Mga Kahanas sa Kinabuhi
Nasagmuyo sa Inyong Pagpangita og Trabaho? 3 ka Mahinungdanong mga Kahanas nga Makatabang Ninyo nga Molampos
Ang pagpangita og trabaho usa ka lisod nga buluhaton. Ania kon unsaon sa paglampos, sumala sa kanhi mentor sa panarbaho.
“Salamat sa pag-aplay. Gikasubo namo ang pagpahibalo nimo nga gipili namo nga dili ipadayon ang imong aplikasyon.”
Sama sa daghang mga young adult, sa nag-edad pa ko og mga 20 anyos, napuno ako sa malaomong mga aplikasyon sa trabaho ug sa mga sulat sa pagbalibad.
Ang mga lider sa Simbahan balik-balik nga nagtambag nato sa pagbarog pinaagi sa kinaugalingong paningkaamot, pagsangkap sa mga panginahanglan sa atong mga pamilya, ug paghatag ngadto sa mga kabos kon makahimo kita. Apan kon importante ang trabaho, nganong lisod man kaayo usahay ang pagpangita og trabaho?
Atol sa kolehiyo, nagtrabaho ko isip usa ka mentor sa panarbaho didto sa akong unibersidad. Ang akong mga katungdanan naglakip sa pagrebyo sa mga resume sa akong mga kadungan ug pagpahigayon og mga pagpraktis nga mga interbiyo sa panarbaho aron sa pagtabang nila nga molampos sa ilang pagpangita og trabaho. Nakat-on ko og mga mahinungdanon nga lakang alang sa pagpangita og trabaho ug mga aplikasyon sa panarbaho, ang uban niini wala pa gani nako madungog kaniadto!
Ang Ginoo miingon, “ang tanan nga mga butang ngari kanako mga espirituhanon” (Doktrina ug mga Pakigsaad 29:34). Ania ang pipila ka praktikal nga mga sugyot nga adunay espiritwal nga mga panglantaw nga angay hinumdoman sa panahon sa inyong pagpangita og trabaho:
1. Pagmasaligon—Mopakigbahin og Personal nga Kasinatian
Sa dihang nag-mentor ko sa mga estudyante, kasagaran silang mangutana nako, “Unsaon man nako sa paghisgot ang akong kaugalingon nga dili maingon nga nagpagarbo ko?”
Tungod kay gusto nato nga magpaubos, basin mabati nato nga kinahanglan dili nato ipasegarbo ang atong mga kalig-on. Apan mahimo kitang magpabiling mapainubsanon samtang magmatinud-anon mahitungod sa atong mga kalamposan. Usa ka sugyot mao ang pagtubag sa mga pangutana sa interbiyo pinaagi sa mga istorya. Pananglitan, kon ang usa ka employer mangutana unsa ang imong pinakadako nga kalig-on, paghisgot og usa ka istorya nga nagpakita sa imong mga kahanas nga imong gilihok, sama sa panahon nga mibuhat ka og dugang nga mga buluhaton alang sa usa ka nagkasakit nga kauban sa trabaho o niadtong kinahanglan kang makat-on og usa ka bag-ong butang. Ang mga istorya makapaagni, katuhoan, ug daling mahinumdoman.
Ang tinuod nga pagpaubos mao ang pag-ila sa Langitnong Amahan sa tanan nga inyong buhaton (tan-awa sa Alma 26:12). Samtang magbaton kamo og pag-ampo sa pagpasalamat diha sa inyong kasingkasing ug maghisgot og positibo bahin sa uban, ang inyong interbyo dili maisip nga mapasegarbohon.
2. Patuboa ang Inyong Kahibalo—Ipahiangay ang Inyong mga Kahanas ngadto sa Employer
Tinuod na—ang kahibalo gahom! Si Elder David A. Bednar sa Korum sa Napulog Duha ka Apostoles sa makausa miingon, “Ang pagkat-on nga mahigugma sa pagkat-on mahinungdanon sa ebanghelyo ni Jesukristo, mahinungdanon kaayo sa atong nagpadayon nga espirituhanon ug personal nga kalamboan, ug usa ka klaro nga panginahanglan sa kalibotan diin kita karon ug sa gihapon mopuyo, moserbisyo, ug motrabaho.”
Sa dili pa magsulat og cover letter o ang pag-interview, i-search ang kompaniya. Rebyoha ang ilang website aron makit-an ang pamahayag sa misyon ug mga tumong sa kompaniya. Kontaka ang mga empleyado nila sa una o karon pinaagi sa pagkonekta sa mga website o ubang mga paagi aron makahibalo mahitungod sa kultura sa kompaniya. Ang pagkasayod mahitungod sa mga tawo nga mobasa sa inyong aplikasyon makatabang aron inyong mahisgotan ang piho nga mga kahanas dinha sa inyong aplikasyon nga mahinungdanon sa trabaho.
Sama pananglit, kon mobasa kamo og deskripsiyon sa trabaho nga gipangita sa employer ang usa ka tawo nga pamilyar sa usa ka klase sa software, seguroha ang pag-apil sa kadak-on sa inyong kahanas niana nga software diha sa inyong résumé. Kon ang kompaniya naghatag og bili sa pagsalmot ngadto sa komunidad, isulti ang inyong personal nga mga tumong sa paghatag og tabang gumikan sa pagpasalamat sa kaayohan nga nadawat. Ang mga employer mas ganahan sa mga nangaplay kansang mga tumong nahiuyon sa ilang tumong.
3. Pagmakugihon—Sunda ang 15-10-2 nga Estratehiya
Kon ang tahas sa pag-aplay og mga trabaho magsugod na og kalisod, ayaw paghunong. Diha sa Basahon ni Mormon, si Ammon nagpahinumdon kanato nga sa dihang naluya na kaayo siya ug nawad-an og kadasig, ang Ginoo mihupay niya, nga nag-ingon, “Antosa uban sa pailob ang inyong mga kasakit, ug ako mohatag kaninyo og kalamposan” (Alma 26:27).
Atol sa inyong pagpangita og trabaho, nakasulay ba kamo nga mibati sama ni Ammon—gikapoy na kaayo, mibati og kapakyasan, ug andam na nga moundang? Ako, nakahibalo ko nga nakasulay ko niana. Ug bisan og ang mensahe sa Ginoo ngadto ni Ammon giandam para niya, makasalig mo nga ang Langitnong Amahan gusto nga molampos usab kamo. Ang pagpangita og trabaho nagkinahanglan og panahon ug paningkamot, apan ang pagpadayon bisan pa man sa kalisod may ganti.
Ang usa ka paagi sa pagpadayon sa inyong mga paningkamot mao ang pagsunod sa 15-10-2 nga estratehiya. Nagpasabot kini sa pagkaplag og 15 ka bag-ong mga kapanguhaan, pagkontak og 10 kabuok, ug paghimamat sa duha nianang mga kontak sa personal mismo matag adlaw. Ang Ginoo nagsaad nga samtang ato Siya nga apilon sa atong mga paningkamot, Iyang ipahinungod ang atong kahimoan (tan-awa sa 2 Nephi 32:9).
Sa akong pagbuhat niini nga mga lakang sa akong kaugalingong pagpangita og trabaho, nakaugmad ko og makahuloganon nga mga koneksiyon, nakapalambo sa akong propesyonal nga mga kahanas, ug sa kataposan nakakaplag og pipila ka trabaho. Bisan asa kamo sa inyong pagpangita og trabaho, awhagon ko kamo sa pagsulay niini nga mga sugyot! Labaw sa tanan, apila ang Ginoo sa inyong mga paningkamot, ug Siya mohimo ninyo nga mas labaw pa kay sa inyong mahimo nga kamo lang.