1 Babylon bikʼeʼíyéé, éí Amoz biyeʼ Isaiah yiyiiłtsą́.

2 Dził agháhóóʼáadi dah naʼatʼaʼí dahdííłtsos, diné bichʼí hadidíílwosh, dóó nílaʼ dííghał, áko naatʼáanii danilíinii bidanídíʼtį́į́hí góneʼ yah ahidookah.

3 Haałtʼéego ádaashłaaʼígíí ábidííniid, diné ayóó ádáátʼéii ałdóʼ biká ádííniid, ayóó áníshtʼéego shaa dah haniihígíí doo bichʼįʼ sháháchįʼ da.

4 Dził dabighą́ą́dę́ę́ʼ diné tʼóó ahayóí nahalingo ayóó íístsʼą́ą́ʼ, aláahdi bidahólníihii bił nidahazʼą́ą́dę́ę́ʼ ałah silį́į́ʼgo hahodííłdláád, Diyin Tʼáá Ałtsoní bee Bóhólníihii siláo dah deínéehgo áyiilaa.

5 Kéyah bił adahwiisʼáádę́ę́ʼ yíkai, yáʼąąsh nihineesʼą́ą́dę́ę́ʼ, aooʼ, Diyin Bóhólníihii, hashkéego yee atʼíʼíłʼíinii, kéyah tʼáá átʼé yee yidoołchxǫǫł.

6 Ayóó íitsʼaʼgo daahchxa, háálá Diyin Bóhólníihii íʼdoolíłígíí bichʼįʼ yoołkááł; Ayóóʼábóodziilii átíʼdoolííłgo baa hodoolzhish.

7 Éí bąą álá tʼáá ałtso nidaneesnaʼ doo, áádóó nihokááʼ dineʼé tʼáá ałtso bijéí ńtsidadooltłił;

8 Áádóó nídadooldzííł; bił nidahonigaahgo áádóó yínííł bide ádaatʼée doo; kǫʼ nahalingo biniiʼ deidoochxih, ałchʼįʼ tʼóó bił adahayói doo.

9 Áko shooh, Diyin Bóhólníihii doogááłgo bichʼįʼ yoołkááł, áko tsʼídá doo chohooʼį́į́góó tʼóó báhádzidgo bá hodoochxįįł, nahasdzáán doo bikááʼ siláhígóó íidoolííł; áádóó bąąhági ádaatʼínígíí íidoołdįįł.

10 Háálá yáʼąąshdi sǫʼ áádóó sǫʼ dah naazhjaaʼii doo bitsʼádaʼdeezdíín da doo; jóhonaaʼéí bił chahodoołhił, áádóó tłʼééhonaaʼéí doo adiníłdíin da dooleeł.

11 Áádóó nihokááʼgóó bąąhági ádaatʼéii, dóó doo yáʼáshóonii ádaatʼínígíí atídeeshłííł, ádaa hodzódlí yee ádaatʼéii ádeeshdįįł, áádóó ádaa dadzódlí aʼohʼgo ádeeshłííł.

12 Diné béésh óola biláah ílį́įgo ádeeshłííł; éí diné Ophir bibéésh óola biláahgi átʼée doo.

13 Éí bąą, yádiłhił biyiʼ siléí dadeeshhał, áádóó nahasdzáán siʼánídóó nahjįʼ kódoonííł; éí Diyin Tʼáá Ałtsoní bee Bóhólníihii báhádzidgo, báhóóchįįd bijį́įdi ákóhodoonííł.

14 Áádóó bįįh noochéłígi átʼéego, dóó dibé doo baa áhóólyąíʼgiʼ átʼáo; dóó diné tʼáá bí bidineʼé yichʼįʼ anáhidookah, áádóó tʼáá bí bikéyahgóó anáhidoochééł.

15 Tʼáá ałtso ádaa dadzódlii béésh hał hwiníkáh dadoolzhish; aooʼ, dóó bąąhági ádaatʼį́ bidahizhdiikaiígíí béésh hał hodooghą́ą́ł.

16 Haʼáłchíní yázhí hanááł nikídeidiłtsxisgo deidooghą́ą́ł, áádóó dabighan deidoołchxǫǫł, índa hwedaʼasdzą́ą́ tʼáá bidanizinígiʼ átʼáo atídeidoolííł.

17 Áko shooh, Medes dineʼé hakʼijįʼ bił hahodínéeshchxał, éí béésh łigaii doo béésh óola doo bił danilį́į da, éí doo yaa bił dahózhǫ́ǫ da.

18 Bidaʼałtį́į́ʼ yee tsíłkéí nideidoołtsxił; dóó ániid ndahaazhchínígíí doo yaa aʼáhí dadínóozįįł da; índa áłchíní doo yaa hą́ą́h dadinóózííł da.

19 Áádóó Babylon, éí ayóó átʼéego bił hazʼą́, Chaldea dineʼé atxisdi átʼéego ayóó ánoolnin, éí Diyin God Sodom dóó Gomorrah hazʼánígi yikʼehdeesdlį́į́ʼ yę́ęgi átʼée doo.

20 Tsʼídá ákweʼí doo kééhatʼíní da doo, doodaiiʼ náásgóó báʼáłchíní doo łaʼ ákwii kééhojitʼį́į da doo; Arabian dineʼé tsʼídá doo łaʼ ákwii haníbaal nizhdooʼáał da, doodaiiʼ naʼniłkaadii tsʼídá doo łaʼ ákwii halį́įʼ naagháa da doo.

21 Ákondi halgaigi naaldlooshii daʼałchinii ákwii naazhjééʼ doo; dahoghan yę́ęgóó néʼáshjaaʼ ádaatʼéii hadaasʼáa doo; satyrs ákweʼé dah alzhish doo.

22 Áádóó naaldlooshii daʼałchinii tónteel bikááʼ kéédahatʼinée éí dahooghanáágóó daachxa doo, dóó tłʼiishtsoh yáʼátʼéehgo kin naaznilyę́ęgóó; kʼadę́ę bił nihooghááh, dóó doo díkwíída náábíídoołkááł da. Háálá tsxį́įłgo hodiyeeshxééł, aooʼ, shidineʼé baajiinishbaʼ doo, ákondiʼ bąąhági ádaatʼínígíí ndooltsxił.