Sa Unsang Paagi ang Dios Motabang Kanato sa Pagpili Asa nga Dalan ang Subayon

Sa labing malisod nakong kahimtang, miduol ko ni Jesukristo. Dihang mas nailhan nako Siya ug nasinati ang Iyang gugma, nakapalambo ako og lawom nga tinguha sa pagsunod Kaniya. Nagsugod ko sa pagbuhat sa mga butang nga nagpaduol kanako ngadto Kaniya, sama sa pagbasa sa Basahon ni Mormon matag adlaw, pag-ampo, ug pagsimba matag Dominggo. Naningkamot ko nga magpakabuhi sa mas taas nga mga sumbanan, bisan og nagkinahanglan kini og labihan nga paningkamot sa pagpakabuhi nga lahi kay sa akong mga higala.

Ug dihang mihukom ko nga unahon si Kristo, ang tanan nagkaanam ra sa pagkatarong.

Sama pananglit, mikuha ko og usa sa mga kurso sa pagbarog pinaagi sa kinaugalingong pagpaningkamot sa Simbahabn nga nagtudlo kanako og mga baroganan sa pagdumala og negosyo ug naghatag kanako og kaisog sa pagsugod og akong kaugalingon nga negosyo. Ang akong bag-o lang naulian nga pagtuo nakatabang kanako sa pag-angkon og kalig-on aron masulayan ang pagsubay og bag-ong dalan ug pagbuntog sa akong kahadlok nga mapakyas.

Ug ang Langitnong Amahan migiya kanako sa akong mga pakigrelasyon. Nawad-an ko og pipila ka higala, apan napanalanginan ko nga makakaplag og bag-ong mga higala sa Simbahan. Nagkaanam ko og kasuod sa akong mga ginikanan ug sa akong mga manghod nga igsoon, ug nakasinati usab og mas maayo nga mga pakig-date. Akong nasinati ang katinuod sa saad sa Ginoo: “Pagmatuohon, ug ang tanan nga mga butang maghiusa sa pagtabang alang sa inyong kaayohan” (Doktrina ug mga Pakigsaad 90:24).

Mibati ko nga sa kataposan kontento na gayod ako sa akong kinabuhi. Maayo kaayo ang dagan sa akong negosyo. Nakakita ko og maayong apartment nga kapuy-an. Naglambo ang akong mga pakigrelason.

Apan sa akong paghunahuna mahitungod kon unsa kadako ang tabang sa Dios kanako, dili nako mabaliwala ang pagbati nga gusto kong mohimo og daghan pa aron ikapakigbahin ang Iyang ebanghelyo ngadto sa uban. Naghunahuna ko nga moserbisyo og misyon—apan unsa kaha kon mawala kanako ang tanan nga akong gihagoan og maayo aron molambo?

Usa ka Dominggo, nag-ampo ko ug nagpuasa mahitungod sa pagserbisyo og misyon. Ang Dios mitabang kanako kaniadto aron masayod asa nga dalan ang akong tahakon, ug misalig ako nga Siya motabang na usab kanako.

Misimba ko kauban sa akong ig-agaw didto sa ward nga layo sa akong gipuy-an. Nasorprisa ko nga makita ang usa ka sister nga misyonaryo didto nga akong gikahigala sa milabayng tuig. Nasayod ko nga dili kadto sulagma nga makita siya dihang nagpuasa ko niadtong panahona.

Human sa pagsimba, akong gipakigbahin kaniya ang akong mga kahadlok nga mawad-an sa tanang butang nga maayo sa akong kinabuhi. Miingon ang akong higala, “Ingon ana pod ang akong sitwasyon sa wala pa ko magmisyon. Murag perpekto na kaayo ang tanan nga dili angayng pagsagdan. Apan nasayod ko nga ang Ginoo gusto nga moserbisyo ko.”

Human sa among panagsultihanay, ang impresyon sa pagserbisyo mas nagkakusog. Mibati ko nga ang Langitnong Amahan nagtabang na usab kanako sa makausa pa kon asa nga dalan ang tahakon—nagkinahanglan lamang nga ako molihok ug mosalig Kaniya. Mao nga pagkasunod adlaw, nagsugod ko sa paglihok sa akong aplikasyon para magmisyon.

Ang ubang tawo tingali maghunahuna, “Nganong gitalikdan nimo ang tanan aron moserbisyo og misyon?” Apan duna koy pagtuo nga kon buhaton nako ang Iyang gihangyo, ang Langitnong Amahan motabang kanako nga maayo ra ang tanan.

Dihang gibutang nako ang akong hingpit nga pagsalig sa Dios, Iya akong gitabangan nga makakaplag sa akong dalan sa kinabuhi. Akong nakat-onan nga ako Iyang linahi nga anak ug nga Siya naghatag kanako og lahi nga mga oportunidad aron mahiduol ngadto Kaniya. Kay ako nasayod man nga ako Iyang anak nga babaye, dili ko angay nga mosubay sa dalan sa kalibotan—nasayod ko nga ang Dios adunay mas maayo nga dalan alang kanako.

Niingon si Elder Patrick Kearon sakop sa Korum sa Napulog Duha ka Apostoles: “Ang atong mahigugmaon nga Amahan midumala sa Paglalang niini gayod nga yuta alang sa pagpadayag sa katuyoan sa paghatag og oportunidad alang kaninyo ug alang kanako … sa paggamit sa atong hinatag sa Dios nga moral nga kabubut-on sa pagpili Kaniya, aron makakat-on ug molambo, sa paghimo og mga sayop, sa paghinulsol, sa paghigugma sa Dios ug sa atong silingan, ug aron usa ka adlaw mobalik pauli ngadto Kaniya.”

Nahingangha ako sa paagi kon giunsa ako sa paggiya sa Dios sa akong kinabuhi. Samtang akong gigamit ang akong kabubut-on sa pagsubay niining bag-o nga dalan ug moserbisyo og misyon, akong gibati ang kahayag ug gugma ni Jesukristo nga mipakalma sa akong mga kahadlok. Nasayod ko nga inig uli nako, makahimo ako og mas daghang mga desisyon uban sa kamasaligon kon ako padayon nga mosalig Kanila.

Kon kamo naningkamot sa pagsunod sa Langitnong Amahan, Siya motabang kaninyo sa pagsalig sa inyong kabubut-on, bisan asa nga dalan ang inyong tahakon, kon kana nga dalan magdala kaninyo pabalik sa panimalay ngadto Kaniya.