« ការស្ថាបនាភាពរឹងមាំខាងសតិអារម្មណ៍នៅក្នុងព្រះអម្ចាស់ ៖ ព្រះអង្គសង្រ្គោះអាចជួយយើងបង្កើនភាពធន់ខាងសតិអារម្មណ៍ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ការស្ថាបនាភាពរឹងមាំខាងសតិអារម្មណ៍នៅក្នុងព្រះអម្ចាស់ ៖ ព្រះអង្គសង្រ្គោះអាចជួយយើងបង្កើនភាពធន់ខាងសតិអារម្មណ៍ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
សុខភាពខាងផ្លូវកាយ និងខាងសតិអារម្មណ៍ ៖ មេរៀនទី ១៨១
ការស្ថាបនាភាពរឹងមាំខាងសតិអារម្មណ៍នៅក្នុងព្រះអម្ចាស់
ព្រះអង្គសង្រ្គោះអាចជួយយើងបង្កើនភាពធន់ខាងសតិអារម្មណ៍
តើអ្នកបត់បែនបញ្ហាប្រឈមខាងសតិអារម្មណ៍ដែលអ្នកប្រឈមមុខបានល្អប៉ុនណា ? អារម្មណ៍ពិបាកគឺជារឿងធម្មតានៃផ្នែកមួយនៃជីវិត ។ សមត្ថភាពរបស់យើងដើម្បីស៊ូទ្រាំនឹងអារម្មណ៍ទាំងនេះដោយស្មោះត្រង់ចម្រើនឡើងនៅពេលដែលយើងពឹងផ្អែកលើកម្លាំង និងព្រះចេស្ដារបស់ព្រះវរបិតាសួគ៌ និងព្រះយេស៊ូវគ្រីស្ទ ។ មេរៀននេះអាចជួយសិស្សទទួលបានកម្លាំងពីព្រះវរបិតាសួគ៌ និងព្រះយេស៊ូវគ្រីស្ទ ដើម្បីដោះស្រាយបញ្ហាប្រឈមខាងសតិអារម្មណ៍របស់ពួកគេ ។
ការរៀបចំសិស្ស ៖ សូមអញ្ជើញសិស្សឲ្យគិតអំពី ឬសួរនរណាម្នាក់ដែលពួកគេស្គាល់អំពីបទពិសោធន៍ដែលពួកគេបានមាននៅក្នុងការប្រឈមមុខនឹងអារម្មណ៍ពិបាកៗ ។ បើសមរម្យ ពួកគេអាចរៀបចំដើម្បីចែកចាយបទពិសោធន៍នេះជាមួយសិស្សក្នុងថ្នាក់ ។
សកម្មភាពរៀនសូត្រដែលអាចមាន
ខ្យល់កួចនៅក្នុងជីវិតរបស់យើង
ដើម្បីចាប់ផ្តើមថ្នាក់ សូមពិចារណាបង្ហាញរូបភាពដើមឈើដែលត្រូវបានព្យុះបោកបក់រំលើងគល់ និងរូបភាពនៃដើមដែលនៅតែចាក់ឫសយ៉ាងរឹងនៅក្នុងដី ។ អ្នកក៏អាចអញ្ជើញសិស្សម្នាក់ឲ្យគូររូបដើមឈើមួយនៅលើក្តារខៀន ខណៈដែលសមាជិកថ្នាក់ផ្សេងទៀតគូររូបដើមឈើស្រដៀងគ្នានេះនៅក្នុងសៀវភៅកំណត់ហេតុការសិក្សារបស់ពួកគេ ។ នៅខាងឆ្វេងដៃនៃដើមឈើនេះ សូមពិចារណាស្នើសុំសិស្សឲ្យរៀបរាប់ពីអារម្មណ៍លំបាកខាងសតិអារម្មណ៍មួយចំនួនដែលក្មេងវ័យជំទង់ប្រឈមមុខ ។
សតិអារម្មណ៍គឺជាការឆ្លើយតបធម្មតារបស់រាងកាយចំពោះបទពិសោធន៍ប្រចាំថ្ងៃ ។ ពេលខ្លះ អារម្មណ៍ទាំងនេះគឺស្រាល និងងាយស្រួលគ្រប់គ្រង ដូចជាខ្យល់នៃរដូវក្តៅ ។ ពេលខ្លះ យើងដកពិសោធន៍នូវអារម្មណ៍លំបាកដែលអាចមានអារម្មណ៍ថា ដូចជាខ្យល់កួច ។
ដើមឈើដែលខ្យល់កួចបានបោកបក់លើ ជាញឹកញាប់មានឫសដែលដុះលូតលាស់លឿនជាងមុន ក្រាស់ជាងមុន និងដុះបានខ្ពស់ ដើមឈើមានសមត្ថភាពខ្លាំងក្នុងការស៊ូទ្រាំ ។ នៅពេលដែលខ្យល់បោកបក់លើវា ដើមឈើក៏បង្កើតទម្រង់កោសិកាដែលធ្វើឲ្យគល់ និងមែកឡើងក្រាស់ ។ ដូចគ្នានេះដែរ ការរៀនឆ្លើយតបទៅនឹងគ្រាដែលសតិអារម្មណ៍មានការប៉ះពាល់ជាខ្លាំង នោះការធ្វើតាមព្រះអង្គសង្គ្រោះនឹងពង្រឹងសមត្ថភាពរបស់យើងក្នុងការស៊ូទ្រាំ ។
ជាជម្រើសមួយផ្សេងទៀត អ្នកអាចបង្ហាញការពិពណ៌នារបស់អែលឌើរ អាន់ឌើរសិន ពីអ្វីដែលកើតឡើងចំពោះដើមឈើដែលពុះពារនឹងខ្យល់នៅក្នុងវីដេអូនេះ « ខ្យល់គួចខាងវិញ្ញាណ » នាទីទី ០:០០ ដល់ ១:១០ ចេញពីគេហទំព័រ ChurchofJesusChrist.org ។
នៅក្នុងសៀវភៅកំណត់ហេតុការសិក្សារបស់អ្នក សូមសរសេរខ្យល់កួចខាងសតិអារម្មណ៍មួយចំនួនដែល អ្នក បានប្រឈមមុខកាលពីអតីត ឬកំពុងតែប្រឈមមុខនៅសព្វថ្ងៃនេះ ។
នៅពេលនិយាយពីខ្យល់កួចក្នុងជីវិត អែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់ បានបង្រៀន ៖
អ្នកពិតជាមានតម្លៃចំពោះព្រះ លើសពីដើមឈើមួយដើមទៅទៀត ។ អ្នកជាបុត្រា និងបុត្រីនៃទ្រង់ ។ ទ្រង់បានធ្វើឲ្យវិញ្ញាណអ្នករឹងមាំ ហើយធន់ទៅនឹងខ្យល់កួចនៃជីវិតនេះ ។ ខ្យល់កួចនៅក្នុងយុវវ័យរបស់អ្នក ដែលប្រៀបបាននឹងខ្យល់បក់បោកទៅលើដើមឈើតូចមួយ អាចបង្កើនកម្លាំងខាងវិញ្ញាណអ្នក ដោយរៀបចំអ្នកសម្រាប់អនាគត ។ ( « Spiritual Whirlwinds » Liahona ខែឧសភា ឆ្នាំ២០១៤ ទំព័រ ១៨ )
-
តើសារលិខិតរបស់អែលឌើរ អាន់ឌើរសិន អាចជួយក្មេងវ័យជំទង់ម្នាក់ដែលមានអារម្មណ៍ថា មានភាពតានតឹងនៃខ្យល់កួចខាងសតិអារម្មណ៍យ៉ាងដូចម្តេច ?
សូមពិចារណាការចែកចាយថា សមត្ថភាពស៊ូទ្រាំនឹងខ្យល់កួចនេះត្រូវបានហៅថា ភាពធន់ខាងសតិអារម្មណ៍ ។ អ្នកអាចចែកចាយថា សិស្សនឹងរៀនជំនាញដែលអាចជួយពួកគេបង្កើនភាពធន់ខាងសតិអារម្មណ៍របស់ពួកគេពេញមួយឆ្នាំ ។
ការបង្កើនភាពធន់នៃសតិអារម្មណ៍របស់យើងជួយយើងឲ្យអភិវឌ្ឍរបៀបត្រឹមត្រូវដើម្បីប្រឈមនឹងគំនិត និងអារម្មណ៍លំបាកៗដែលយើងជួបប្រទះ ។ យើងអាចរៀនដើម្បីដឹងពីរបៀបដែលព្រះវរបិតាសួគ៌ និងព្រះយេស៊ូវគ្រីស្ទពង្រឹងយើង នៅពេលយើងមានអារម្មណ៍បែបនេះ នៅពេលទ្រង់ទាំងទ្វេបំផុសគំនិតយើងឲ្យស្វែងរកជំនួយបន្ថែម ។
នៅពេលអ្នកសិក្សា សូមយាងអញ្ជើញព្រះវិញ្ញាណបរិសុទ្ធដើម្បីជួយអ្នកកំណត់របៀបដែលអ្នកអាចស្វែងរកជំនួយពីព្រះវរបិតាសួគ៌ និងព្រះយេស៊ូវគ្រីស្ទ នៅពេលអ្នកឆ្លងកាត់ខ្យល់គួចខាងសតិអារម្មណ៍ ។
ព្រះអង្គសង្គ្រោះសន្យាថានឹងនៅជាមួយ និងពង្រឹងយើង
ដើម្បីជួយសិស្សមើលឃើញពីឧទាហរណ៍នៃព្រះចេស្ដាពង្រឹងរបស់ព្រះអម្ចាស់ សូមពិចារណាចែកចាយរឿងរបស់យ៉ូស្វេ ។ សិស្សប្រហែលជាបានសិក្សាដំណើររឿងរបស់យ៉ូស្វេ ដែលព្រះអម្ចាស់បានហៅឲ្យដឹកនាំអ៊ីស្រាអែលបន្ទាប់ពីម៉ូសេ នៅក្នុងមេរៀនទី ៦១ ៖ « យ៉ូស្វេ ១ » ។
យ៉ូស្វេស្ថិតក្នុងស្ថានភាពដ៏លំបាកនៅពេលដែលលោកបានទទួលតួនាទីធ្វើជាព្យាការី និងជាអ្នកដឹកនាំទាហានទទួលខុសត្រូវក្នុងការបង្កើតប្រទេសថ្មីមួយបន្ទាប់ពីការដឹកនាំរបស់ម៉ូសេ ។
-
តើអ្នកគិតថាអ្នកនឹងមានអារម្មណ៍បែបណា បើអ្នកស្ថិតក្នុងស្ថានភាពរបស់យ៉ូស្វេ ?
សូមអាន យ៉ូស្វេ ១:១, ៥–៩ ដោយរកមើលអ្វីដែលព្រះអម្ចាស់បានសន្យាយ៉ូស្វេ នៅពេលលោកប្រឈមមុខនឹងឧបសគ្គទាំងនេះ ។
-
តើយើងអាចរៀនអ្វីខ្លះដែលអាចជួយយើងប្រឈមមុខនឹងបញ្ហាប្រឈមក្នុងជីវិត ?
សិស្សអាចរកឃើញសេចក្តីពិត ដូចជា នៅពេលយើងធ្វើតាមព្រះអម្ចាស់ដោយក្លាហាន នោះទ្រង់នឹងគង់នៅជាមួយយើង ហើយពង្រឹងយើង ។
ដើម្បីជួយសិស្សយល់ពីអានុភាពនៃសេចក្តីពិតនេះ នោះអ្នកអាចបង្ហាញសារលិខិតរបស់អែលឌើរ អាន់ឌើរសិន បន្ថែមទៀតនៅក្នុង « ខ្យល់គួចខាងវិញ្ញាណ » នាទីទី ១:៣៣ ដល់ ២:១២ ចេញពីគេហទំព័រ ChurchofJesusChrist.org ឬចែកចាយសារលិខិតពីសន្និសីទទូទៅ ចេញពី « ខ្យល់គួចខាងវិញ្ញាណ » នាទីទី ៤:១២–៤:៤៨ ។
ឆ្លើយសំណួរខាងក្រោមនៅក្នុងសៀវភៅកំណត់ហេតុការសិក្សានៅក្រោមគំនូរដើមឈើរបស់អ្នក ។
-
រៀបរាប់អំពីសមត្ថភាពរបស់អ្នកក្នុងការដោះស្រាយបញ្ហាប្រឈមខាងសតិអារម្មណ៍ ។ តើអ្នកគិតថា អារម្មណ៍ណាខ្លះដែលអ្នកគ្រប់គ្រងបានល្អ ? តើអារម្មណ៍ណាខ្លះដែលនៅតែមានភាពពិបាក ?
-
រៀបរាប់អំពីសមត្ថភាពរបស់អ្នកក្នុងការទទួលបានជំនួយពីព្រះអម្ចាស់សម្រាប់អារម្មណ៍ទាំងនេះ ។ តើអ្នកធ្លាប់មានជោគជ័យអ្វីខ្លះ ? តើអ្នកធ្លាប់បានសាកល្បងអ្វីខ្លះដែលមិនដំណើរការបានល្អដូចដែលអ្នកបានរំពឹងទុក ?
ការពិចារណាបទគម្ពីរអាចជួយយើងឲ្យយល់ពីកម្លាំងរបស់ព្រះអម្ចាស់
សូមអាន យ៉ូស្វេ ១:៨ ដោយរកមើលម្តងទៀតនូវអ្វីដែលនឹងជួយឲ្យយ៉ូស្វេធ្វើតាមព្រះអម្ចាស់ ។
-
តើអ្នកបានរកឃើញអ្វីខ្លះ ?
អ្នកអាចចង្អុលបង្ហាញថា នៅពេលយ៉ូស្វេជួបនឹងបញ្ហាប្រឈមរបស់លោក ព្រះអម្ចាស់បានប្រាប់លោកឲ្យសមាធិ ឬពិចារណាបទគម្ពីរ ( « គម្ពីរក្រឹត្យវិន័យ ») ទាំងថ្ងៃទាំងយប់ ( សូមមើល យ៉ូស្វេ ១:៨ ) ។ សូមពិចារណាចង្អុលបង្ហាញពីវិធីមួយដែលយើងអាចរកឃើញកម្លាំងខាងសតិអារម្មណ៍នៅក្នុងព្រះអម្ចាស់គឺតាមរយៈការពិចារណាបទគម្ពីរ ។
-
តើការពិចារណាបន្ទូលរបស់ព្រះអម្ចាស់អាចជួយមនុស្សម្នាក់ដោះស្រាយបញ្ហាប្រឈមខាងសតិអារម្មណ៍បានយ៉ាងដូចម្តេច ?
ដោយសម្លឹងមើលបញ្ជីនៃអារម្មណ៍នៅលើក្តារខៀន សូមស្វែងរកវគ្គបទគម្ពីរមួយ ឬច្រើនដែលអាចជួយមនុស្សម្នាក់ដែលមានអារម្មណ៍ទាំងនេះ ។
សិស្សអាចស្វែងរកបទគម្ពីរដោយមើលវគ្គបទគម្ពីរចំណេះចំណានខាងគោលលិទ្ធ ឬសេចក្តីណែនាំដល់បទគម្ពីរទាំងឡាយ ដោយស្វែងរកពាក្យដូចជា « លួងលោម » «សេចក្ដីសុខសាន្ត » « កម្លាំង » ឬ «សេចក្តីសង្ឃឹម » ។ អត្ថបទ « បទគម្ពីរចំនួន ១២ សម្រាប់ពេលអ្នកមានអារម្មណ៍ … » ( ដើម្បីកម្លាំងនៃយុវជន ខែមីនា ឆ្នាំ២០២៤ ទំព័រ៤១ ) ក៏អាចជួយបានដែរ ។ នៅពេលសិស្សចែកចាយបទគម្ពីរ សូមសរសេរបទគម្ពីរទាំងនោះនៅផ្នែកខាងស្តាំនៃដើមឈើនៅជាប់នឹងអារម្មណ៍ដែលពួកគេបានជ្រើសរើស ។ ខាងក្រោមនេះគឺជាឧទាហរណ៍មួយចំនួនដែលសិស្សអាចចែកចាយ ។
សន្ធប់ចិត្ត ៖ អេសាយ ៤០:២៨–៣១ ។
ភ័យខ្លាច ៖ យ៉ូហាន ១៤:២៧
សោកសៅ ៖ វិវរណៈ ២១:៣–៥
ត្រូវគេបំភ្លេច ៖ លូកា ១២:៦–៧
បាក់ទឹកចិត្ត ៖ អេសាយ ៤៣:១–២, ៥
ពិចារណាបន្ទូលរបស់ទ្រង់
ដើម្បីជួយសិស្សអនុវត្តការពិចារណាបទគម្ពីរនៅពេលដោះស្រាយជាមួយអារម្មណ៍លំបាក សូមបង្ហាញដូចខាងក្រោម ។
ជ្រើសរើសអារម្មណ៍ដែលបានសរសេរនៅលើក្តារខៀនដែលអ្នកកំពុងមានអារម្មណ៍ ឬធ្លាប់មានអារម្មណ៍កាលពីអតីតកាល ។ អានបទគម្ពីរនៅជាប់នឹងអារម្មណ៍នោះ ហើយពិចារណាពាក្យនៃខគម្ពីរដោយសួរខ្លួនឯងនូវសំណួរដូចខាងក្រោម ៖
-
តើពាក្យ ឬឃ្លាណាខ្លះដែលនឹងមានប្រយោជន៍នៅពេលខ្ញុំមានអារម្មណ៍បែបនេះ ?
-
តើបទគម្ពីរនេះជួយខ្ញុំឲ្យយល់អ្វីខ្លះអំពីសេចក្តីស្រឡាញ់ និងព្រះចេស្ដារបស់ព្រះអម្ចាស់ ?
បន្ទាប់ពីពេលវេលាគ្រប់គ្រាន់ហើយ អ្នកអាចអញ្ជើញសិស្សឲ្យចែកចាយអារម្មណ៍ដែលពួកគេបានជ្រើសរើស បទគម្ពីរដែលពួកគេបានពិចារណា និងមូលហេតុដែលពួកគេគិតថា ការសញ្ជឹងគិតពីបន្ទូលរបស់ព្រះអម្ចាស់អាចជួយពួកគេស្វែងរកកម្លាំងខាងសតិអារម្មណ៍បន្ថែមទៀតមកពីទ្រង់ ។
-
តើអ្នក ឬនរណាម្នាក់ដែលអ្នកស្គាល់ធ្លាប់បានរកឃើញការលួងលោម ឬកម្លាំងរបស់ព្រះវរបិតាសួគ៌ និងព្រះយេស៊ូវគ្រីស្ទមកពីការពិចារណាវគ្គបទគម្ពីរមួយនៅពេលណា ?
ពិចារណាបញ្ចប់ថ្នាក់រៀនដោយចែកចាយបទពិសោធន៍ផ្ទាល់ខ្លួនរបស់អ្នក ដែលយល់ដឹងពីការលួងលោម ឬកម្លាំងរបស់ព្រះអម្ចាស់មកពីវគ្គបទគម្ពីរមួយ ។ អញ្ជើញសិស្សឲ្យបន្តពឹងផ្អែកលើបទគម្ពីរដើម្បីជួយពួកគេយល់ដឹងពីព្រះចេស្ដានៃព្រះវរបិតាសួគ៌ និងព្រះយេស៊ូវគ្រីស្ទ នៅពេលពួកគេប្រឈមមុខនឹងការលំបាកខាងសតិអារម្មណ៍ ។