« ការដោះស្រាយអារម្មណ៍កំហឹង ៖ ការឆ្លើយតបនឹងកំហឹងដោយការធ្វើតាមព្រះអង្គសង្គ្រោះ » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ការដោះស្រាយអារម្មណ៍កំហឹង ៖ ការឆ្លើយតបនឹងកំហឹងដោយការធ្វើតាមព្រះអង្គសង្គ្រោះ » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា
សុខភាពខាងរាងកាយ និងខាងសតិអារម្មណ៍ ៖ មេរៀនទី ១៨៦
ការដោះស្រាយអារម្មណ៍នៃកំហឹង
ការឆ្លើយតបនឹងកំហឹងដោយការធ្វើតាមព្រះអង្គសង្គ្រោះ
វាជារឿងធម្មតាទេក្នុងការឆ្លងកាត់នូវអារម្មណ៍នៃកំហឹង ។ ទោះបីជាយើងប្រហែលជាមិនអាចគ្រប់គ្រងស្ថានការណ៍ដែលបណ្តាលឲ្យយើងមានអារម្មណ៍កំហឹងក៏ដោយ ក៏យើងអាចសម្រេចចិត្តពីរបៀបដែលយើងនឹងឆ្លើយតបនឹងស្ថានការណ៍នោះដែរ ។ នៅពេលយើងមើលទៅកាន់ព្រះយេស៊ូវគ្រីស្ទ ទ្រង់អាចជួយយើងឲ្យឆ្លើយតបដូចជាទ្រង់នឹងឆ្លើយតប ។ មេរៀននេះអាចជួយសិស្សឲ្យធ្វើតាមគំរូរបស់ព្រះយេស៊ូវគ្រីស្ទ នៅពេលមានអារម្មណ៍នៃកំហឹង ។
ការរៀបចំសិស្ស ៖ សូមអញ្ជើញសិស្សឲ្យរៀបរាប់ស្ថានភាពដែលពួកគេអាចត្រូវបានល្បួងឲ្យឆ្លើយតបដោយកំហឹង ។ ពួកគេក៏អាចវាយតម្លៃថាតើពួកគេខឹងញឹកញាប់ប៉ុនណា និងរបៀបដែលពួកគេគ្រប់គ្រងអារម្មណ៍ទាំងនេះ ។
សកម្មភាពរៀនសូត្រដែលអាចមាន
សម្ពាធកើនឡើង
សូមពិចារណាបង្ហាញរូបភាពខាងក្រោមនៅលើក្ដារខៀន ឬយកសូដាដែលមិនទាន់គាស់មួយកំប៉ុងមកកាន់ថ្នាក់រៀន នៅពេលអ្នកពិភាក្សាសំណួរខាងក្រោម អ្នកអាចក្រឡុកកំប៉ុង ប៉ុន្តែកុំគាស់បើកវា ។
-
តើមានអ្វីកើតឡើងនៅក្នុងសូដាដែលមិនទាន់បានគាស់បើក ប្រសិនបើអ្នកក្រឡុកវាម្តងហើយម្តងទៀត ? តើមានអ្វីកើតឡើង ប្រសិនបើអ្នកគាស់បើកវា ?
សូមពិចារណាដាក់បង្ហាញរូបភាពដូចខាងក្រោមនេះ ។ ប្រសិនបើអ្នកយកកំប៉ុងមកក្រឡុក កុំបើកវាឲ្យសោះ ។ អ្នកអាចបន្តបង្ហាញវាទៅក្នុងមេរៀនទាំងមូល ។
-
តើតាមរបៀបណាខ្លះដែលអ្នកអាចប្រដូចឧទាហរណ៍នេះទៅនឹងអារម្មណ៍ខឹង ?
ប្រសិនបើសិស្សត្រូវការជំនួយ អ្នកអាចពន្យល់ថា កំប៉ុងអាចតំណាងឲ្យយើង ហើយសូដាអាចតំណាងឲ្យអារម្មណ៍របស់យើង ។ ការក្រឡុកកំប៉ុងអាចឆ្លុះបញ្ចាំងពីសកម្មភាព ស្ថានភាព ឬការប្រាស្រ័យទាក់ទងដែលអាចនាំឲ្យមានសម្ពាធកើនឡើង ( អារម្មណ៍នៃកំហឹង ) នៅក្នុងខ្លួនយើង ។
មនុស្សគ្រប់គ្នាជួបប្រទះនឹងកំហឹង ។ ដូចដែលវាជារឿងធម្មតាដែលសម្ពាធកើនឡើងនៅក្នុងកំប៉ុងសូដាដែលបានក្រឡុកនោះ វាក៏ជារឿងធម្មតាដែរ ដែលយើងមាននូវអារម្មណ៍នៃកំហឹង ។ ប៉ុន្តែយើងអាចជ្រើសរើសពីរបៀបដែលយើងឆ្លើយតបចំពោះអារម្មណ៍ទាំងនេះ ។
សូមជញ្ជឹងគិតអំពីសំណួរខាងក្រោមនេះ ៖
-
នៅលើរង្វាស់ពី ១ ដល់ ៥ ( ១ = ទាប; ៥ = ខ្ពស់ ) តើអ្នកខឹងជាញឹកញាប់ប៉ុនណាដែរ ? តើអ្នកផ្សេងទៀតអាចវាយតម្លៃថាអ្នកខឹងញឹកញាប់ប៉ុនណា ដោយរបៀបណា ?
-
តើអ្វីជាការឆ្លើយតបញឹកញាប់បំផុតរបស់អ្នក នៅពេលដែលអារម្មណ៍ខឹងកើតឡើង ?
នៅពេលអ្នកសិក្សាថ្ងៃនេះ សូមស្វែងរកការណែនាំពីព្រះវិញ្ញាណបរិសុទ្ធ ដើម្បីជួយអ្នករៀនពីរបៀបដែលព្រះវរបិតាសួគ៌ និងព្រះយេស៊ូវគ្រីស្ទនឹងជួយអ្នកគ្រប់គ្រងអារម្មណ៍នៃកំហឹង ។
ផលវិបាកនៃការធ្វើសកម្មភាពដោយកំហឹង
សម្រាប់គំរូក្នុងបទគម្ពីរអំពីលទ្ធផលនៃកំហឹង សូមពិចារណាពិភាក្សាអំពីដំណើររឿងរបស់អេសាវ លោកុប្បត្តិ ២៧ ។ ប្រសិនបើសិស្សបានសិក្សាដំណើររឿងនេះនៅក្នុងមេរៀនទី ៣០រួចហើយ ៖ « លោកុប្បត្តិ ២៥–២៧ » នោះអ្នកអាចប្រើដំណើររឿងផ្សេង ដូចជារឿងរបស់កាអ៊ីន ( សូមមើល ម៉ូសេ ៥:២១–២៣, ២៦–២៧, ៣២ ) ឬ អេសា ( សូមមើល របាក្សត្រ ទី២ ១៦:៧–១៣ ) ។
ដើម្បីជួយសិស្សឲ្យយល់អំពីដំណើររឿងរបស់អេសាវ សូមពិចារណាបង្ហាញរូបភាពខាងក្រោម ហើយអញ្ជើញសិស្សឲ្យចែកចាយនូវអ្វីដែលពួកគេដឹងអំពីលោក ។ បន្ទាប់មក អាន ឬសង្ខេបកថាខណ្ឌខាងក្រោម ។ ឬអ្នកអាចបង្ហាញ « Jacob and Esau » ( នាទីទី ១:១០ ដល់ ១:៥៣ ) ពីគេហទំព័រ ChurchofJesusChrist.org ។
អ៊ីសាក និង រេបិកា មានកូនប្រុសភ្លោះពីរនាក់ គឺ អេសាវ និង យ៉ាកុប ។ ក្នុងនាមជាកូនច្បង អេសាវមានសិទ្ធិទទួលបានពរជ័យនៃអំណាចមរតកនៃបងច្បងរបស់ឪពុកលោក ។ អំណាចមរតកនៃបងច្បងគឺមានន័យថា អេសាវនឹងទទួលមរតកនូវអ្វីជាកម្មសិទ្ធិរបស់ឪពុកលោក ហើយក្លាយជាអ្នកផ្គត់ផ្គង់គ្រួសារ និងជាអ្នកដឹកនាំខាងវិញ្ញាណ ។ ដោយសារទង្វើដ៏ទុច្ចរិតរបស់អេសាវ ( សូមមើល លោកុប្បត្តិ ២៥:៣១–៣៤; ២៦:៣៤–៣៥ ) យ៉ាកុបបានទទួលអំណាចមរតកនៃបងច្បងជំនួសវិញ ( សូមមើល លោកុប្បត្តិ ២៧:១–៣៣) ។
សូមអាន លោកុប្បត្តិ ២៧:៤១–៤៥ ដោយរកមើលរបៀបដែលអេសាវបានឆ្លើយតប នៅពេលលោកបានដឹងថាឪពុករបស់លោកបានផ្ដល់ពរអំណាចមរតកនៃបងច្បងទៅដល់យ៉ាកុប ។
-
តើអ្វីជាលទ្ធផលនៃកំហឹងរបស់អេសាវ ?
-
តើមានផលវិបាកអ្វីខ្លះទៀតដែលមនុស្សម្នាក់អាចទទួលបានពីការធ្វើសកម្មភាពដោយកំហឹង ?
វាអាចជាប្រយោជន៍ក្នុងការពន្យល់ថា បងប្អូនទាំងពីរបានបែកគ្នាអស់រយៈពេល២០ឆ្នាំ រហូតដល់ពួកគេបានផ្សះផ្សាគ្នាជាចុងក្រោយ ( សូមមើល លោកុប្បត្តិ ៣៣:៤ ) ។
គំរូរបស់ព្រះអង្គសង្គ្រោះ
សូមពិចារណារៀបចំសិស្សជាគូ ដោយឲ្យសិស្សម្នាក់ៗអានវគ្គបទគម្ពីរមួយក្នុងចំណោមវគ្គបទគម្ពីរខាងក្រោម ។ បន្ទាប់មក គូនីមួយៗអាចពិភាក្សាអំពីរបៀបដែលវគ្គបទគម្ពីរនោះនឹងឆ្លើយសំណួរខាងក្រោម ។
សូមអានការណ៍ខាងក្រោម ដោយរកមើលអ្វីដែលអ្នករៀនអំពីការឆ្លើយតបទៅនឹងអារម្មណ៍នៃកំហឹង ៖
ទំនុកដំកើង ១០៣:៨
សុភាសិត ១៦:៣២
-
តើអ្នកនឹងសង្ខេបនូវអ្វីដែលយើងអាចរៀនបានអំពីការដោះស្រាយកំហឹងដោយរបៀបណា ?
សូមជួយសិស្សឲ្យស្វែងរកសេចក្តីពិតមួយដូចជា ៖ នៅពេលយើងយឺតនឹងខឹង នោះយើងធ្វើតាមគំរូរបស់ព្រះអម្ចាស់ ។
-
តើការយឺតនឹងខឹងមានន័យបែបណាចំពោះបងប្អូន ?
សូមគិតអំពីឧទាហរណ៍មួយពេលព្រះយេស៊ូវយឺតនឹងខឹង ។
ប្រសិនបើសិស្សត្រូវការជំនួយ អ្នកអាចបង្ហាញឧទាហរណ៍ដូចខាងក្រោម ៖
-
លូកា ៩:៥១–៥៦ ( ព្រះយេស៊ូវត្រូវបានបដិសេធដោយភូមិសាសន៍សាម៉ារី ) ។
-
លូកា ២៣:៨–១១ ( ព្រះយេស៊ូវត្រូវបានចោទប្រកាន់ដោយហេរ៉ូឌ ) ។
-
យ៉ូហាន ១៩:៣–១២ ( ព្រះយេស៊ូវត្រូវបានចាប់ខ្លួន ) ។
-
តើរបៀបដែលព្រះយេស៊ូវបានឆ្លើយតបក្នុងស្ថានភាពទាំងនេះ អាចជួយនរណាម្នាក់ដែលមើលឃើញគំរូនេះបានយ៉ាងដូចម្ដេចខ្លះ ?
ជំហានដើម្បីគ្រប់គ្រងកំហឹង
ផ្នែកនៃមេរៀននេះអាចជួយសិស្សអនុវត្តជំហានខាងក្រោមសម្រាប់ការគ្រប់គ្រងកំហឹង ៖
-
ទទួលស្គាល់អ្វីដែលជំរុញឲ្យមានអារម្មណ៍ខឹង ។
-
កំណត់អារម្មណ៍ជាកត្ដាដែលធ្វើឲ្យមានអារម្មណ៍ខឹង ។
-
ជ្រើសរើសយុទ្ធសាស្ត្ររម្ងាប់អារម្មណ៍ ។
ដើម្បីជួយសិស្សរៀនគ្រប់គ្រងកំហឹងក្នុងនាមជាសិស្សរបស់ព្រះយេស៊ូវគ្រីស្ទ សូមចែកចាយសំណៅមេរៀន « ជំហានដើម្បីគ្រប់គ្រងកំហឹង » ។ ដោយសារសំណៅមេរៀននេះសួរសំណួរផ្ទាល់ខ្លួនខ្លះៗ សិស្សអាចបំពេញវាជាបុគ្គល ។ ឬពួកគេអាចធ្វើការជាគូ ដោយផ្អាកម្តងម្កាល ដើម្បីបំពេញសំណួរនីមួយៗ ។
សេចក្ដីបញ្ចប់
បន្ទាប់ពីសិស្សបានបញ្ចប់សំណៅមេរៀននោះហើយ សូមពិចារណាសួរសំណួរពិភាក្សាខាងក្រោមនេះបើសិនមានពេល ៖
-
តើអ្វីខ្លះដែលអ្នកបានរៀននៅថ្ងៃនេះ ដែលអាចជួយនរណាម្នាក់ដែលលំបាកក្នុងការគ្រប់គ្រងកំហឹងរបស់ពួកគេ ?
-
តើអ្នកឬអ្នកដទៃមានបទពិសោធន៍អ្វីខ្លះជាមួយនឹងការគ្រប់គ្រងកំហឹងតាមរបៀបដូចជាព្រះគ្រីស្ទ ?
សិស្សមួយចំនួនអាចនឹងមានអារម្មណ៍ថា វាមិនអាចទៅរួចទេសម្រាប់ពួកគេក្នុងការគ្រប់គ្រងកំហឹង ។ សូមពិចារណាបញ្ចប់ថ្នាក់ដោយការអញ្ជើញពួកគេឲ្យអាន អេធើរ ១២:២៧ ដោយរកមើលរបៀបដែលព្រះយេស៊ូវគ្រីស្ទអាចជួយនរណាម្នាក់ដែលពុះពារជាមួយនឹងភាពទន់ខ្សោយណាមួយ ។ សូមថ្លែងទីបន្ទាល់ថា ដោយសារដង្វាយធួនរបស់ទ្រង់ ព្រះយេស៊ូវគ្រីស្ទអាចប្រែក្លាយភាពទន់ខ្សោយរបស់យើងទៅជាភាពខ្លាំង—រួមទាំងការគ្រប់គ្រងកំហឹងរបស់យើងផងដែរ ។