1 Áádóó baa hoolzhiizh Judah dineʼé aláahdi binaatʼáanii, Uzziah biyeʼ, Jotham éí biyeʼ Ahaz bíyoołkááłyę́ędą́ą́ʼʼ Syria dineʼé aláahdi binaatʼáanii Rezin índa Israel dineʼé aláahdi binaatʼáanii Remaliah biyeʼ Pekah éí Jerusalem yichʼįʼ anaaʼ dahodoohłeeł biniyé ákóde níná, ndi tʼáadoo yikʼehdeesdlį́įʼ da.

2 Áádóó David bitsʼą́ą́dóó náás ahoolchíiłii bił hóóneʼgo áhodooʼniid: Syria dineʼé éí Ephraim dineʼé yił ałchʼodaasniʼ. Áádóó tsin yílʼáii biníyol átʼéego Ahaz dóó hodineʼé hajéí dahideesnááʼ.

3 Áádóó Diyin Bóhólníihii éí Isaiah áyidííniid, Ni áádóó niyeʼ Shearjashub bił kʼad nílááh Ahaz tó dasiyį́įdóó tó haalínígíí diné daiigis bichʼįʼ atiinígi bidááh nohʼaash;

4 Áádóó ábididííniił, Ádaaʼáhólyą́, áádóó áhodiilzééh; Syria dineʼé aláahdi binaatʼáanii Rezin áádóó bidineʼé índa Remaliah biyeʼ éí chizh nideekʼą́ą́h nahalingo, díí naakigo atseeʼ bánáháchįįhígíí biniinaa tʼáadoo nił yéʼí áádóó tʼáadoo nijéí baa ninááhákaʼí.

5 Syria dineʼé áádóó Ephraim dineʼé índa Remaliah biyeʼ nilíinii ahił chʼodaasniʼgo doo yáʼáshónígóó ná nidahazʼą́ągo, ádaaní:

6 Sołtįʼ, Judah dineʼé baatiih diikahgo bił yééʼ ádahodiilnííł, binaatʼáanii ałkééʼ sinilígíi dadiiłchxʼǫǫł, yaʼ, áko Tabeal biyeʼ, éí aláahdi naatʼáanii ádadiilníiłgo Judah kéyah biyiʼ aláahdi naatʼáanii dooleeł.

7 Díí Bóhólníihii Diyin God yee haadzííʼ: Doo yídaneelʼą́ą da, índa doo bikʼe áhodoonííł da.

8 Damascus kin haalʼáii éí Syria dineʼé yinantʼaʼí nilį́ áádóó Damascus binanitʼaʼí éí Rezin, áádóó hastádiindóó biʼaan ashdlaʼ nááhaijįʼ Ephraim dineʼé tabidíʼnóolkałgo doo łáʼí dineʼé nídoodleeł da.

9 Áádóó Samaria kin haalʼáii éí Ephraim dineʼé yinantʼaʼí nilį́, áádóó Samaria binanitʼaʼí éí Remaliah biyeʼ. Doo iinídlą́ą́góó tʼáá aaníí doo níníłdzil da doo.

10 Nááʼáłdóʼ, Diyin Bóhólníihii éí Ahaz yichʼįʼ hanáánáádzíiʼgo, ííłní:

11 Bóhólníihii niDiyin God bitsʼą́ą́dóó bee ééhózinii bííníkeed; hóyahdóó, doodaiiʼ yáʼ nahazʼą́ądi.

12 Ákondi Ahaz ázhdííniid, Diyin Bóhólníihii doo nabídídéeshkił da, dóó doo nabídínéeshtah da.

13 Dóó ánáázhdooniid, O David baʼáłchíní, daʼíísínółtsʼą́ą́ʼ; diné nabídanohtaahígíísh tʼįįhdígo átʼéego baa nitsídaahkees, ákondiísh shiDiyin God ałdóʼ nabídínóóhtah?

14 Díí bąą, Diyin Bóhólníihii tʼáá bí bee ééhózinii nihił ííshjání íídoolííł—Áko shooh, chʼikę́ę́h tʼah doo diné bee haleehii iʼdíʼnooltsąąlgo, ashkii yidoołchííł, áádóó Immanuel yee yídóozhiił.

15 Mandigíyaa áádóó tsésʼná bitłʼizh yee dinooyééł, áko doo yáʼáshóóníí náhjįʼ kwííłʼį́į doo áádóó yáʼátʼéehii yídíníilnáá doo.

16 Háálá awééʼ tʼáá íídą́ą́ʼ bił bééhózin doo yáʼáshóóníí náhjįʼ kwííłʼį́į doo áádóó yáʼátʼéehii yídíníilnáá doo, áko kéyah tʼóó jiiníłáhą́ą aláahdi binaatʼáanii nidiltʼéego yitsʼą́ąjigo dahdidooʼash.

17 Diyin Bóhólníihii éí ni dóó nidineʼé, dóó nizhéʼé baʼáłchíní náás ahoolchíiłii tiʼhooʼníih yikʼijįʼ kwíidoolííł, éí Assyria dineʼé aláahdi binaatʼáanii yee. Ephraim bidineʼé Judah bidineʼé yitsʼákai yéédą́ą́ʼ tsʼídá bilááh átʼéego átíhoʼdoolííł.

18 Áádóó baa hodoolzhish éí bijį́į́di Diyin Bóhólníihii Egypt kéyah tʼáá ałtsogóó tséʼédǫ́ʼii dóó Assyria kéyahdóó tsésʼná yíká ídiʼdoosoł.

19 Áádóó ndahidookah, áádóó doo naʼadáhí góyaa, áádóó tsé biiʼ nídahasdzą́ą́góó, áádóó chʼil dóó hoshi tʼáá ałtso deílʼáágóó, índa dahootsogóó háádadoolyįh.

20 Tʼáá éí yoołkáałdi Diyin Bóhólníihii bá dadeeshnishii dághá bee yilzhéhé yee yidoohsheh, tooh nílį́ bilááhdééʼ nidaakaiígíí, Assyria dineʼé aláahdi binaatʼáanii yee, dóó tsiighá, dóó akʼéé bitáshtłʼoh, índa dághá dóʼ ałtso doolzhééh.

21 Áádóó baa hodoolzhish éí bijį́į́di diné łaʼ béégashii tʼááłáʼí binááhai dóó dibé naakigo yanáʼáłtsoʼ doo;

22 Áádóó baa hodoolzhish, ląʼí abeʼ bitsʼą́ą́dóó mandigíyaa yiyą́ą doo; háálá kéyahgi diné chʼéédzíʼígíí tʼáá ájíłtso géeso dóó tsésʼná bitłʼizh dajiyą́ą doo.

23 Áádóó baa hodoolzhish éí bijį́į́di, tʼáá dádaʼakʼehígi, béésh łigaii dimíilgo chʼil nidaʼatłʼoʼii daʼílíini bitsáskʼehgi chʼil hoshí dóó chʼil deeníní dahodooleeł.

24 Kéyah tʼáá átʼé bikááʼ chʼil hoshí áádóó chʼil deeníní dahólǫ́ǫgo, biniinaa ałtį́į́ʼ áádóó kʼaaʼ bee dahólóonii áadi nidahidookah.

25 Áádóó deílkʼidgóó tʼáá ałtso ałtsʼą́ą́ʼ deeníní bee nidahagodgóó, chʼil hoshí áádóó chʼil deeníní tʼóó báhádzidgo deílʼáago biniinaa doo ákǫ́ǫ́ naʼałdeih da doo; ndi béégashii ákǫ́ǫ́ bidaʼdoolnih, dóó dibéda ákǫ́ǫ́ nidaakai doo.