“Ang Akong Patriyarkal nga Panalangin: Giya sa Dios sa Pagtukod sa Kinabuhi nga Akong Gipangandoy,” Liahona, Ago. 2025.
Gikan sa YA Matag Semana
Ang Akong Patriyarkal nga Panalangin: Giya sa Dios sa Pagtukod sa Kinabuhi nga Akong Gipangandoy
Ang matag lakang nga akong gihimo gigiyahan sa akong pagtuo diha sa mga saad nga akong nadawat.
Nagdako sa Ghana, ang akong panaw atol sa high school puno sa mga babag.
Ang kadaghanan sa high school niana nga higayon nagkinahanglan og bayad, ug ang akong pamilya naglisod sa pinansiyal. Ang akong uyoan maluluy-ong mitanyag kanako nga mosuporta sa akong edukasyon, nagtugot kanako nga makapuyo uban niya ug mopadayon sa akong mga pagtuon. Apan, ang mga kalisod sa pinansiyal komon, ug dili sa kanunay makagasto ang akong uyoan. Ang kapakyas sa pagbayad misangpot nga ako gipapauli, nga sa walay palad nahimo nga maoy akong reyalidad sa makadaghang higayon, inubanan sa ubang mga silot.
Taliwala sa akong mga panlimbasog, kasagaran kong mobati nga nawad-an sa kadasig samtang nagtan-aw ko sa ubang mga bata nga adunay maayong mga oportunidad. Apan kini nga mga hagit nahimong hinungdan sa makapausab nga kasinatian sa akong kinabuhi.
Samtang nagpuyo ko sa akong uyoan ug sa iyang pamilya, iya kong gipaila ngadto sa Ang Simbahan ni Jesukristo sa mga Santos sa Ulahing mga Adlaw. Migahin sila og panahon matag semana sa pag-home evening, pagtuon sa kasulatan, ug pag-ampo matag adlaw. Human sa usa ka tuig nga pagtambong sa simbahan ug sa seminary uban nila, sa edad nga 17, mihimo ko sa sagradong desisyon nga magpabunyag.
Gigiyahan pinaagi sa Akong Patriyarkal nga Panalangin
Mga tuig ang milabay, samtang nagtambong sa Sunday School, akong nahibaloan ang mahitungod sa patriyarkal nga mga panalangin ug mibati og dinalian nga panginahanglan nga makadawat ko niini. Ang patriarch, si Joseph William “Billy” Johnson, usa ka tinahod nga disipulo sa komunidad sa Simbahan ug usa sa unang mga nakabigsa Ghana. Mibiyahe ko og duha ka oras aron makapangayo sa akong panalangin ug mibalik human sa usa ka bulan dala ang bukas nga kasingkasing aron modawat niini.
Atol sa panalangin, labihan kanindot sa akong gibati dihang ang patriarch namulong sa personal nga mga panglantaw nga mituhop ngari kanako, nagpahayag og usa ka koneksiyon sa akong kinabuhi nga Dios lamang ang posibling nasayod. Akong gibati ang Iyang gugma ug kaseguroan nga ako adunay katuyoan. Ang matag sunod-sunod nga pagbasa sa akong panalangin nagpakita sa mas suod nga pagkaila sa Dios kanako ug sa balaanong buhat nga gitakda nakong tumanon.
Akong naamgohan nga ang Dios nagpakabana gayod sa atong kinabuhi, nga kita Iyang mga anak (tan-awa sa Mga Taga-Roma 8:16) ug adunay balaanong katuyoan. Kini nga pagkaamgo nagdasig kanako nga kanunay nga hinumdoman ang akong patriyarkal nga panalangin, nagpahinumdom kanako sa mga sugo ug sa mga saad nga nag-uban niini. Ang akong patriyarkal nga panalangin nagdasig sa akong desisyon nga moserbisyo og usa ka misyon. Kini nga kasinatian miusab sa akong kinabuhi sa hilabihan, ug akong nasaksihan nga ang mga panalangin nga gipamulong sa patriarch ngari kanako nahitabo sa tibuok nakong pagserbisyo.
Ayaw og Hunong
Human mopauli gikan sa akong misyon, determinado nakong sundon ang dalan nga gilatid sa akong patriyarkal nga panalangin. Ang matag lakang nga akong gitahak gigiyahan sa akong pagtuo diha sa mga saad nga akong nadawat ug sa akong tinguha nga makita ang katumanan niini. Sayod ko nga kon motuman ko sa Dios ug maningkamot sa pagpakabuhi sa paagi nga maoy Iyang gusto kanako, Siya mogiya kanako. Bisan sa mga kalisod panahon sa kolehiyo, akong gibati ang Langitnong Amahan nga naglig-on kanako ug naggiya kanako.
Alang niadtong naglisod sa edukasyon o nagsungasong sa mga kalisdanan (ilabi na sa Africa), nakasabot ako kaninyo. Natahak ko kana nga dalan. Nakasabot ko sa kabug-aton sa walay kaseguroan, apan mohangyo ko ninyo: Ayaw og hunong. Ang Ginoo kanunay nga anaa, andam nga moabag kaninyo bisan sa mga pagsulay nga inyong atubangon. Sigon sa gitudlo sa Manluluwas, “Umari kanako, kamong tanan nga nabudlay ug nabug-atan, ug papahulayon ko kamo” (Mateo 11:28).
Ang tabang moabot gikan sa wala dahomang mga tinubdan—gikan man sa pamilya, mga higala, o sa mga lider sa Simbahan—ug mopamatuod ko nga ang Ginoo nagdasig sa uban sa pagsuporta sa Iyang mga anak. Mahinungdanon ang padayong pagbaton og pagtuo sa inyong kaugalingon ug sa potensiyal nga anaa kanimo. Pinaagi sa pagpaningkamot ug determinasyon, inyong mabuntog ang inyong mga kahimtang.
Ang akong patriyarkal nga panalangin, usa ka personal nga Liahona sa akong kinabuhi, padayong nagpahinumdom kanako sa paglantaw sa mas maayong mga adlaw. Sa Alma 37, ang Liahona gihulagway sa ingon niini katahom nga paagi: “Molihok kini diha sa [pamilya ni Lehi] sumala sa ilang pagtuo sa Dios” (bersikulo 40). Nagpakita kini kon sa unsang paagi ang patriyarkal nga mga panalangin makagiya kanato kon padayon kitang maghupot og pagtuo sa mga saad sa Ginoo.
Bisan og dili tanang panalangin maangkon niining kinabuhia, makabaton kita og paglaom nga ang uban matuman, ug ang atong matinud-anong mga paningkamot sa matarong nga tinguha modala kanato ngadto sa kalipay ug katumanan.
Usa ka Testamento sa Pagtuo ug Paglahutay
Sa akong tibuok nga panaw, akong nakat-onan nga samtang ang kinabuhi tingali dili sa kanunay hapsay, ang pagsalig sa plano sa Langitnong Amahan mogiya ngadto sa personal nga mga milagro. Kon nag-atubang og mga babag, mosalig ako niini nga kamatuoran ug malig-on pinaagi sa pagtuo. Kon molihok kita pinaagi sa pagtuo ug mohimo og maalamong mga pagpili, ang Ginoo mag-andam og dalan alang kanato. Sa matag higayon nga mabug-atan ko o mobati og kawalay kaseguroan,hinumdoman ko kini nga saad ug mapahinumdoman ako nga ang pagtuo mao ang yawe (tan-awa sa Mateo 17:20).
Sa mga gutlo sa pagduhaduha, sa kasagaran makaplagan nako ang akong kaugalingon diha sa paghunahuna sa pagdasig nga makita sa pagbasa sa akong patriyarkal nga panalangin. Nagdasig kini kanako sa pagpadayon sa unahan, nasayod nga ang matag paningkamot nga gihimo inubanan sa pagtuo dili molabay nga dili himatikdan sa Ginoo.
Kon ipadayon natong abli ang atong mga kasingkasing sa inspirasyon, atong makaplagan nga ang Dios padayon nga naghatag og mga oportunidad alang sa kalamboan. Kon atong ipahigayon ang Iyang buhat ug motukod sa Iyang gingharian, dili kita mag-inusara.
Samtang padayon nako nga himoong giya ang anaa sa akong patriyarkal nga panalangin, nagpabilin akong makanunayon sa akong pasalig nga mosunod sa Manluluwas. Samtang dungan kitang magpadayon sa unahan, awhagon ko kamo sa paggunit og hugot sa inyong mga panalangin ug sa paglaom nga gipakita niini. Ang atong patriyarkal nga mga panalangin nagsilbi nga balaanong pahinumdom sa atong bili ug potensiyal diha sa mga mata sa Dios.