1 Háálá Diyin Bóhólníihii éí Jacob yaa aʼáhí dínóozįįł, dóó Israel tʼahdii bił nilį́įgo yikʼididoolnih, dóó tʼáá bí bikéyahgi kééhatʼį́įgo íídoolííł; áko nahdééʼ doo béédahodílzinígíí bíidookah, Jacob dineʼé yił tʼááłáʼí danilį́į doo.

2 Áádóó dine hákáʼ adoojahgo hakéyahjįʼ adahodooʼish; aooʼ, adaʼhwiisʼáádę́ę́ʼ; dóó bikéyah baa dadeestʼáánéejįʼ nináhidookah. Dóó Israel bighandóó háájéʼígíí éí dabiidoołtsoł, dóó Diyin Bóhólníihii bikéyahgi naalʼaʼí dóó sánii ákáʼandaajahígíí bá hazʼą́ą doo; dahásnááhą́ą yisnááh ándazhdoodlííł, dóó hachʼįʼ nidahwiiłnánáa binaatʼaanii dazhdooleeł.

3 Áádóó baa hodoolzhish éí bijį́į́di Diyin Bóhólníihii hááʼíyį́į́h neidoolééł, yínííł bitsʼą́ąjįʼ, dóó náhádzid bitsʼą́ąjįʼ, dóó bikʼéʼíyééʼgo nanilteʼę́ę bitsʼą́ąjįʼ.

4 Áádóó baa hodoolzhish éí bijį́į́di, Babylon dineʼé aláahgo binanitʼaʼí saad baa dííʼááł, dóó kódidííniił: Haitʼáo atʼídaniłʼínée niʼ kódzaa, kin haalʼá bitsʼádiʼnílidyę́ę ásdįįd!

5 Diyin Bóhólníihii éí bąąhági ádaatʼínígíí bigish, naatʼáanii danilínígíí bigish yitsʼą́ą́ʼ niyiiztiʼ.

6 Éí diné yichʼįʼ báháchįʼgo néíneesxaal, hashké nizingo diné yikʼí naatʼááh nilį́į́ ńtʼę́ę́ʼ, atííłʼį́įgo, doo łaʼ ataʼ ííyáa da.

7 Nahasdzáán tʼáá áʼté bikááʼgóó hááʼáyį́į́h bee hooʼaʼ, dóó áhodiilzeeʼ; tʼáá hooshchʼįʼ adahozhniitʼáál.

8 Aooʼ, chʼó yílʼáii nichʼį́ bił nidahoozhǫǫh, dóó índa Lebanongi gadtsoh deílʼáhígíí, ádaaní: Jó wóyahgo ániʼdiilyaago tsin deitsxʼeelí doo łaʼ nihikʼijįʼ doogááł da.

9 Chʼį́įdiitah bitłááhdę́ę hodeesnáágo nínáahgo nidááh doogaał; daneeznáanée ná néidiiłjééʼ; áko ałʼąą dineʼé binanitʼaʼí tʼáá ałtso; aláahdi diné binaatʼáanii nidahaʼáádóó tʼáá ałtso nídidookah.

10 Éí tʼáá ałtso hadadoozih dóó ádandidooniił: Daʼ nihí ádaniitʼéhígi átʼéegoósh ni ałdóʼ doo nidziil da sínílį́į́ʼ? Daʼ nihí ádaniitʼéhígiísh ánítʼé sínílį́į́ʼ?

11 Bee ayóó ánítʼéii yę́ę jishchááʼ góyaa silį́į́ʼ; dilnih ádaanínée doo íítsʼaʼí da; chʼosh niyaa yííląąd, dóó nikʼéstiʼ doo.

12 Haashąʼ yitʼáo yáʼąąshdę́ę́ʼ chʼindiʼyoolghan, O Lucifer, hayoołkááł biyeʼ nílíinii! Daʼ niʼjįʼ andiʼyoolghango, áko ałʼąą dineʼé doo dabidziilgóó ádeinilaa!

13 Háálá nijéí biyiʼdi ádííníniid: yáʼąąshgóde hadeeshááł, bikááʼdóó nahashʼáhígíí Diyin God bisǫʼ biláahdi dah deeshʼááł; náhookǫs bitsį́į́jí, áłah nilíinii ałdóʼ bił naháshtą́ą doo;

14 Kʼos biláahdi hadeeshááł; Aláahdi Ayóóʼátʼéii nahonishłin doo.

15 Ákondi chʼį́įdiitahjįʼ ándiʼyoolghą́ą́ł, áhoodzʼą́ booshkʼiizh goyaa.

16 Daniníłʼínígíí éí hazhóʼó hadandootsił, dóó naa nitsídadookǫs, dóó ádadidooniił: Daʼ díí hastiin éí nahasdzáán nayiisnáʼą́ą átʼį́, éí bidahólníihii bił nidahazʼą́ą́góó nayisghxan?

17 Áádóó éísh nihokááʼgóó diné doo kééhatʼį́į́góó áyiilaii, áádóó kin hadaasʼáágóó íísdįįd, dóó awáalyaaí doo tʼáá kʼad yééʼníłniiʼígíí átʼį́?

18 Ałʼąą dineʼé aláahgo binanitʼaʼí danilíinii, aooʼ, tʼáá ałtso, áyóó átʼéego haadadilyaago, tʼááłáʼí nítínígo baa dahodeestʼą́ą́ góneʼ naazhjééʼ.

19 Ákondi nijishchááʼdééʼ handiʼyoolghan tsin bitsʼáozʼá doo nidziniigi nahalingo, bééshhał bee nidahoʼdistseedę́ę́ʼ chʼéékaiʼígíí, tsé biáán góyaa adahaaztłizh; daaztsáanii tʼóó bikʼi naʼaldeeh nahalingo.

20 Nidineʼé dóó nikéyah atíinilaaígíí, biniinaa doo bił yóóʼándiʼdoolníił da; bąąhágiʼ adáátʼíinii baʼáłchíní hoolʼáágóó doo chʼínáádabiʼdootʼáał da.

21 Báʼáłchíní nidootsiłgo bá hastʼehalnééh dabizhéʼé bááhígíí adaatʼinígíí biniinaa, doo náádidoojah da, áádóó kéyah doo bá hoolǫ́ǫ da doo, doodago nihokááʼgóó doo kin nínáádeidooníił da.

22 Háálá bikʼijįʼ nídideeshdááł, ní Diyin Tʼáá Ałtsoní bee Bóhólníihii, áádóó Babylondóó, diné chʼéékaiígíí, dóó ayeʼké, dóó tséłkéí, ałtso áhodeeshdįįł, ní Diyin Bóhólníihii.

23 Tsídii ałdóʼ bá hazʼą́ągo ádééshlííł, dóó tó dah naazyį́į doo; béʼéʼzhóóʼ bee chʼíhwidiyeesho, ní Diyin Tʼáá Ałtsoní bee Bóhólníihii.

24 Diyin Tʼáá Ałtsoní bee Bóhólníihii haadzíiʼgo, ání: Tʼáá ákótʼego baa nitsísíkééz, éí tʼáá ákohoodoonííł; dóó bee nahosíʼą́née, éí tʼáá ákótʼée doo—

25 Éí Assyrian dineʼé shikéyahgi deeshiish, áádóó shidziłghą́ąʼdi hakʼi nideeshaał; dóó hazéédéetánée nahjįʼ kódoonííł, dóó áchįʼ nahwiiná hawos bikáádóó nahjįʼ kódoonííł.

26 Díí biniyé kótʼáo nahókáágóó nahastʼą́ʼ; áádóó díí álaʼígíí ałʼąą dineʼé tʼáá ałtso yikʼijįʼ dah doolnih.

27 Háálá Diyin Tʼáá Ałtsoní bee Bóhólníihii yinahazʼáanée, háishąʼ yidoołchxǫǫł? Bílaʼ yee yikʼi dah doolnih, háishą tʼą́ą́ʼ kwiidoolííł?

28 Aláahdi naatʼáanii Ahaz ádingo yihahą́ą́dą́ą́ʼ éí kótʼéego hóyéé ńtʼę́ę́ʼ.

29 Palestina dineʼé, bitsihał yee nániʼhidííłghaalyę́ę kʼéʼéltǫʼ; éí tʼáadoo baa nihił dahozhǫ́ǫní, háálá naʼashǫʼii báhádzidii bihétłʼóól bitsʼą́ą́dóó tłʼiish naʼałtseedii háádínóotʼį́į́ł, dóó naʼashǫʼii báhádzidii naatʼaʼí bineestʼąʼ átʼée doo.

30 Áádóó baa dahojoobáʼígíí ałtsé bá ndahaazchíinii daʼdooyííł, áádóó bichʼįʼ ánídahaztʼįʼii tʼáá hasihgo ndánjah doo; bihétłʼóól danilíínii dichin bee nideestxił, dóó chʼeekaiʼígíí yee dooghą́ą́ł.

31 O dáńʼdítį́hí, hadílgháásh, kin haalʼáii nílíinii; nichxa; Palestina dineʼé, tʼáá ánółtso teisoohkai; háálá náhookǫsdę́ę́ʼ łid dahʼyígááł doo, áko baa hoolzhiizhgo doo łaʼ chʼídoogáłí da.

32 Áko ałʼąą dineʼé bá dahalneʼé haʼátʼíí yee hoł hodoolniʼ? Éí Diyin Bóhólníihii Zion háídiilaa, áádóó ákwii bidineʼé hojoobaʼ ádaatʼéii yadaʼólíi doo.