1 Ayóóʼóóshʼníinii hániʼdii bá hashtaałgo bichʼil naʼatłʼoʼii kʼidoolyáhígíí sin ayóóʼóóʼníinii bee bá hashtaał doo. Ayóóʼóóshʼníinii éí yílkʼidgi dáʼákʼeh ayóó nantʼą́nígíí bee hólǫ́.

2 Nihwiiłdlaadgo, tsé nahjįʼ hayiiznil, áádóó chʼil naʼatłʼoʼii tsʼídá íliinii kʼiidíílá, índa biníiʼgi bikááʼdóó haʼalzídí yiztłʼin, áádóó ałdóʼ chʼil naʼatłʼoʼii bitooʼ bąąh hahaʼnííh bá hazʼą́ągo áhóola; áádóó índa chʼil naʼatłʼoʼii bąąh dah dadínóodah nízingo yaa ninánítaah, ndichʼil naʼatłʼoʼii díkʼǫ́zhígíí bąąh hazlį́į́ʼ lá.

3 Dóó kʼad, O Jerusalemgi kéédahohtʼíinii, áádóó Judahgi diné danohłíinii, nánihooshkąąh: shí daatsʼí, doodago shichʼil naʼatłʼoʼii kʼidoolyáhígíí daatsʼí, éí nidadinohʼaah.

4 Shichʼil naʼatłʼoʼii kʼidoolyáhígíí haʼátʼíí lá tʼáá íídą́ą́ʼ tʼáá haʼátʼéhígoda ánáádeeshłííł ńtʼę́ę́ʼ láʼ? Ákohgo, chʼil naʼatłʼoʼii bíká díníshʼįʼę́ę tʼóó chʼil naʼatłʼoʼii díkʼǫ́zhígíí bąąh hazlį́į́ʼ láʼ.

5 Dóó kʼad; shichʼil naʼatłʼoʼii kʼidííláii ádeeshłíłígíí bee nihił hodeeshnih—chʼil bąąh náádadineesánígíí nahjįʼ kódeeshłííł, áádóó ałtso doodį́į́ł; binaa ahénátłʼinii ałtso táideeshʼniłgo, ałtso bikʼi nidooldah;

6 Dóó tʼáá ádzaaí ádeeshłííł; chʼil naʼatłʼoʼii doo bąąh náhágéésh da doo doodago doo bikʼi náhágod da doo; tʼóó chʼil ahoshí áádóó chʼil deeníní bił yílʼáa dooleeł, áádóó ałdóʼ kʼos bitsʼą́ą́dóó doo bikʼi nahodoołtį́į́łgóó bee hwiideeshʼaał.

7 Háálá Diyin Tʼáá Ałtsoní bee Bóhólníihii bichʼil naʼatłʼoʼii kʼidoolyáhígíí éí Israel bighandóó háájéʼígíí ádaatʼį́, áádóó Judah dineʼé éí baa hózhǫ́ǫgo kʼidoolyáhígíí átʼé; dóó doo haada yitʼéii yíká déezʼį́į́ʼ, áádóó áko shooh, tʼáadoo leʼé bee ade áhootʼé óolzinígíí yiyiiłtsą́; Diyinkʼehgo oodaał yíká déézʼį́į́ʼ, ákondi shooh, chá nahadleeh yidiiztsʼą́ą́ʼ.

8 Yíí kin áádóó kéyah aghahiditʼaah bee daʼíínótʼįįhii, doo hazʼą́ą da doo, nahasdzáán bikáaʼgi tʼáá sáhí hólǫ́ǫ doo!

9 Diyin Tʼáá Ałtsoní bee Bóhólníihii kóníigo, disétsʼą́ą́ʼ, tsʼídá tʼáá aaníí kin tʼóó ahayóí tʼáá ádzaaí dadooleeł; kintah ayóó ádaatʼéhígíí dóó ayóó ádaanóolninígíí, ndidoo biiʼ nidaagháhí da dooleeł.

10 Aooʼ, neeznáá náhásdzohgo chʼil naʼatłʼoʼii kʼidoolyáhígíí éí chʼil naʼatłʼoʼii bitooʼ tʼááłaʼí yikááł bíighah doo; bee íʼneelʼąąhí homer wolyéii biiʼ álástsiiʼ hadeezbingo kʼidoolyáago ephah wolyéii neeznáá hadeezbingo bíighah nídoodleeł.

11 Yíí abíínídą́ą́ʼ náájidiikahgo, shá bíighah tó diłhił ńdajídlį́įhígíí, áádóó wáin hiłiijį́įhjįʼ hadeidínídlį́įhgo ndabiiłáhígíí!

12 Tsin tłʼóół bąąh daneelzheeʼgo, dóó tsin tłʼóół bąąh danítʼiʼgo bee nidaʼaʼnéhígíí, áádóó ásaaʼ yilghaałígíí, áádóó tsin bee íʼdílzoołí, índa wáin yił ndaʼálghałígíí, Diyin Bóhólníihii binaanish doo yaa ńdaatʼį́į da, áádóó yinaalnishii doo yaa nitsídaakees da.

13 Díí bąą, shidineʼé tʼáadoo hoł éédahoozingóó biniinaa, tʼóó naalteʼ dazhdooleeł; áádóó dineʼé bił danilíinii dichin biʼniighą́ą́ʼ, áádóó bidineʼé deílʼáhígíí dibááʼ biʼniighą́ą́ʼ.

14 Díí bąą, chʼį́įdiitah ayóo aldeeł silį́į́ʼ, áádóó bizééʼ doo bíʼnólʼąąh áníłtsogóó yee aldeeł, áádóó yee ayóó ádaatʼéii, áádóó bidineʼé deílʼáhígíí, áádóó yee ayóó ádaatʼé ídaʼdólzinii, índa tʼáá háiida baa hoł hózhóonii, éí ákóneʼ yaa ajiikááh doo.

15 Áádóó diné tʼáá bitaʼígi ádaatʼéii niʼkódabiʼdi doolnííł, áádóó diné ayóó ádaatʼéii hojoobaʼ ádeinízingo ádabidiʼdoolnííł, áádóó ádaa deijódlí hojoobaʼ ádeinízingo ádahodiʼdoolnííł.

16 Ákondi Diyin Tʼáá Ałtsoní bee Bóhólníihii ánihwiiʼaahgo tsʼídá baa hodoonih, áádóó Diyin God diyinii éí diyinkʼehgo oodááł bee hałtʼéégo ádoolnííł.

17 Ákohgo dahootsogóó dibé yázhí nidaʼałchozhgo, áádóó diné tʼáá azaago nidaakaihígíí kintsʼiilgóó daneeskʼahígíí deiyą́ą doo.

18 Yíí doo yáʼáshóonii tłʼóółtsʼósí nahalingo bidádazhnoolníinii yooʼadanihiniiʼaah, áádóó bąąhági átʼéii tłʼóół nahalingo danihótąʼ;

19 Kódajinínígíí: Dadíníilʼįįł biniyé, hániʼdii tsxį́įłgo ájítʼį́į doo, áádóó tʼáá hodíínaʼí binaanish íídoolííł; áádóó índa nihił béédahodoozįįł, Israel biDiyin Ayóóʼátʼéii yihazʼáanii hániʼdii ákóhánéehgo baa hodoolzhish.

20 Yííʼ doo yáʼáshóonii éí yáʼátʼéehii átʼé, áádóó yáʼátʼéehii éí doo yáʼáshóonii átʼé, daaníinii, chahałheeł éí adinídíín átʼé, áádóó adinídíín éí chahałheeł átʼé, índa díchʼíiʼii éí łikanii átʼé áádóó łikanii éí díchʼíiʼii átʼé!

21 Yííʼ dahoniidzą́, danízingo ádaʼdinílʼíinii áádóó hóyáanii daniidlį́, danízinii!

22 Yíí ayóó ádaatʼéii wáan deidláanii, índa diné dabidziilii tó tsiʼnaʼiiłáii ałtaa ńdeídlį́įhii;

23 Béeso bideená bikʼé doo yáʼádaashóonii tsʼídá ádeiłʼíinii, diyinkʼehgo oodááł bidiyingo oodááł nahjįʼ kódeiłʼíinii!

24 Díí bąą, kǫʼ tséhégod iidiyiiłkʼą́hígi átʼéego, áádóó azhool ahidikʼą́hígi átʼéego bekétłʼóól hadahidoołdził, índa łeezh łibáhígi átʼéego bílátah hózhóón bił hadooyoł, háálá Diyin Tʼáá Ałtsoní bee Bóhólníihii bibee hazʼáanii doo deiniizį́įʼ da, áádóó Israel biDiyin Ayóóʼátʼéii bizaad dayííʼįįd.

25 Díí bąą, Diyin Bóhólníihii báhóóchįįdgo bidineʼé yikʼijįʼ nilį́, áádóó yikʼijįʼ dah doolnihgo, atíyiilaa, áádóó dadaaskʼid daditłid, índa kintah daʼnítiingóó bitsʼíís tsʼiilzéí nahalingo nihidadíbéézh. Azhą́ díí tʼáá ałtsojįʼ kóhóola ndi, tʼahdii hachʼįʼ báháchįʼ ndi tʼahdii hachʼįʼ kʼídéesniiʼ.

26 Áádóó ałʼąą dineʼé doo deeghánídi kéédahatʼíinii dah naʼatʼaʼí yichʼįʼ dah yididoołtsos, índa nahasdzáán nidahoneesʼą́ą́góó kéédahatʼíinii yichʼįʼ ídiʼdoosoł; áádóó áko shooh, tʼáadoo hodinaʼí tsxį́įłgo nidahakah, tʼááłáʼí ndi, doo chʼééh digháah da doo, doodago doo digeeh da doo;

27 Tʼááłáʼí ndi, doo bił nízin da doo, doodaiiʼ doo ałhosh da doo; biziis doo kʼedaʼooʼnééh átʼée da doo índa bikétłʼóól doo dahadlaad da doo;

28 Dabikʼaaʼ tʼáá ałtso dadeení, tʼáá ałtso beʼełtį́į́ʼ yił naazdá, dabilį́į́ʼ bikeeʼ tsédildǫ́ʼiigi ádaatʼé hwiindzin, áádóó náátsʼóʼoołdísii yilwoł nahalingo tsinaabąąs bijáád naakiígíí bił nidaajeeh, náshdóítsoh bitsiijįʼ ditłʼooígíí ádaaní nahalingo.

29 Náshdóítsoh bitsiijįʼ ditłʼooígíí biyázhí ádaaní nahalingo; aooʼ, biyázhí ádaaníi doo; dóó deisnahígíí adeidiyoojih, dóó doo łaʼ chʼíbidooʼishí da.

30 Díí éí bijį́ tónteel hahalgháásh nahalingo yił dahidideełii yichʼįʼ hahóółʼá; áádóó kéyahgóó dadééʼį́įʼgo, áko shooh, chahałheeł áádóó yínííł deidoołtsééł índa yáʼąąshdi adinídínígíí tʼóó tłʼééʼ hodooleeł.