1 Ákohgo, Diyin Bóhólníihii bizaad áshidííniid: Naaltsoos yisdisí nitsaaígíí nídiiʼaah dóó bee akʼeʼalchíhí bee Maher-shalal-hash-baz atʼéíi bikááʼ anílééh.

2 Áádóó Uriah priest nilíinii dóó Jeberechiah biyeʼ, Zechariah, oodlání ooʼíinii shá ndoozohgo nídiinil.

3 Áádóó asdzání Diyin yá halneʼii nilį́įgo baa níyá; áádóó jooltsąądgo ashkii yishchį́. Áko Diyin Bóhólníihii áshidííniid, Maher-shalal-hash-baz bee yidíízhiił.

4 Háálá áko shooh, awééʼ éí, Shizhéʼé, dóó Shimá saad tʼahdoo yee haadziihgóó, Assyria dineʼé aláahdi binaatʼáanii binááł Damascus bee daʼílíinii dóó Samaria binaalyehé ałtso adahidoogééł.

5 Diyin Bóhólníihii ánááshidooʼniidgo, ání:

6 Díí dineʼé éí Shiloahgi tó hazhóʼógo hadaazlínígíí doo deinízingóó, áádóó Rezin dóó Remaliah biyeʼ yaa bił dahoozhǫǫd;

7 Kʼad díí bąą, áko shooh, Diyin Bóhólníihii éí tooh nílínígíí yee atíihodooleełgóó yichʼįʼ deʼiidíneesʼąąd, éí bidziil dóó yíląąd, éí Assyria dineʼé aláahdi binaatʼáanii áádóó tʼáá ałtso yee ayóó átʼéii átʼé, éí tó bá nidaʼazʼáágóó dóó tó bá daʼítłʼíngóó bilááh adahídoonah.

8 Áádóó Judah kéyahgóó adahizdoołhałgo tó akʼos bidínóolʼąął nahalingo, O Immanuel, áádóó nikéyahgi tʼáá átʼé bitʼaʼ yee yikʼíidoołtih.

9 O dineʼé, ahíhoohkááh, áádóó nihitʼáh doo éédahidoozį́įł da, nidahísoołtǫʼ nahalin doo; kéyah nidahoneesʼą́ą́dę́ę́ʼ daʼíísínółtsʼą́ą́ʼ, hashtʼeʼádahdołnééh, áádóó nihitʼáh doo éédahidoozį́įł da, nidahísoołtǫʼ nahalin doo; hashtʼeʼádahdołnééh, áádóó nihitʼáh doo éédahidoozį́įł da, nidahísoołtǫʼ nahalin doo.

10 Azhą́ʼ ahíłnidáhoʼáa ndi, éí doo nídoodleełí da; nihizaad bee yádaałtiʼ ndi, doo bóhodoolníił da; Diyin God éí nihił hólǫ́.

11 Háálá Diyin Bóhólníihii ayóó átʼéego ádziilii yee shichʼįʼ haadzíiʼgo, díí diné ádaatʼínígíí tʼáadoo bikéé yínáłí, áádóó ání:

12 Diné bináhátʼáʼ yee adaʼahidiʼnínígíí tʼáadoo baa yádaałtʼiʼí, Diné bináhátʼáʼ; ndiyikʼee bił daayéʼígíí tʼáadoo bikʼee nił yéʼí, doodaiiʼ tʼáadoo náníldzidí.

13 Diyin Tʼáá Ałtsoní bee Bóhólníihii tʼéiyá díínísin; bíniʼdii tʼáá bí tʼéiyá bikʼee nił yééʼ, dóó bíniʼdii tʼáá bí tʼéiyá bééníldzid.

14 Áádóó hodiyingo hazʼą́ągi nilį́į dooleeł; ákondi Israel dineʼé tʼáá áłah bichʼįʼ tsé bikʼą́ą́h ńdiltałii dóó tsé áchʼą́ą́ siʼáanii nahalin doo. Áádóó Jerusalemgi kéédahatʼínígíí bá niʼdootʼááł dóó biʼdiʼdooltsooł.

15 Áádóó tʼóó ahayóí chą́ą́h dadidoohgoh dóó naa ahindééh doo, kʼídaʼastǫʼ nahalingo, áádóó bá niʼdootʼááł, yisnááh daazlį́į́ʼ doo.

16 Sháʼnaazíinii bitʼah tʼáá aaníinii béʼítłʼó dóó bee hazʼáanii bidáʼdiníłjeeh.

17 Áádóó Diyin Bóhólníihii nayíníshłíigo, éí Jacob bighandóó haojéʼígíí yitsʼąą biniiʼ neiniłʼinii hádíshʼį́įʼ doo.

18 Áko shooh, Diyin Tʼáá Ałtsoní bee Bóhólníihii Dził Zion bighą́ąʼdi kééhatʼíinii, éí Diyin Bóhólníihii shí dóó áłchíní sheinínilígíí Israel dineʼé bitahgi bee éédahózinii dóó Diyin bee óʼoolʼįįłii daniidlį́.

19 Áádóó ádanihidííniidgo: Níłchʼi doo yáʼádaashoonii, dóó níłchʼi biʼiiníziinii yee yádaałtiʼii yíká ádaahtʼį́į doo—diné Diyin God yíká ádaahtʼį́įgo, dahnidahidiikaiígíísh nideídíłkid doo?

20 Bee hazʼáanii dóó tʼáá aaníinii yee ádaatʼéhígíí; díí saad doo yikʼeh yádaałtiʼgóó, biniinaanígíí éí bee adinídíín biyiʼ ádaadin.

21 Áádóó bichʼįʼ nidahwiiʼnáh dóó dichin danilį́įgo nidaakai doo; áádóó baa hodoolzhish éí dichin biʼniighą́ąʼgo ádá dahodoolchįįł, aláahdi binanitʼaʼí áádóó dabiDiyin God dayódziihgóó chʼééh yótʼááhgóó dadéezʼį́į́ʼ doo.

22 Áádóó niʼjįʼ dadéezʼį́į́ʼ doo áádóó áko shooh achʼįʼ nahwiiʼná, índa chahałheeł, yínííł bikʼeʼíyéeʼii bee chahałheełgo deidoołtsééł, áko éí ayóó átʼéego chahałheełígíí góneʼ abidíʼnoolkał.