Linain alang sa mga Bag-ong Kasal
Unsaon Nako Pagkaplag og Kalinaw Kon ang mga Kahadlok sa Pinansiyal Padayon nga Mitugaw Kanako sa Gabii?
Matag higayon nga makadungog ko sa pulong nga badyet, gusto kong makuyapan. Maayo nalang, ang Dios makatabang.
Isip usa ka bana ug bag-o nga amahan, ako makasulti nga adunay butang nga akong gikahadlokan sobra pa sa bisan unsang damang, kahabogon sa gitas-on, o itom nga porma sa gabii.
Mao kana ang kwarta.
Handurawa ko nga anaa sa suok, nagkurog samtang nag-atubang nako ang makahadlok nga bank statement, ug mao kana ang imong saktong paghulagway kon unsa ang akong gibati.
Uban sa akong asawa ug sa bag-ong masuso nga nagsalig kanako, kasagaran akong nakita ang akong kaugalingon sa ngilit sa kalisang, naghunahuna unsaon nako nga mapaigo ra ang kwarta. Agig dugang sa matag bulan nga mga galastohan nga paspas kaayo moabot, ako nagpalambo pa lamang sa usa ka karera. Dili ko segurado kon o kanus-a ako makaangkon og kanunay, permanenteng trabaho.
Sayon ra alang kanako nga magsugod sa pagbaton og negatibong panglantaw sa kinabuhi kon ako maghunahuna sa mga panalapi. Apan, naningkamot ko nga makat-on, nga bisan og dili kaayo nako maklaro kanunay ang unsay anaa sa unahan, ang Dios mogiya kanako.
Mahanaw ang Kahadlok samtang Motubo ang Hugot nga Pagtuo
Samtang nagkat-on ako nga mas mosalig sa Dios, nagsugod nga aduna koy nabantayan sa akong kaugalingon. Kanunay ko nga mag-ampo ug mangayo alang sa mga panalangin, sama sa tabang sa pagpangita og trabaho o adunay magasto sa wala damha nga galastohan sa medikal, apan usahay ako mahadlok kaayo nga mahigawad nga sa tinud-anay ako naglaom nga ang Dios dili mohatag sa mga panalangin nga akong gipangayo.
Sa Moroni 7:40 nangutana, “Unsaon ninyo pag-angkon og pagtuo, gawas kon kamo magbaton og paglaom?” Ang pagkawalay paglaom bisan sa wala pa ko mangayo alang sa panalangin mao ang sama sa pagbutang og bendahe sa walay samad. Unsay rason?
Kini nga pagkaamgo misangpot kanako ngadto sa pagtinguha alang sa kausaban. Ako naningkamot sa pagpraktis sa pag-ila nga ang Dios adunay gahom aron sa paghatag nako og mga panalangin, nga sa gihapon nagsabot nga ang Dios mohatag kanako sa mga panalangin nga mas labing maayo alang kanako, dili kadtong akong gituohan nga akong gikinahanglan. Bisan tuod ako makulbaan gihapon mahitungod sa mga panalapi, kini nga gawi nagtabang nako nga dili kaayo mahadlok.
Si Elder David A. Bednar sa Korum sa Napulog Duha ka Apostoles mitudlo, “Ang tinuod nga hugot nga pagtuo nagtumong diha ni Ginoong Jesukristo ug sa kanunay mosangpot sa matarung nga aksyon” Ang pagpangayo og tabang sa mga panalapi mahimong natural nga magtukmod ngadto sa paglihok kon kini buhaton pinaagi sa hugot nga pagtuo. Kana nga paglihok mahimong mapakita sa daghang paagi, sama sa pagbadyet, pag-apply og mas maayong trabaho, o pagpalambo og bag-ong klase sa kahanas.
Mobayad sa Ikapulo (Wala, Tinud-anay, Paminawa Ko)
Kong magpuyo nga ang sweldo igo ra ibayad sa mga galastohan, lisod na kaayo makahatag sa 10 porsyento, apan mao kini ang importante nga paagi nga ako naningkamot sa paghimo og matarong nga aksiyon.
Human lang sa among kasal, naaksidente ko ug ang akong asawa sa sakyanan. Ang akong asawa naangol ug kinahanglang moundang sa iyang trabaho. Sa pagpasabot og dyutay, ang akong sweldo dili paigo ibayad sa galastohon, ug ang pagbayad sa ikapulo malisod.
Apan mihukom kami nga mobayad lang gihapon.
Paglabay sa usa o duha ka semana, nakakita kami og sobre sa among mailbox. Nakabutang niini ang among mga ngalan apan walay address sa nagpadala, ug sulod sa sobre mao ang sobra pa sa 10 ka pilo sa bag-o lang namong gibayad nga ikapulo. Hangtod karon wala akoy ideya kon kinsa ang nagpadala niini o giunsa nila pagkasayod nga kami nagkinahanglan og kwarta. Apan ang akoa lang nasayran mao nga kami mibayad sa among ikapulo ug ang Dios nasayod nga kami nagkinahanglan og tabang.
Hinoon dili matag milagro sa ikapulo ingon niadto kadako, kami nakakita og daghan pa, sa espirituwal ug sa temporal. Samtang nakat-on kita sa Malaquias 3:10, “Sulayi ninyo ako karon, nagaingon ang Ginoo sa mga panon, kon dili ba buksan ko kaninyo ang mga tamboanan sa langit, ug buboan ko kamo sa panalangin, sa pagkaagi nga wala na unyay dapit nga igong kabutangan sa pagdawat niini.”
Sa higayon nga mahadlok ako nga dili kami makabayad sa abang o makapalit og pagkaon o unsa man ang among gikinahanglan, mosalig ako ngadto sa mga saad sa Ginoo sa pagbayad sa ikapulo isip usa ka tinubdan sa kalinaw. Usahay mao lang kini ang kahupay nga atong makaya, apan sa kanunay kita makakaya sa pagkab-ot niini.
Kanunay Mopadayon sa Unahan
Usa ka butang nga akong klarohon mao nga wala ko sa tanan nga mga tubag sa panalapi. Apan mao kana ang punto, diba?
Ang akong mga kalisod sa panalapi nakatabang nako nga modangop ngadto sa Ginoo ug makat-on sa pagpakita sa hugot nga pagtuo kay ako sa tinuod wala masayod unsa ang buhaton. Ang dalan nga ako unta nga pilion para sa akong kaugalingon gamay ra unta og mga tungasonon, apan dili unta nako maangkon ang kahalangdon, kabililhon nga panglantaw nga anaa kanako karon.
Ako mapasalamaton alang niana, ug bisan og dili ako makasulti nga ganahan ko og daghan pang walay kasegurohan nga panalapi sa umaabot, ako mahinamon sa panaw bisan asa man—tungod kay ako nasayod nga ako makasalig nga ako tabangan ni Kristo aron makalampos. Tinuod, mao kini ang labing dako nga tinubdan sa kalinaw nga akong nakaplagan.
Niadtong kinsa nakita ang mga kaugalingon sa samang panaw, kanunay padayon sa unahan. Pangayo og tabang sa Dios, bayad sa inyong ikapulo, ug ipakita ang hugot nga pagtuo ngadto sa Iyang Anak, atong Manluluwas ug Manunubos. Ikonsiderar kon unsang matarong nga aksiyon nga tingali ang hugot nga pagtuo modasig kaninyo sa pagbuhat.
Ako nasayod nga ang Dios motubag sa inyong mga pag-ampo, ug bisan pa man kon ang tubag wala maglakip sa bahandi, “daghan kaayo ang imong panalangin—oo, gani labaw pa kay sa kon makaangkon ka og mga bahandi sa yuta ug sa kadautan nga katugbang sa kantidad niini” (Doktrina ug mga Pakigsaad 19:38).