Paggamit sa Doktrina ug mga Pakigsaad nganha sa inyong Kinabuhi
3 ka Paagi sa “Pagtinguha sa Pagkat-on”, (Nga Wala Magkinahanglan og Eskwelahan)
Ania ang pipila sa lainlaing paagi nga inyong maandam ang inyong kaugalingon sa tibuok kinabuhi nga pagkat-on.
Kon maghunahuna kamo mahitungod sa pagkat-on, unsa ang mosantop sa inyong hunahuna? Maglingkod sa klasrom sa tibuok adlaw, maghulat sa oras hangtod nga mobagting ang bell? Moadto sa librarya arong mopakli sa nagpatongpatong nga mga libro?
Sa panahon sa pagka young adult, adunay bag-ong butang nga makat-onan sa matag adlaw. Dili kinahanglan nga mahitabo kini sa sulod sa klasrom—mahimong maglakip kini sa mga kahanas sa panarbaho, sa abilidad sa pagpakighinabi ug pagbaton og maayong mga relasyon, pagluto para sa inyong kaugalingon o sa mga minahal, ug daghan pa.
Ug naghunahuna ba kamo mahitungod sa kamatuoran nga sa pagkatinuod gisugo kita sa pagkat-on? Ang Ginoo misugo kanato nga “tinguhaa ang pagkat-on, gani pinaagi sa pagtuon ug usab pinaagi sa pagtuo” (Doktrina ug mga Pakigsaad 88:118). Si Presidente Russell M. Nelson mipalanog niini nga sugo, nagpahinumdom kanato nga ang “edukasyon usa ka relihiyoso nga responsibilidad.”
Adunay daghang paagi nga atong mapalambo ang atong pagkat-on. Mao nga bisan kon bag-ohay lamang kamo nga nakagradwar, nangandam sa pagminyo, nangita og trabaho, o gibati ninyo nga nagkahinay ang espirituwalidad, adunay mga paagi nga kamo “[makatinguha sa] pagkat-on” sa tanang bahin sa inyong kinabuhi—bisan kon wala kamo mag-eskwela karon.
Mga Kahanas sa Kinabuhi
Unsa ang usa ka kahanas sa kinabuhi nga kinaghanglan pa ninyong makat-onan? Ania ang pipila ka bahin sa kinabuhi diin kamo mahimong mobaid sa inyong mga kahanas:
-
Mga kahanas sa buluhaton sa panimalay (pagluto o pag-andam og pagkaon, pagpangompra nga pinasubay sa badyet, paghapsay o paghipos sa mga nagkatag nga mga butang, pag-atiman sa mga tanom o pagpananom)
-
Mga kahanas sa panarbaho (networking ug pag-ugmad og propesyonal nga mga relasyon, paghimo og résumé, pag-angkon og kaugalingong negosyo, pagsulat og mga email)
-
Mga kahanas sa panalapi (pag-badyet, pagtigom, ug pagpamuhonan og kwarta; pagbayad og buhis, pagplano alang sa pagretiro)
-
Mga kahanas sa komunikasyon (mga teknik sa aktibo nga pagpaminaw, kasulbaran sa mga panagbangi, emosyonal nga kalig-on, pakigpulong sa publiko)
-
Praktikal nga mga kahanas (pagmintinar sa sakyanan, biskleta, o balay; paggamit og mga himan; simpli nga pagpanahi; first aid)
-
Mga kahanas sa kalingawan (pagganselyo, pagkat-on og instrumento sa musika, pagkuha og mga litrato, pag-painting)
Pangayo og tabang sa ginikanan, higala, miyembro sa ward, o lider sa Simbahan sa pagtudlo ninyo sa bag-ong kahanas sa kinabuhi. Ikonsiderar ang pag-apil sa usa sa mga kurso sa pagbarog pinaagi sa kinaugalingong paningkamot sa Simbahan.
Pagkat-on sa Ebanghelyo
Sa tibuok natong kinabuhi, mahimong makasinati kita og espirituwal nga pagbayaw ingon man espirituwal nga kaluya. Apan bisan asa man kamo sa inyong panaw, ang pagpalambo sa inyong kahibalo sa ebanghelyo mao kanunay ang usa ka importante nga paagi sa “[pagtinguha og] pagkat-on” sa tibuok ninyong kinabuhi.
Ang pasiuna sa manwal sa Dali, Sunod Kanako nag-ingon: “Ang katuyoan sa tanang pagkat-on ug pagtudlo sa ebanghelyo mao ang paglig-on sa atong pagkakabig ngadto sa Langitnong Amahan ug ni Jesukristo ug sa pagtabang kanato nga mas mahisama Kanila. Tungod niini nga rason, kon magtuon kita sa ebanghelyo, wala lamang kita mangita og bag-ong impormasyon; gusto kitang mahimong ‘bag-ong binuhat’ (2 Mga Taga-Corinto 5:17).”
Ania ang pipila ka paagi nga mapaladman ninyo ang inyong pagkakabig ngadto sa Langitnong Amahan ug ni Jesukristo pinaagi sa pagkat-on sa ebanghelyo:
-
Magtuon sa kinabuhi o kinaiya ni Jesukristo
-
“Magkat-on mahitungod sa Dios ug sa unsang paagi Siya naglihok”
-
Motambong sa institute
-
Motambong sa templo kon kamo makahimo
-
Magtuon sa mga kamatuoran nga gitudlo diha sa pagtuga sa templo
-
Magtuon sa mga pakigsaad sa templo nga inyong gihimo o gitinguha nga himoon
-
Palamboon ang inyong pagtuon sa kasulatan pinaagi sa Dali, Sunod Kanako o pinaagi sa Mga Hilisgotan ug mga Pangutana diha sa Librarya sa Ebanghelyo
Magkat-on alang sa Inyong Kaugmaon
Ang pag-ugmad og mga kahanas ug pagpalambo sa inyong pagtuon sa ebanghelyo parehong mga paagi nga kamo makaandam alang sa unsay mosunod. Apan adunay ubang mga bahin sa pagkahamtong nga inyong masinati o gilaoman nga masinati nga mapangandaman nato karon!
Ania ang pipila ka mga ehemplo:
-
Kaminyoon (magtuon sa mga baroganan sa mahangtorong kaminyoon, magkolekta og mga kinutlo gikan sa kinatibuk-ang komperensiya mahitungod sa kaminyoon, mangayo og tambag gikan sa minyo nga magtiayon nga inyong gidayeg, pangandam alang sa sekswal nga kasuod pinaagi sa pag-edukar sa inyong kaugalingon gamit ang dinasig sa pagtuo nga mga kapanguhaan o sa kasaligan nga mga lider)
-
Pagkaginikanan (magtuon sa mga inahan ug sa mga amahan nga anaa sa mga kasulatan, moapil og klase mahitungod sa pagkaginikanan, makig-istorya sa ubang mga ginikanan, mobasa sa mga pakigpulong sa kinatibuk-ang komperensiya mahitungod sa pagkaginikanan)
-
Pagkatigulang ug kahimsog (magkat-on og tukmang nutrisyon, magkat-on og bag-ong mga paagi sa pag-ehersisyo, magkat-on og mga teknik sa first-aid)
Bisan unsa pa ang inyong mga kahimtang sa kinabuhi, gusto sa Langitnong Amahan ug ni Jesukristo nga motubo kamo sa inyong kahibalo ug pagtuo “aron makaandam kamo sa tanang butang kon ipadala ko kamo pag-usab sa pagpalambo sa balaan nga tawag diin ako mitawag kaninyo, ug sa misyon nga akong gisugo kaninyo” (Doktrina ug mga Pakigsaad 88:80).
Ang Langitnong Amahan adunay katuyoan alang kaninyo. Samtang maningkamot kamo sa pag-establisar og tibuok kinabuhi nga pagkat-on, diha man sa klasrom o sa gawas, Siya mopanalangin sa inyong mga paningkamot ug mogiya ninyo kon asa Niya kinahanglan nga maanaa kamo.