1 Ákótʼée ndi, éí yínííł adaatʼéhę́ę kʼad tʼáá biʼoh doo, Zebulun dóó Naphtali dineʼé áłtsé yichʼįʼ nahwiisnááʼ, áádóó bikéedi doo chʼǫhooʼį́į́góó yichʼįʼ ninááhwiisnááʼ Galileedi kéédahatʼínígi Jordan biláahdi Tónteel Łichííʼídi.

2 Diné éí chahałheeł yiiʼ deiyíkááh yę́ę ayóó átʼéego adinídíingo dayiiłtsą́; anoonééł bikéyah góneʼ deiyíkááhígíí, bikʼidaʼ deezdláád.

3 Diné yíníłąąd, dóó ayóó bił dahóózhǫǫd—daʼneestʼánígíí átʼéego yaa bił dahóózhǫǫd, dóó diné naanisé ałtaadeiniih nahalingo yaa bił dahóózhǫǫd.

4 Háálá naaldlooshii bizéédeetání bidéʼátʼéhę́ę́ kʼíínítʼiʼ, dóó biwos bee nidaazyę́ę, índa bichʼįʼ átíbíłʼínée bighish ałdóʼ.

5 Háálá tʼáá ałtso ndaabaahii daʼahighą́ągóó doo ééhoozinóó ayóó íítsʼá, dóó biʼééʼ dił bee daneesmas; áko díí éí dookʼą́ą́ł dóó bee kǫʼ.

6 Háálá awééʼ nihá yizhchį́, ayeʼ nihaíltį́; nahátʼá bił hazʼą́ biwos bąąh siláa doo, áádóó díí ízhíʼ bee wójį́į doo, Ayóóʼánolínii, Ánahahʼaií, Diyin God Ayóóʼábóodziilii, Hoolʼáágóó nihiTaaʼ Nilíinii, dóó Hózhǫ́ǫgo Yinantʼaʼí.

7 David dasidáádóó, nahatʼá dóó hózhǫ́ kʼéh doo nítʼiʼ da, dóó yee hahodiilaa, binahjįʼ nahwiitʼaah doo, dóó tʼáá ákogi átʼéegoo yee nahoníʼą́, kodóó tʼáá ákótʼéegoo ahoolʼáa doo. Diyin Tʼáá Ałtsoní bee Bóhólníihii bibeʼadziilii yee.

8 Diyin Bóhólníihii éí Jacob yichʼįʼ haneʼ áyiilaa, áádóó Israel dineʼé yikʼi hooleʼ.

9 Díí diné tʼáá ałtso bił béédahózin dooleeł, Ephraim dineʼé áádóó Samaria kéédahatʼínígíí, éí ádaa deidzódlíigo áádóó bijéí dáátłʼisgo yee ádaaní:

10 Hashtłʼish dáástłʼisígíí naaʼadahaasdááz, nditsé hashtʼéédaalyaahígíí bee háádádiitłʼį́į́ł; sycamores tsin naazkaadígíí kʼideesneʼ, ndi deílʼá yę́ęgi gad kiʼdidoolyééł.

11 Díí bąągo Diyin Bóhólníihii éí aláahgo naatʼáanii Rezin bitsʼą́ą́jí danilíinii hakʼijįʼ yiʼdoołʼnih, hatsʼą́ą́jí danilínígíí ahíídooʼish;

12 Syria dineʼé alą́ąjįʼ áádóó Philistia dineʼé éí akéédę́ę́ʼ; áko éí bizééʼ ąą átʼéego Israel dineʼé adeidoołnah. Azhą́ díí tʼáá ałtso ákótʼée nditʼahdii hachʼįʼ bahachʼįʼ, ákondi tʼahdii hachʼįʼ dahdoolnih.

13 Atíbíłį́į ndi Diné tʼáadoo bichʼįʼ náhaaskai da, doodago Diyin Tʼáá Ałtsoní bee Bóhólníihii doo hadeinitáa da.

14 Díí bąągo tʼáá łaʼajį́ Diyin Bóhólníihii Israel bitsiitsʼiin áádóó bitseeʼ, índa tsin bitsʼádaozʼaʼ dóó tłʼoh kʼíídookał.

15 Ałkiʼdą́ą́ hastóíyę́ęʼ, éí atsiitsʼiin nilį́, áádóó Diyin yá yáłtiʼii biyoochʼíidgo naʼnitinii, éí atseeʼ nilį́.

16 Háálá, naatʼáanii díí diné ndaʼiisííhgo yiih dayóʼéésh, éí doo ákótʼéego akéé deikaihígíí ábiʼdisdįįd.

17 Diyin Bóhólníihii díí bąą hatsiłkéí doo yaa bił hózhǫ́ǫ da, áádóó áłchíní bizhéʼé ádaadinii dóó asdzání bąąh ádahasdįįdii doo yaa aʼáhi dínóozįįł da, háálá tʼááłáʼí jinítínígo tʼóó ádahozhdilʼį́ dóó bąąhági ádajitʼį́, índa tʼáá ádzaagóó yádajiłtiʼ. Azhą́ díí tʼáá ałtso ákótʼée ndi tʼahdii hachʼįʼ bahachʼįʼ, ákondi tʼahdii hachʼįʼ dahdoolnih.

18 Háálá bąąhą́giʼ ádaatʼéii kǫʼ nahalingo dookʼą́ął łeh; chʼil hoshí dóó chʼil deeníní iidiyiiłkʼą́ą́h, dóó tsintah dahodíłchʼilgóó yidahodinil dóó łid deigo hahaghááh.

19 Diyin Tʼáá Ałtsoní bee Bóhólníihii yéígo báháchįʼgo niʼ hodííłkʼą́ąʼgo bee chahóółhéél, diné éí chizh nahalingo bee hodookʼą́ą́ł doo; diné éí bikʼis doo yísdéídóólóós da.

20 Áádóó nishʼnáájígo bighaan yiká dijih ndi tʼóó dichin bidíʼnóółhééł; áádóó nishtłʼajígo yee ííyą́ąʼ ndi doo yee hwiih dooleeł da; tʼáá ájíłtso tʼóó hagaan dazhdoolghał—

21 Manasseh, Ephraim; dóó Ephraim, Manasseh; tʼáá áłaʼ Judah dineʼé yitsʼáájí dooleeł. Azhą́ díí tʼáá ałtso ákótʼée ndi tʼahdii hachʼįʼ bahachʼįʼ, ákondi tʼahdii hachʼįʼ dahdoolnih.