« ការមើលថែរូបកាយខាងសាច់ឈាមរបស់យើង ៖ ការធ្វើឲ្យសុខភាពខាងរាងកាយ និងខាងសតិអារម្មណ៍របស់យើងប្រសើរឡើង » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ការមើលថែរូបកាយខាងសាច់ឈាមរបស់យើង ៖ ការធ្វើឲ្យសុខភាពខាងរាងកាយ និងខាងសតិអារម្មណ៍របស់យើងប្រសើរឡើង » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា
សុខភាពខាងរាងកាយ និងខាងសតិអារម្មណ៍ ៖ មេរៀនទី ១៨២
ការមើលថែរូបកាយខាងសាច់ឈាមរបស់យើង
ការធ្វើឲ្យសុខភាពខាងខាងកាយ និងខាងសតិអារម្មណ៍របស់យើងប្រសើរឡើង
ព្រះវរបិតាសួគ៌បានប្រទានរូបកាយដល់យើងដែលជាផ្នែកនៃផែនការរបស់ទ្រង់ដើម្បីក្លាយដូចជាទ្រង់ ។ ( សូមមើល « ក្រុមគ្រួសារ ៖ ការប្រកាសដល់ពិភពលោក » នៅលើគេហទំព័រ ChurchofJesusChrist.org ) ។ ប៉ុន្តែ របៀបដែលយើងមើលថែរាងកាយយើងមិនគ្រាន់តែប៉ះពាល់ដល់អនាគតរបស់យើងប៉ុណ្ណោះទេ ។ វាក៏ជះឥទ្ធិពលដល់អារម្មណ៍របស់យើងឥឡូវនេះដែរ ។ មេរៀននេះអាចជួយសិស្សឲ្យយល់អំពីរបៀបដែលជម្រើសរបស់យើងជះឥទ្ធិពលដល់សុខភាពរាងកាយ និងខាងសតិអារម្មណ៍របស់យើង ។
ការរៀបចំសិស្ស ៖ សូមអញ្ជើញសិស្សឲ្យគិតអំពីជម្រើសខាងសុខភាពរបស់ពួកគេ ( ការទទួលទាន ដំណេក ការហាត់ប្រាណ ។ល។ ) នៅសប្តាហ៍មុន ។ សូមលើកទឹកចិត្តពួកគេឲ្យវាយតម្លៃពីរបៀបដែលការជ្រើសរើសទាំងនោះមានឥទ្ធិពលលើរបៀបដែលពួកគេមានអារម្មណ៍ខាងរាងកាយ និងខាងសតិអារម្មណ៍ ។
សកម្មភាពរៀនសូត្រដែលអាចមាន
ការជ្រើសរើសរបស់យើងប៉ះពាល់ដល់ទាំងខាងរូបកាយ និងសតិអារម្មណ៍យើង
សាច់រឿងខាងក្រោមត្រូវបានប្រើនៅក្នុងមេរៀននេះទាំងមូល ដើម្បីជួយសិស្សឲ្យយល់ពីរបៀបដែលការសម្រេចចិត្តល្អ ឬមិនល្អដែលយើងធ្វើជារៀងរាល់ថ្ងៃជះឥទ្ធិពលដល់សុខភាពខាងរាងកាយ និងខាងសតិអារម្មណ៍របស់យើង ។ សាច់រឿងនេះប្រើឈ្មោះ « ម៉ាយ៉ា » ប៉ុន្តែអ្នកអាចអញ្ជើញសិស្សឲ្យជ្រើសយកឈ្មោះមួយ ហើយបន្ថែម ឬផ្លាស់ប្ដូរព័ត៌មានលម្អិតនៃដំណើររឿងនេះបាន ។
ម៉ាយ៉ា មានអារម្មណ៍នឿយហត់ និងបាក់ទឹកចិត្តនៅប៉ុន្មានសប្តាហ៍ចុងក្រោយនេះ ។ រូបភាពខាងក្រោមបង្ហាញពីជម្រើសមួយចំនួនដែលម៉ាយ៉ាបានធ្វើក្នុងអំឡុងពេលនោះ ។
-
តើជម្រើសណាខ្លះដែលម៉ាយ៉ាកំពុងធ្វើដែលអាចប៉ះពាល់ដល់អារម្មណ៍របស់នាង ?
សិស្សអាចនឹងលើកឡើងថា នាងចូលគេងយឺត ញ៉ាំអាហារមិនល្អ និងទទួលការបង្អាក់ពីទូរសព្ទរបស់នាង ។ អ្នកអាចអញ្ជើញសិស្សឲ្យថែមជម្រើសបន្ថែមទៀត ដែលក្មេងជំទង់នៅក្នុងតំបន់របស់អ្នកអាចនឹងធ្វើ ដែលអាចជះឥទ្ធិពលអវិជ្ជមានដល់សុខភាពខាងរាងកាយ និងខាងសតិអារម្មណ៍របស់ពួកគេ ។
វាអាចជាប្រយោជន៍ក្នុងការពន្យល់ដល់សិស្សថា ជាផ្នែកនៃផែនការនៃសុភមង្គលរបស់ព្រះវរបិតាសួគ៌ រូបកាយ និងវិញ្ញាណរបស់យើងមានទំនាក់ទំនងយ៉ាងជិតស្និទ្ធ ( សូមមើល គោលលទ្ធិ និងសេចក្ដីសញ្ញា ៨៨:១៥ ) ។ ដូច្នេះហើយ ជម្រើសដែលយើងធ្វើអំពីសុខភាពរបស់យើង មានឥទ្ធិពលលើយើងលើសពីការដែលយើងគ្រាន់តែទទួលអារម្មណ៍ខាងរូបកាយទៅទៀត ។
-
តើជម្រើសដែលម៉ាយ៉ាកំពុងធ្វើអាចប៉ះពាល់យ៉ាងដូចម្ដេចខ្លះដល់រូបកាយរបស់នាង ? ខាងសតិអារម្មណ៍របស់នាង ?
-
តើមានជម្រើសអ្វីខ្លះទៀតដែលយើងអាចធ្វើនៅពេលយើងមើលថែរាងកាយរបស់យើង ដែលអាចប៉ះពាល់ដល់អារម្មណ៍របស់យើង ?
អ្នកអាចកត់ត្រាចម្លើយរបស់សិស្សចំពោះសំណួរមុននេះនៅលើក្ដារខៀននៅក្នុងជួរឈរពីរគឺជម្រើស « សុខភាពល្អ » និង « សុខភាពមិនល្អ » ។ សិស្សអាចប្រើចម្លើយទាំងនេះនៅលើក្ដារខៀន ឬចម្លើយផ្សេងទៀតដែលពួកគេនឹកឃើញដោយខ្លួនឯង ដើម្បីបំពេញតារាងនៅក្នុងសកម្មភាពបន្ទាប់
សូមបង្កើតតារាងដូចខាងក្រោមនៅក្នុងសៀវភៅកំណត់ហេតុការសិក្សារបស់អ្នក ។ កត់ត្រាសកម្មភាពដែលល្អ និងមិនល្អនៅក្នុងប្រអប់បីដំបូង ដែលបានជះឥទ្ធិពលដល់អារម្មណ៍របស់អ្នកអំឡុងសប្តាហ៍ចុងក្រោយនេះ ។ នៅពេលអ្នកសិក្សា សូមយាងអញ្ជើញព្រះវិញ្ញាណបរិសុទ្ធឲ្យជួយអ្នកស្គាល់ពីរបៀបដែលអ្នកអាចកែលម្អរបៀបដែលអ្នកមើលថែរូបកាយរបស់អ្នក ហើយកត់ត្រារបៀបទាំងនោះនៅក្នុងប្រអប់ទី ៤ ។
|
១. ជម្រើសដែលខ្ញុំមិនបានធ្វើ |
២. ជម្រើសដែលខ្ញុំបានធ្វើពីរបីដង |
|
៣. ជម្រើសដែលខ្ញុំធ្វើជាញឹកញាប់ |
៤. ជម្រើសដែលខ្ញុំអាចធ្វើបាន |
ការមើលថែរាងកាយរបស់យើងនាំមកនូវពរជ័យ
ស្រមៃថាអ្នកកំពុងនិយាយជាមួយម៉ាយ៉ា ដែលចែកចាយថា « ខ្ញុំសង្ឃឹមថា ខ្ញុំឈប់មានអារម្មណ៍នឿយហត់ និងបាក់ទឹកចិត្តគ្រប់ពេលវេលាទៀត » ។ អ្នកមើលឃើញថា ម៉ាយ៉ាមិនដឹងថាជម្រើសដែលនាងកំពុងធ្វើបានជះឥទ្ធិពលបែបណាដល់នាងនោះទេ ។
រៀបចំការឆ្លើយតបដែលរួមបញ្ចូលនូវបទគម្ពីរ និងការបង្រៀនរបស់ថ្នាក់ដឹកនាំសាសនាចក្រ ដែលអាចជួយនរណាម្នាក់ដូចជាម៉ាយ៉ាឲ្យយល់ពី ៖
-
របៀបដែលជម្រើសរបស់នាងជះឥទ្ធិពលដល់ខាងរូបកាយ និងខាងសតិអារម្មណ៍របស់នាង ។
-
មូលហេតុដែលព្រះយកព្រះទ័យទុកដាក់ពីរបៀបដែលយើងថែទាំរាងកាយរបស់យើង ។
-
ពរជ័យដែលព្រះបានសន្យាដល់អស់អ្នកដែលថែរក្សារាងកាយរបស់ពួកគេ ។
អ្នកអាចដាក់សិស្សជាក្រុមតូចៗ ហើយចែកសំណៅមេរៀន « ការថែទាំរាងកាយរបស់យើង » ដើម្បីជួយសិស្សរៀបចំការឆ្លើយតបរបស់ពួកគេសម្រាប់ម៉ាយ៉ា ។ ផ្នែកខាងក្រោមនៃសំណៅមេរៀនរួមមានតារាងដែលអាចជួយសិស្សរៀបចំការឆ្លើយតបរបស់ពួកគេតាមប្រធានបទ ។
ធនធានបន្ថែមទាំងឡាយសម្រាប់ប្រភេទនីមួយៗអាចរកបាននៅក្នុងផ្នែក សកម្មភាពរៀនសូត្របន្ថែម ។
អ្នកអាចអញ្ជើញសិស្សឲ្យចែកចាយអ្វីដែលពួកគេបានរៀន និងរបៀបដែលវាអាចជួយដល់នរណាម្នាក់ដូចជាម៉ាយ៉ា ។
ព្រះអង្គសង្គ្រោះនឹងជួយយើងធ្វើការជ្រើសរើសដែលវិជ្ជមាន
សេចក្តីពិតមួយក្នុងចំណោមសេចក្តីពិតដែលសិស្សអាចរកឃើញពីសំណៅមេរៀននោះ អាចរួមមាន ដោយសាររូបកាយរបស់យើងជាអំណោយទានពីព្រះ ទ្រង់រំពឹងថាយើងយកចិត្តទុកដាក់ចំពោះវា ។
ដើម្បីជួយសិស្សគិតអំពីរបៀបដែលព្រះវរបិតាសួគ៌ និងព្រះយេស៊ូវគ្រីស្ទអាចជួយពួកគេមើលថែរូបកាយរបស់ពួកគេ សូមពិភាក្សាអំពីសំណួរមួយដូចខាងក្រោម ៖
-
តើអ្នកបានឃើញព្រះអម្ចាស់ប្រទានពរដល់អ្នកដែលខិតខំមើលថែរូបកាយរបស់ពួកគេយ៉ាងដូចម្ដេចខ្លះ ?
-
តើព្រះវរបិតាសួគ៌ និងព្រះយេស៊ូវគ្រីស្ទអាចជួយយើងធ្វើការជ្រើសរើសកាន់តែប្រសើរដើម្បីមើលថែរូបកាយយើងដោយរបៀបណា ទោះបីជាយើងមិនមានអារម្មណ៍ដូចនោះក្ដី ?
សូមពិចារណាអញ្ជើញសិស្សឲ្យបន្ថែមទៅលើផ្នែកទី ៤ នៃតារាងជម្រើសដែលមានសុខភាពល្អ នៅដើមមេរៀន ។
មើលតារាងដែលអ្នកបានបង្កើតនៅក្នុងសៀវភៅកំណត់ហេតុការសិក្សារបស់អ្នក ។ បន្ថែមចម្លើយរបស់អ្នកចំពោះសំណួរខាងក្រោម ៖
-
ចេញពីអ្វីដែលអ្នកបានសិក្សា តើជម្រើសមួយណាដែលអ្នកអាចកែសម្រួលដើម្បីធ្វើឲ្យសុខភាពខាងរាងកាយ និងខាងសតិអារម្មណ៍របស់អ្នកបានប្រសើរឡើង ?
-
តើអ្នកនឹងឲ្យព្រះវរបិតាសួគ៌ និងព្រះយេស៊ូវគ្រីស្ទចូលរួមក្នុងការខិតខំរបស់អ្នកដោយរបៀបណា ?
អ្នកអាចបញ្ចប់ដោយថ្លែងទីបន្ទាល់របស់អ្នកអំពីព្រះវរបិតាសួគ៌ ផែនការនៃសេចក្តីសង្គ្រោះរបស់ទ្រង់ និងពរជ័យដែលអ្នកបានឃើញពីការព្យាយាមធ្វើការជ្រើសរើសដែលមានភាពវិជ្ជមាន ។