1 Háálá áko shooh, Diyin Bóhólníihii, Diyin Tʼáá Ałtsoní bee Bóhólníihii, éí Jerusalemdóó, áádóó Judahdóó, bááh áádóó tó bee iináanii tʼáá átʼé nahjįʼ kóyiilaa—

2 Diné hayóii, áádóó diné naabaahii, ánihwiiʼaahii áádóó Diyin yá yáłtiʼii, bił áhátʼíinii, áádóó ałkʼidą́ą́ dahastóí yę́ę;

3 Ndaabaahí ashdladiingo yinanitʼaʼí, áádóó diné ił nilíinii, achʼįʼ yáltiʼii, áádóó naʼachʼąąh yiyiichįįhii, índa ayoo yádaałtiʼii.

4 Áłchíní honanitʼaʼí danilį́įgo áhodeeshłííł, áádóó awééʼ danilíinii hakʼíbídahólníih doo.

5 Diné ahidiníłnáago, tʼááłáʼí nítínígo, ałkʼijįʼ danilį́į doo, yił kéédahatʼíinii yichʼįʼ ákódaatʼée doo; áłchíní éí hadaastiʼígíí yichʼįʼ ádaadádzódlíi doo, índa diné doo joobaʼii éí diné bił ilíinii yikʼijįʼ nilį́į doo.

6 Diné łaʼ bizhéʼé bighangi hakʼis yizdoołtsołgo, ábizhdidooniił: Niʼéénééz nee hólóonii, nihinanitʼaʼí dííleeł, díí nidahaazhchǫʼígíí éí doo nilákʼee silaa da doo—

7 Éí bijį́įdi yee nihodooʼááłgo, ádidooniił, Shí doo nááʼdiʼyiiłáahii nishłį́į da doo, háálá shighan góneʼ bááh áádóó ééʼ ádin, áko diné binanitʼaʼí tʼáadoo ádashołéhé.

8 Háálá, Jerusalemgi hóóchxǫʼ áádóó Judah kéyah bikʼihodeesdlį́į́ʼ, háálá Diyin Bóhólníihii beʼayóó átʼéii doo deiniizį́į́ʼ da tʼóó yikʼijįʼ yádááłtiʼ índa yikʼijįʼ daazlį́į́ʼ.

9 Biniiʼjįʼ adaatʼéihígíí bee béédahózin; bibąąhági átʼéii Sodomgi yidaałtʼé éí yitʼíní silį́ʼígi átʼéego bąąhági átʼéii doo nídeididóółʼį́įł da. Dooládóʼ biiʼ naazíinii bichʼįʼ yééʼ dooleeł, háálá doo yáʼáshóonii ákʼijįʼ dayoosbą́!

10 Diyinkʼehgo deiyikááhígíí bee bił dahółneʼ yáʼátʼéehgo adaatʼée doo, háálá haayitʼáó dahinanígíí éí binahjįʼ bineestʼąʼ deiyą́ą doo.

11 Dooládóʼ diné doo yáʼádaashóonii bichʼįʼ yééʼ hodooleeł da, ákó tiʼdahodoonih; háálá, ádájiilaígíí hachʼį́ násdlaa doo.

12 Dóó shidineʼé danilíinii, éí áłchíní hachʼįʼ nidahwiiłná, áádóó sáanii ałdóʼ hwee ádídahólnííh. O shidineʼé danohłíinii, nihindanitʼaʼí óódzííʼjí ndanihíʼeesh áádóó bikʼehgo deiyínóhkáhą́ą nihitsʼą́ą́ʼ nidayiishchxǫʼ.

13 Diyin Bóhólníihii bidineʼé yánáookąąh yiniyé sizį́, áádóó yá nahodooʼááł yiniyé sizį́.

14 Diyin Bóhólníihii éí bidineʼé bizázíyę́ę áádóó bindanitʼaʼí yá nahodooʼááł; nihí lą́ą chʼil naʼatłʼoʼii kʼidoolyáhígíí ałtso daoyą́ą́ʼ; badahojoobáʼígíí binaalyeʼé danihighangóó adáhisoojaaʼ.

15 Haʼátʼíishąʼ ááłdadohní? Shidineʼé tʼááʼíyisíí atʼidaałʼí, dóó baa dahojoobáʼígíí tʼóó bikʼinaałdeeh, Diyin God Tʼáá Ałtsoní bee Bóhólníihii ání.

16 Diyin Bóhólníihii ánáádooʼniid, Zion bichʼéʼéké ádaa deidzódlí áádóó, dah danéetʼaahgo nidaaghal, áádóó yooʼniłchíní bikétsííndi dadiitsʼaʼgo, hadahidilʼéesgo nidaakai—

17 Díí bąą Diyin Bóhólníihii éí Zion bichʼéʼéké bitsiitʼááhgóó łóód bikʼi nidahaazkę́ęzgo yee atíhodoolííł, áádóó Diyin Bóhólníihii nidanilʼínée éí ííshjání íídoolííł.

18 Áádóó beiníłkaago Diyin Bóhólníihii kétsíín náztʼiʼii dadiitsʼaʼígíí yee ádaadahodzóhdlí nahjįʼ kwíidoolííł áádóó tsiiʼ nástʼihʼí, áádóó yooʼ dahiitą́ bídaʼalyaago;

19 Yooʼ áádóó látsíní, áádóó tsiiʼ nástʼihʼí biníkáhootʼíní;

20 Chʼah, áádóó béésh daʼahólzhaʼí akétsíín náztʼiʼii, áádóó atsiiʼ binástiʼii áádóó łikání bee dahojílchinii áádóó jádaatłʼóół;

21 Yoostsah áádóó áchį́į́h bił dah nídaatį́hí,

22 Éé agháadi ádaatʼéii, áádóó éénééz, áádóó adzání bitsiitsʼiin bikʼéstiʼí, áádóó béeso bizis nidaadlóʼígíí;

23 Biiʼ adéestʼį́į́ʼ, áádóó áłtsʼóózígo yisdizígíí bee naʼatʼą́hí ditsʼidgo ályaii ééʼ, áádóó aniiʼjįʼ bikʼídaastiʼí.

24 Áádóó baa hodoolzhish, bee łikání dahojílchinii dííłdzid dahalchin doo; bee áká dadziszaazii tłʼóół tʼéiyá dooleeł; bitsiiʼ nizhónígo nidaashchʼąąʼii, bídáátʼóod doo; ééłgaii yiih nídaakahii tłʼoh azis ééʼ nídadoodleeł; dajízhóní yę́ę tʼóó haa yádahasin doo.

25 Nidiné danilíinii béésh hał bee nidadootsił; nidiné dahayóii anaaʼdi nidadootsił.

26 Áko bidáńʼdaʼditį́hígóó daachxago yínííł danilį́į doo; índa tʼáadoo hąąhígóó, niʼgóó dzizdáa doo.