Gikan sa YA Matag Semana
Praktikal ug Espirituwal nga mga Panalangin: Mga Saad gikan sa Atong mga Lider bahin sa Mahimong Makaatiman sa Kaugalingon
Ang Langitnong Amahan adunay mga panalangin nga giandam alang kanato samtang kita mahimong angayan ug dili magsalig.
Ang hugpong sa mga pulong nga pagbarog pinaagi sa kinaugalingong paningkamot tingali dili kanunay makapalipay kanato.
Kini mahimong makapahunahuna nato sama sa pagbadyet, pagbayad sa mga bayronon, o pagpangita og trabaho, ang tanan niini mahimong makapaugtas nga mga hilisgotan. Apan ang paghimo og mga sakripisyo karon aron sa pagpalambo sa pagbarog pinaagi sa kinaugalingong paningkamot sa tinuod mao ang usa sa labing maayo nga mga paagi aron maatiman ang atong kaugalingon. Makatabang nato kini sa tanang aspeto sa atong kinabuhi—emosyonal, temporal, ug espirituwal.
Ania ang pipila ka pulong gikan sa atong dinasig nga mga lider mahitungod sa mga panalangin sa pagbarog pinaagi sa kinaugalingong paningkamot:
Emosyonal nga mga Panalangin
“Kinahanglang atong hinumdoman nga kon buhaton nato ang sayon nga mga butang karon, kita mobuhat sa malisod nga mga butang sa umaabot, apan kon kita, sa katugbang, determinado sa pagbuhat sa malisod nga mga butang karon, ang atong kaugmaon lagmit mas hayag ug mas sayon.”
Elder Frederick Kamya, Area Seventy, “Becoming Self-Reliant,” Liahona, Sept. 2023, Africa Central Local Pages, Gospel Library.
“Kamo mapanalanginan og mas dakong paglaom, kalinaw, ug pauswag.”
Personal nga Panalapi alang sa Self-Reliance (2016), Librarya sa Ebanghelyo.
“Ang baroganan sa pagpaningkamot sa kaugalingon o personal nga dili magsalig mao ang sukaranan sa malipayon nga kinabuhi.”
Presidente Boyd K. Packer (1924–2015), “Solving Emotional Problems in the Lord’s Own Way,” Ensign, May 1978, 91.
Temporal nga mga Panalangin
“Samtang maninguha kita nga maandam sa temporal nga paagi, makasagubang kita sa mga pagsulay sa kinabuhi uban sa naglambo nga pagsalig, kalinaw sa atong kasingkasing, ug sama ni Jose sa Ehipto, makaingon kita, bisan sa lisod nga mga kahimtang, ‘Dihay tinapay’ [Genesis 41:54].”
Bishop W. Christopher Waddell, Unang Magtatambag sa Kapangulohan sa Bishopric, “Dihay Tinapay,” Liahona, Nob. 2020, 45.
“Samtang kita nagtubo sa atong ang-ang nga makapaningkamot sa kaugalingon, kita nagdugang sa atong abilidad sa pagtabang ug pag-alagad sa uban sa paagi nga gihimo sa Manluluwas.”
Sister Silvia H. Allred, kanhi Unang Magtatambag sa Kinatibuk-ang Kapangulohan sa Relief Society, “Ang Tinuod nga Kinaiya sa Pagka-disipulo,” Liahona, Mayo 2011, 85.
“Ang sama nga mga panalangin moabot samtang mosunod kita sa tambag sa mga propeta ug magpakabuhi nga dili mogasto sobra sa atong mga kinitaan, maglikay sa wala kinahanglana nga utang, ug maggahin og igo nga mga gikinahanglan sa kinabuhi aron sa pagpatunhay sa atong mga kaugalingon ug sa atong mga pamilya sa dili mokubos usa katuig. Mahimong dili kini kanunay nga sayon, apan atong buhaton ang atong ‘labing maayo,’ ug ang atong mga sangkap dili makabsan—adunay ‘igo ug sobra pa’ [Doktrina ug mga Pakigsaad 104:17].”
Bishop Keith B. McMullin, kanhi Ikaduhag Magtatambag sa Tigdumalang Bishopric, “Pangandam … Kamo Magmalig-on Gikan Karon,” Liahona, Nob. 2005, 12.
Espirituwal nga mga Panalangin
“Kon kita mas mobarog pinaagi sa kinaugalingon nga paningkamot—sa temporal, emosyonal, ug espiritwal—mas makaandam kita sa pagsanta sa walay hunong nga mga pang-ataki ni Satanas.”
Presidente Russell M. Nelson, “Hangupon ang Umaabot uban sa Hugot nga Pagtuo,” Liahona, Nob. 2020, 75.
“Ang tinguha nga makabarog pinaagi sa kinaugalingong paningkamot usa ka bahin sa atong buluhaton subay sa dalan balik sa Langitnong Amahan ug sa Iyang Anak, nga si Jesukristo. Molig-on kini sa atong hugot nga pagtuo kang Jesukristo ug makalipay nga mobugkos kanato ngadto Kaniya pinaagi sa mga pakigsaad ug mga ordinansa sa kaluwasan ug kahimayaan.”
Elder Hugo E. Martinez of the Seventy, “Pagtudlo sa Atong Kabataan ug Kabatan-onan sa Pagbarog pinaagi sa Kinaugalingong Paningkamot,,” Liahona, Mayo 2022, 95.
“Kon atong buhaton ang atong bahin, Siya motabang. Siya mao kinsa mikunsad ubos sa tanang butang moabot aron motabang kanato. Siya mohupay ug motabang kanato. Siya molig-on kanato sa atong mga kahuyang ug mopalig-on kanato sa atong kagul-anan. Siya mohimo sa huyang nga mga butang nga mahimong malig-on. Ang atong gikinahanglang buhaton mao ang pag-ampo dayon buhaton ang atong labing maayo, atong labing maayo matag adlaw, ug itugyan sa Iyang mga kamot ang nahibilin.”
Elder Frederick Kamya, Area Seventy, “Becoming Self-Reliant,” Liahona, Sept. 2023, Africa Central Local Pages, Gospel Library.
Salig diha kang Kristo
Ang inyong mga paningkamot nga mahimong makabarog pinaagi sa kinaugalingong paningkmaot magdala og dagkong mga panalangin kaninyo ug motugot kaninyo nga magmaya unya tungod sa pagpangandam nga inyong gihimo karon.
Samtang kamo maningkamot sa pagpalambo sa inyong pagbarong pinaagi sa kinaugalingong paningkamot, hunahunaa kinsa ang luwas ninyong masaligan. Si Elder Ricardo P. Giménez sa Seventy mipamatuod, “ ako nasayud nga kon kita mohimo sa atong labing maayong paningkamot ug mosalig kang Jesukristo ug sa Iyang Pag-ula isip atong dangpanan, kita mapanalanginan og kahupayan, kalig-on, kontrol, ug kalinaw nga atong gitinguha.’”
Labaw sa tanan, pilia nga mosalig sa Manluluwas. Siya dili gayod mopakyas kaninyo.