« ការស្ថាបនាទម្លាប់ដែលមានភាពវិជ្ជមាន ៖ ព្រះយេស៊ូវគ្រីស្ទអាចជួយយើងផ្លាស់ប្តូរទម្លាប់របស់យើង » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ការស្ថាបនាទម្លាប់ដែលមានភាពវិជ្ជមាន ៖ ព្រះយេស៊ូវគ្រីស្ទអាចជួយយើងផ្លាស់ប្តូរទម្លាប់របស់យើង » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា
សុខភាពខាងរាងកាយ និងខាងសតិអារម្មណ៍ ៖ មេរៀនទី ១៨៧
ការស្ថាបនាទម្លាប់ដែលមានភាពវិជ្ជមាន
ព្រះយេស៊ូវគ្រីស្ទអាចជួយយើងផ្លាស់ប្តូរទម្លាប់របស់យើង
សកម្មភាពដែលយើងធ្វើម្តងហើយម្តងទៀត ក្លាយជាទម្លាប់ ។ ទម្លាប់ខ្លះអាចជួយយើងឲ្យធ្វើតាមព្រះអង្គសង្គ្រោះបានកាន់តែប្រសើរ ។ ទម្លាប់ផ្សេងទៀតអាចជាវិធីមិនល្អក្នុងការដោះស្រាយនឹងអារម្មណ៍លំបាក ហើយអាចនាំឲ្យអារម្មណ៍យើងឃ្លាតឆ្ងាយពីព្រះវរបិតាសួគ៌ និងព្រះយេស៊ូវគ្រីស្ទ ។ ការបង្កើតទម្លាប់ដែលមានភាពវិជ្ជមានជួយយើងឲ្យមានអារម្មណ៍ជិតស្និទ្ធិនឹងទ្រង់ទាំងទ្វេ ហើយក្លាយកាន់តែដូចជាទ្រង់ទាំងទ្វេ ។ មេរៀននេះអាចជួយសិស្សស្វែងរកជំនួយពីព្រះវរបិតាសួគ៌ និងព្រះយេស៊ូវគ្រីស្ទ ដើម្បីស្ថាបនាទម្លាប់ដែលមានភាពវិជ្ជមាន ។
ការរៀបចំសិស្ស ៖ សូមអញ្ជើញសិស្សឲ្យគិតអំពីអ្វីដែលពួកគេធ្វើជារៀងរាល់ថ្ងៃដែលបានក្លាយជាទម្លាប់ ។ កិច្ចការដែលពួកគេធ្វើជាប្រចាំក៏អាចឆ្លុះបញ្ចាំងពីរបៀបដែលទម្លាប់ទាំងនេះ ទាំងល្អ និងអាក្រក់ កំពុងជះឥទ្ធិពលដល់ការរីកចម្រើនខាងវិញ្ញាណរបស់ពួកគេផងដែរ ។
ការរៀបចំសិស្ស ៖ អញ្ជើញសិស្សឲ្យគិតអំពីអ្វីៗដែលពួកគេធ្វើជារៀងរាល់ថ្ងៃ ដែលបានប្រែក្លាយជាទម្លាប់ ។ ពួកគេក៏អាចគិតពិចារណាពីរបៀបដែលទម្លាប់ទាំងនេះ ទាំងល្អ និងអាក្រក់គឺប៉ះពាល់ដល់ការរីកចម្រើនផ្នែកខាងវិញ្ញាណរបស់ពួកគេ ។
សកម្មភាពរៀនសូត្រដែលអាចមាន
ទម្លាប់គឺដូចជាសួនច្បារ
អ្នកអាចចាប់ផ្តើមថ្នាក់រៀនដោយប្រៀបធៀបការបង្កើតទម្លាប់ដែលមានភាពវិជ្ជមានទៅនឹងការដាំដុះក្នុងសួនច្បារ ។ ដើម្បីធ្វើដូច្នេះ សូមពិចារណាបង្ហាញរូបភាពនៃស្មៅមួយគុម្ព និងបន្ទាប់មករូបភាពផ្កា ឬរុក្ខជាតិមួយជួរនៅក្នុងសួនច្បារ ។
សូមស្រមៃថាមិត្តម្នាក់ចង់ដឹងពីអ្វីដែលពួកគេត្រូវធ្វើដើម្បីប្រែក្លាយដីដែលគ្របដណ្តប់ដោយស្មៅទៅជាសួនច្បារ ។
-
តើអ្នកនឹងទូន្មានពួកគេឲ្យធ្វើអ្វី ?
សិស្សអាចនិយាយអំពីរឿងផ្សេងៗដូចជា ការដកស្មៅ រៀបចំដី ដាំគ្រាប់ពូជ ការដាក់ជី និងការស្រោចទឹករុក្ខជាតិ ។
-
តើដំណើរការនៃការដាំដុះក្នុងសួនច្បារអាចប្រៀបធៀបទៅនឹងការបង្កើតទម្លាប់ដែលមានភាពវិជ្ជមានយ៉ាងដូចម្តេច ?
សូមពិចារណាអញ្ជើញសិស្សឲ្យគិតអំពីទម្លាប់របស់ពួកគេ។ សិស្សអាចស្វែងរកជំនួយពីព្រះវិញ្ញាណបរិសុទ្ធ ដើម្បីស្គាល់នូវអ្វីដែលពួកគេកំពុងធ្វើបានល្អ និងអ្វីដែលពួកគេអាចកែលម្អ ។
នៅក្នុងសៀវភៅកំណត់ហេតុការសិក្សារបស់ពួកគេ សិស្សអាចគូររូបស្មៅ និងផ្កា ។ សិស្សអាចដាក់ស្លាកស្មៅថា « ទម្លាប់ដែលខ្ញុំចង់ផ្លាស់ប្តូរ » ហើយដាក់ស្លាកផ្កាថា « ទម្លាប់ដែលគួរចាប់ផ្តើម ឬបន្ត » ។
ប្រសិនបើសិស្សត្រូវការឧទាហរណ៍ អ្នកអាចបង្ហាញរូបភាពខាងក្រោម ឬគូរវានៅលើក្ដារខៀន ។
-
តើទម្លាប់មានឥទ្ធិពលអ្វីខ្លះមកលើជីវិតរបស់យើង ?
-
តើអ្វីអាចធ្វើឲ្យការកែទម្លាប់មិនល្អ ឬបង្កើតទម្លាប់ដែលមានភាពវិជ្ជមានមានការពិបាក ?
ព្រះយេស៊ូវគ្រីស្ទអាចជួយយើងផ្លាស់ប្តូរទម្លាប់របស់យើង
អ្នកអាចធានាដល់សិស្សថា ទោះបីជាវាត្រូវការការខិតខំដើម្បីផ្លាស់ប្តូរទម្លាប់របស់យើងក៏ដោយ ព្រះអង្គសង្គ្រោះបានសន្យាថានឹងជួយយើង ។
សូមអាន អេសេគាល ៣៦:២៦–២៧; ម៉ូសាយ ៣:១៩ និង អេធើរ ១២:២៧ ដោយរកមើលអ្វីដែលបទគម្ពីរទាំងនេះបង្រៀនអំពីរបៀបដែលព្រះយេស៊ូវគ្រីស្ទអាចជួយយើងផ្លាស់ប្តូរ ។
-
តើខគម្ពីរទាំងនេះអាចយកមកអនុវត្តនៅក្នុងការផ្លាស់ប្ដូរទម្លាប់របស់យើងបានដោយរបៀបណា ?
ប្រធាន ជែហ្វ្រី អ័រ ហូឡិន នៃកូរ៉ុមនៃពួកសាវកដប់ពីរនាក់ ក៏បានបង្រៀនអំពីការផ្លាស់ប្តូរទម្លាប់របស់យើងផងដែរ ៖
ប្រាកដណាស់យើង ទាំងអស់ គ្នាមានទម្លាប់ គុណវិបត្តិ ឬប្រវត្តិផ្ទាល់ខ្លួនមួយចំនួន ដែលរារាំងយើងមិនឲ្យជ្រមុជខ្លួនយើងទៅក្នុងកិច្ចការខាងវិញ្ញាណទាំងស្រុងបាន ។ …[មា]នជំនួយដ៏ទេវភាពសម្រាប់យើងគ្រប់គ្នា រាល់ពេលដែលយើងមានអារម្មណ៍ចង់ផ្លាស់ប្តូរឥរិយាបថរបស់យើង ។ ព្រះបានប្រទានដល់សូលនូវការ « បំផ្លាស់បំប្រែចិត្ដគាត់ » ។ អេសេគាលបានអំពាវនាវដល់សាសន៍អ៊ីស្រាអែលពីបុរាណឲ្យបោះបង់ចោលអតីតកាលហើយ « ឲ្យ … មានចិត្តថ្មី និងវិញ្ញាណថ្មីចុះ » ។ អាលម៉ាបានអំពាវនាវឲ្យមាន « ការផ្លាស់ប្តូរដ៏ធំនេះ » ដែលបណ្តាលឲ្យពង្រីកព្រលឹង ហើយព្រះយេស៊ូវទ្រង់ផ្ទាល់ បានបង្រៀនថា « បើមិនបានកើតជាថ្មី នោះគ្មាននរណាអាចនឹងឃើញនគរព្រះបានទេ » ។ ច្បាស់ណាស់លទ្ធភាពនៃការផ្លាស់ប្តូរ និងការលើកកម្ពស់កម្រិតនៃការរស់នៅតែជាអំណោយទានមួយរបស់ព្រះដល់អ្នកដែលស្វែងរកវាជានិច្ច ។ ( « ទ្រព្យសម្បត្តិច្រើនណាស់ » លីអាហូណា ខែវិច្ឆិកា ឆ្នាំ២០២១ ទំព័រ ៩ )
-
តើអ្នកនឹងសង្ខេបអ្វីដែលខគម្ពីរទាំងនេះ និងអ្វីដែលប្រធាន ហូឡិនបង្រៀនអំពីទម្លាប់ទៅជាសេចក្តីថ្លែងការណ៍នៃសេចក្តីពិតដោយរបៀបណា ?
នៅពេលសិស្សចែកចាយ សូមជួយពួកគេស្វែងរកសេចក្តីពិតមួយដូចជា ៖ នៅពេលយើងមករកព្រះយេស៊ូវគ្រីស្ទ ទ្រង់នឹងជួយយើងផ្លាស់ប្តូរទម្លាប់របស់យើង ។
-
ហេតុអ្វីបានជាអ្នកគិតថា យើងត្រូវការជំនួយពីព្រះយេស៊ូវគ្រីស្ទ ដើម្បីផ្លាស់ប្តូរទម្លាប់របស់យើង ?
-
តើមានរបៀបអ្វីខ្លះដែលយើងអាចមករកទ្រង់ ដើម្បីទ្រង់អាចជួយយើងកែប្រែទម្លាប់របស់យើង ?
គំរូរបស់គេឌាន
ដើម្បីជួយសិស្សឲ្យមើលឃើញពីរបៀបដែលព្រះអង្គសង្គ្រោះអាចជួយយើងផ្លាស់ប្តូរ សូមពិចារណាអំពីការចែកចាយដំណើររឿងរបស់គេឌាន ។ តាមការចាំបាច់ អ្នកអាចពន្យល់ថា ព្រះបាលជាព្រះមិនពិតដែលប្រជាជនថ្វាយបង្គំជំនួសព្រះអម្ចាស់ ( សូមមើល « ព្រះបាល » សេចក្ដីណែនាំដល់បទគម្ពីរទាំងឡាយ ) ។
ក្រោយពីធ្វើអំពើទុច្ចរិតមួយរយៈ ពួកសាសន៍អ៊ីស្រាអែលត្រូវបានជិះជាន់ដោយសាសន៍ម៉ាឌាន ។ ព្រះអម្ចាស់បានរៀបចំបុរសម្នាក់ឈ្មោះគេឌាន ដើម្បីជួយរំដោះអ៊ីស្រាអែលពីសត្រូវរបស់ពួកគេ ( សូមមើល ពួកចៅហ្វាយ ៦:១១–១៤ ) ។
នៅពេលលោកបានទទួលការចាត់តាំងរបស់ព្រះអម្ចាស់ គេឌានបានសម្ដែងការព្រួយបារម្ភថាលោកនឹងមិនអាចបំពេញកិច្ចការនោះបាន ។
សូមអាន ពួកចៅហ្វាយ ៦:១៥–១៦ ដោយរកមើលពីរបៀបដែលព្រះអម្ចាស់ឆ្លើយតបចំពោះការភ័យខ្លាចរបស់គេឌាន ។
គេឌានបាននាំយកកង្វល់របស់លោកទៅកាន់ព្រះអម្ចាស់ ។ ព្រះអម្ចាស់បានធានាដល់គេឌានថា លោកនឹងមិនប្រឈមមុខនឹងកិច្ចការនេះតែម្នាក់ឯងនោះទេ ( សូមមើល ពួកចៅហ្វាយ ៦:១៧–២៤ ) ។
សូមអាន ពួកចៅហ្វាយ ៦:២៥–២៦ ដោយរកមើលអ្វីដែលព្រះអម្ចាស់បានស្នើឲ្យគេឌានធ្វើការផ្លាស់ប្ដូរ ។
-
តើអ្នកគិតថា ហេតុអ្វីបានជាព្រះអម្ចាស់បានបង្គាប់គេឌានឲ្យរំលំអាសនាថ្វាយព្រះបាលជាមុនសិន ហើយបន្ទាប់មកសង់អាសនាថ្មីថ្វាយព្រះអម្ចាស់ ?
-
ប្រសិនបើយើងប្រៀបធៀបអាសនាទាំងពីរនេះ ( ការកសាងអាសនាថ្មីថ្វាយព្រះអម្ចាស់ បន្ទាប់ពីរំលំអាសនាថ្វាយព្រះបាល ) ទៅនឹងទម្លាប់របស់យើង តើគំរូនេះអាចបង្រៀនអ្វីខ្លះអំពីអ្វីដែលព្រះអម្ចាស់នឹងឲ្យយើងធ្វើ ដើម្បីផ្លាស់ប្តូរ ? តើមានវិធីណាខ្លះដែលទ្រង់អាចជួយយើង ?
អ្នកអាចប្រៀបធៀបការណែនាំរបស់ព្រះអម្ចាស់ទៅកាន់គេឌានទៅនឹងការដកស្មៅចេញជាមុនសិន ហើយបន្ទាប់មកការដាំគ្រាប់ពូជ ដែលនៅពីដើមនៃមេរៀន ។ សូមជួយសិស្សឲ្យយល់ពីព្រះរាជបំណងរបស់ព្រះអម្ចាស់ក្នុងការជួយយើងកម្ចាត់ចោលនូវទម្លាប់មិនល្អក្នុងជីវិតរបស់យើង ( ការដកស្មៅ / រំលំអាសនាថ្វាយព្រះក្លែងក្លាយ ) និងអនុវត្តទម្លាប់ដែលមានភាពវិជ្ជមានក្នុងជីវិតរបស់យើង ( ការដាំគ្រាប់ពូជ ការកសាងអាសនាថ្មីថ្វាយព្រះអម្ចាស់ ) ។
ការបង្កើតទម្លាប់ដែលមានភាពវិជ្ជមាន
សិស្សអាចកត់ត្រាចម្លើយរបស់ពួកគេចំពោះសំណួរខាងក្រោមនៅលើក្ដារខៀន ។
សូមអាន អាលម៉ា ១៣:២៨–២៩ ដោយរកមើលរបៀបដែលយើងអាចមករកព្រះយេស៊ូវគ្រីស្ទ ដើម្បីទ្រង់អាចជួយយើងផ្លាស់ប្តូរទម្លាប់របស់យើង ។
-
តើអ្នកបានរកឃើញអ្វីខ្លះ ?
-
តើមានរបៀបណាខ្លះទៀតដែលយើងអាចមករកទ្រង់ ?
សំណៅមេរៀន « ការបង្កើតទម្លាប់ដែលមានភាពវិជ្ជមាន ដែលជួយយើងឲ្យខិតទៅជិតព្រះអម្ចាស់ » អាចជួយសិស្សបង្កើតសាច់រឿងដែលបុគ្គលម្នាក់ជំនួសទម្លាប់មិនល្អជាមួយនឹងទម្លាប់ល្អ ។ បន្ទាប់មក ពួកគេអាចអនុវត្តជំនាញនេះក្នុងជីវិតរបស់ពួកគេផ្ទាល់ ។ សិស្សអាចធ្វើការលើសំណៅមេរៀនជាថ្នាក់ ជាក្រុមតូចៗ ឬដោយខ្លួនឯង ។
បន្ទាប់ពីទុកពេលគ្រប់គ្រាន់ហើយ សូមអញ្ជើញសិស្សឲ្យចែកចាយការយល់ដឹងដែលពួកគេមាន នៅពេលពួកគេធ្វើការលើសំណៅមេរៀន ។
ព្រះអង្គសង្គ្រោះនឹងជួយយើងផ្លាស់ប្តូរទម្លាប់របស់យើង
ដើម្បីរៀបចំសិស្សឲ្យចែកចាយបទពិសោធន៍ អ្នកអាចបង្ហាញវីដេអូ Come unto Christ: 2014 Theme Song ( ៤:៤៨ ) ។ អ្នកក៏អាចចែកចាយបទពិសោធន៍ផ្ទាល់ខ្លួនអំពីរបៀបដែលព្រះអង្គសង្គ្រោះបានជួយអ្នក ឬនរណាម្នាក់ដែលអ្នកស្គាល់ឲ្យធ្វើការផ្លាស់ប្តូរ ដើម្បីក្លាយកាន់តែដូចជាទ្រង់ ។
-
តើព្រះអង្គសង្គ្រោះបានបំផុសគំនិតអ្នក ឬនរណាម្នាក់ដែលអ្នកស្គាល់ឲ្យធ្វើការផ្លាស់ប្តូរដើម្បីក្លាយកាន់តែដូចទ្រង់ដោយរបៀបណា ?
-
ប្រសិនបើនរណាម្នាក់បានបង្ហាញថាវាពិបាកក្នុងការផ្លាស់ប្តូរទម្លាប់របស់ពួកគេ តើអ្នកចង់ឲ្យពួកគេចងចាំអ្វីអំពីព្រះវរបិតាសួគ៌ និងព្រះយេស៊ូវគ្រីស្ទ ?
វាអាចមានប្រយោជន៍ក្នុងការលើកទឹកចិត្តសិស្សឲ្យមានភាពអត់ធ្មត់ និងតស៊ូក្នុងការខិតខំប្រឹងប្រែងរបស់ពួកគេ ព្រោះជារឿយៗវាត្រូវការពេលវេលា និងការព្យាយាមម្តងហើយម្តងទៀតដើម្បីផ្លាស់ប្តូរទម្លាប់របស់យើង ។ អ្នក អាច អាន អេសេគាល ៣៦:២៦–២៧ ឡើងវិញ ដើម្បីរំឭកសិស្សថា ព្រះអង្គសង្គ្រោះសន្យាថានឹងប្រទានពរដល់ពួកគេដោយនូវព្រះវិញ្ញាណរបស់ទ្រង់ ដើម្បីជួយពួកគេធ្វើការផ្លាស់ប្ដូរដែលចាំបាច់ ។