Simbahan. Palamboa ang maayo nga mga kinaiya nga inyong nakat-onan sa inyong misyon, ipadayon ang pagpalig-on sa inyong pagpamatuod, pagtrabaho og maayo, pag-ampo, ug pagmasulundon sa Ginoo. Tahora ang mga pakigsaad nga inyong gihimo. Ipadayon ang pagpanalangin ug pagserbisyo sa uban.”
Busa ayaw hunonga ang imong paglambo! Padayon sa pagserbisyo—pangayo og calling sa imong bishop, ikonsiderar ang pagserbisyo isip usa ka worker sa templo, o pangita og mga paagi sa pagserbisyo sa inyong dapit, sa ward, o sa komunidad. Ang imong misyon nakatabang sa pag-andam nimo alang sa usa ka kinabuhi sa pagserbisyo sa Ginoo.
Pangita og Maayong mga Higala ug Maayong mga Mentor
Sunod, kinahanglan nimong segurohon ang pagpangita og maayong mga higala nga motabang nimo sa pagpahiangay sa kinabuhi human sa misyon samtang magpabiling matinud-anon sa ebanghelyo. Ang imong daan nga mga higala mahimong anaa na sa lahi nga mga yugto sa kinabuhi, busa mahimong bation nimo nga kinahanglan kang magsugod na usab sa pagpangita og mga higala. Apan kini mahimong maayong oportunidad—ang imong pagpili og mga higala makaapekto sa imong kinabuhi labaw pa sa imong maamgohan. Pangitaa kadtong motabang nimo nga magpadayon sa pagpuyo sa ebanghelyo.
Ang usa ka mentor—usa ka bishop, magtutudlo, ginikanan—makatabang usab sa paggiya nimo. Pangita og tawo nga mas maalamon pa kay kanimo ug magkat-on gikan niya, mahitungod man kini sa ebanghelyo, sa trabaho nga nakapainteresado kanimo, o sa usa ka hilig nga imong ganahan. Kadaghanan sa mga tawo malipayong magpaambit sa ilang kahibalo diha kanimo, ug ang mga leksiyon nga ilang itudlo posibleng mahimong pipila sa mga labing dagkong mga himan sa kinabuhi. Mapanalanginan ka sa ilang pag-mentor, ug mapanalanginan sila sa pagpaambit sa ilang kahibalo.
Pagpakita og Pagtuo ug Planoha og Maayo unsay Inyong Buhaton
Sa kataposan, planoha og maayo kon asa nimo ibutang ang imong pagtuo. Si Presidente Russell M. Nelson nagtudlo: “Ang tanan nga maayo sa kinabuhi—ang matag kalagmitan nga panalangin nga may mahangtorong kahulogan—magsugod sa hugot nga pagtuo.”
Akong gipili ang pagbutang sa akong pagtuo ngadto sa Dios, nga nagtanyag nako og mahangtorong kalipay. Samtang naghimo ako og giplano nang daan nga mga pagpili aron maduol sa Dios, nabati nako ang Iyang gahom sa mas dako nga mga paagi kaysa akong nasinati sa akong misyon.
Hinumdomi, ikaw gihigugma ug makahimo ka niini! Samtang magpakita ka og pagtuo sa Langitnong Amahan, Siya mopakita kanimo og kalipay nga labaw pa sa imong matugkad. Mahimong maghunahuna ka nga nakita na nimo ang tanan nga mahimo sa Dios para kanimo, apan mosaad ko nimo, wala ka pay nakita.
Nagmahal,
Henry